NKHANI YAKUSAMBIRA YA NAMBALA 38
Mumuyanjengi Ukongwa Yehova Kweniso Abali ndi Azichi
“Ndikwere kwa Ada wo Mbawusemwi.”—YOHA. 20:17.
SUMU 3 Nthazi Yidu, Chilindiza Chidu, Chigomezgu Chidu
VO TISAMBIRENGI MU NKHANI IYI *
1. Kumbi ŵanthu akugomezgeka angaja pa ubali wuli ndi Yehova?
ŴANTHU a mubanja laku Yehova wo atimusopa, asazgapu Yesu, yo ‘ngwakwamba kuwaku pa chilengedu chosi,’ kweniso angelu anandi. (Ako. 1:15; Salimo 103:20) Pa nyengu yo Yesu wenga pacharu chapasi, wanguwovya ŵanthu akugomezgeka kuti awonengi Yehova nge Awusewu. Ndipu pa nyengu yo walongoronga ndi akusambira ŵaki, wangukamba kuti Yehova ‘Mbada ŵaki ndipuso Mbawusewu.’ (Yoha. 20:17) Ndipu pa nyengu yo tingujipereka kwaku Yehova ndi kubatizika, tikusere mubanja la abali ndi azichi wo atanjana.—Mariko 10:29, 30.
2. Kumbi tikambiskanengenji mu nkhani iyi?
2 Ŵanthu anyaki vitiŵasuzga kuti awonengi Yehova nge Ada achanju. Anyaki aziŵa umampha cha mo angalongore kuti atanja abali ndi azichi ŵawu. Mu nkhani iyi, tikambiskanengi mo Yesu watitiwovye kuti tiwonengi Yehova nge Awusefwi achanju, wo tingaja nawu pa ubwezi. Tiwonengi so mo tingayezge Yehova pa nkhani ya mo tichitiya vinthu ndi abali kweniso azichi ŵidu.
YEHOVA WAKHUMBA KUTI MUMUYANJENGI UKONGWA
3. Kumbi pempheru la ambuya lititiwovya wuli kuti tindere kufupi ndi Yehova?
3 Yehova Mbada achanju. Yesu wakhumba kuti tiwonengi Yehova nge mo iyu wachitiya. Iyu wakhumba kuti timuwonengi nge mpapi walisungu ndipuso wachanju, yo tingalongoro nayu nyengu yeyosi, nge munthu wankhaza cha pamwenga yo watitikambiya waka vakuchita. Tiziŵa venivi chifukwa cha vo Yesu wangusambiza akusambira ŵaki kuti akambengi asani apemphera. Iyu wangwamba pempheru la Ambuya ndi mazu ngakuti: “Awusefwi.” (Mate. 6:9) Yesu watingi watikambiyengi kuti tidanengi Yehova kuti “Wanthazizosi,” “Mlengi” pamwenga “Fumu yamuyaya,” chifukwa ngosi ngenanga ndi mazina ngakwenere kweniso nga mu Malemba. (Gene. 49:25; Yesa. 40:28; 1 Timo. 1:17) Kweni Yesu wangugwiriskiya ntchitu zina lakuti “Ada.”
4. Kumbi tiziŵa wuli kuti Yehova wakhumba kuti tindere kufupi ndi iyu?
4 Kumbi vitikusuzgani kuwona Yehova nge Ada achanju? Tanyaki vititisuzga. Panyaki vingatisuzga kuvwisa kuti pe mpapi wachanju chifukwa chakuti apapi ŵidu atiyanjanga cha. Kweni vakuchiska ukongwa kuziŵa kuti Yehova waziŵa umampha mo tivwiya! Iyu wakhumba kuja nasi pa ubwezi. Ndichu chifukwa chaki Mazu ngaki ngatitichiska kuti: “Ndereni kufupi ndi Chiuta, ndipu nayu wanderengi kufupi ndi yimwi.” (Yako. 4:8) Yehova watitiyanja ndipu wakamba kuti wajengi Awusefwi amampha ukongwa kuluska weyosi.
5. Mwakukoliyana ndi Luka 10:22, kumbi Yesu wangatiwovya wuli kuti tindere kwaku Yehova?
5 Yesu wangatiwovya kuti tindere kufupi ndi Yehova. Yesu watimuziŵa umampha ukongwa Yehova ndipu mijalidu Yaki watiyilongo umampha. Mwakuti iyu wangukamba kuti: “Munthu weyosi yo wawona ini, wawona so Ada.” (Yoha. 14:9) Nge mo mwana wakwamba wachitiya, Yesu watitisambiza mo tingatumbikiya Awusefwi kweniso kuŵavwiya, mo tingakhweche vinthu vo Yiwu atinkha kweniso vo tingachita kuti atiyanjengi. Kweni vo Yesu wanguchita we pacharu chapasi, vivumbuwa kuti Yehova ngwalisungu ukongwa kweniso ngwachanju. (Ŵerengani Luka 10:22.) Tiyeni tikambiskani vakuwoniyapu vinyaki.
Nge Ada achanju, Yehova wanguchiska mwana waki kuziya mwa mungelu (Wonani ndimi 6) *
6. Kambani vakuyeruzgiyapu vo vilongo kuti Yehova wanguvwisiya mapempheru ngaku Yesu.
6 Yehova wavwisiya ku ŵana ŵaki. Wonani mo Yehova wanguvwisiya ku Mwana waki wakwamba. Tikayika cha kuti Yehova wanguvwisiya mapempheru nganandi ngo Mwana waki wangupereka pa nyengu yo wenga pacharu chapasi. (Luka 5:16) Iyu wanguvwisiya pempheru laku Yesu lakukwaskana ndi vinthu vakhumbika vo wakhumbanga kusankha, nge pa nyengu yo wasankhanga akutumika ŵaki 12. (Luka 6:12, 13) Yehova wangumuvwisiya so Yesu wachipemphera pa nyengu yo wasuzgikanga maŵanaŵanu. Kwati kwaja kamanavi kuti Yudasi wamupereki, Yesu wangupemphera kutuliya pasi pa mtima kwa Awisi vakukwaskana ndi masuzgu ngo wenga pafupi kukumana nangu. Yehova wanguvwisiya pempheru laku Yesu kweniso wangutuma mungelu kuti wakamuchiski Mwana Waki wakwanjiwa.—Luka 22:41-44.
7. Kumbi mutuvwa wuli kuziŵa kuti Yehova wavwisiya mapempheru nginu?
7 Mazuŵa nganu, Yehova walutirizga kuvwisiya mapempheru nga ateŵeti ŵaki ndipu watiŵamuka pa nyengu yakwenere kweniso mu nthowa yamampha. (Salimo 116:1, 2) Mzichi munyaki ku India, wanguwona mo Yehova wangumukiya mapempheru ngaki. Iyu wasuzgikanga ukongwa maŵanaŵanu ndipu wangupemphera kwaku Yehova ndi mtima wosi vakukwaskana ndi suzgu yeniyi. Mzichi uyu wangulemba kuti: “Pulogilamu ya JW Broadcasting® ya May 2019, yo yikonkhoska vo munthu wangachita kuti wamalani ndi vinthu vakufipiska mtima, yenga ya pa nyengu yaki kwaku ini. Yehova wangumuka mapempheru ngangu kuziya mu pulogilamu yeniyi.”
8. Kumbi ndi nthowa nizi zo Yehova wangulongore kuti watimuyanja Yesu?
8 Yehova watitiyanja kweniso kutiphwere nge mo wanguyanjiya Yesu ndipuso kumuphwere pa nyengu yo wachitanga uteŵeti waki wakusuzga pacharu chapasi. (Yoha. 5:20) Iyu wangumuwovya Yesu kuti walutirizgi kuja ndi chivwanu chakukho, wangumuchiska pa nyengu yo wangusuzgika maŵanaŵanu kweniso wangumupaska vinthu vakuliŵavu vo wakhumbikiyanga. Ndipuso Yehova wangulongo kuti watimuyanja Mwana waki kweniso wakondwa nayu. (Mate. 3:16, 17) Chifukwa chakuti nyengu zosi Yesu waziŵanga kuti Awisi akuchanya atimuyanja, iyu wajiwonanga kuti we yija cha.—Yoha. 8:16.
9. Kumbi te ndi ukaboni wuli wo ulongo kuti Yehova watitiyanja?
9 Mwakuyanana ndi Yesu, tosi tawonapu Yehova wachilongo kuti watitiyanja mu nthowa zakupambanapambana. Aŵanaŵaniyani waka: Yehova wakutiguziya kwaku iyu ndipuso wakutipaska banja lauzimu lo litanjana kweniso kukoliyana ndipu lititiwovya kuti tikondwengi ndipuso lititichiska asani tasuzgika maŵanaŵanu. (Yoha. 6:44) Yehova watitipaska so chakurya chauzimu chinandi cho chititiwovya kuja ndi chivwanu chakukho. Ndipuso iyu watitiwovya kuti tisaniyengi vinthu vo tikhumbika pa umoyu. (Mate. 6:31, 32) Asani tiŵanaŵaniya mo Yehova watitiyanjiya, nasi titimuyanja ukongwa.
MUCHITENGI VINTHU NDI ABALI NDI AZICHI NGE MO YEHOVA WACHITIYA
10. Kumbi tingasambiranji kwaku Yehova pa mo wachitiya vinthu ndi abali kweniso azichi ŵidu?
10 Yehova watiŵayanja abali ndi azichi ŵidu. Kweni nyengu zinyaki vingatisuzga kuŵayanja ŵanthu a mubanja lidu lauzimu kweniso kuŵalongo kuti titiŵayanja. Ve viyo chifukwa chakuti tipambana midawuku kweniso ko tikukuliya. Ndipuso tosi tinangisa vo vingakwiyisa ŵanthu anyaki pamwenga kuŵaguŵiska. Chinanga kuti ve viyo, tingawovya kuti banja lidu lauzimu liyanjanengi. Kumbi tingachita wuli venivi? Asani tiyezga Awusefwi pakulongo kuti titanja abali ndi azichi ŵidu. (Aefe. 5:1, 2; 1 Yoha. 4:19) Tiyeni tiwoni vo tingasambira kwaku Yehova.
11. Kumbi Yesu wangulongo wuli kuti Yehova ‘ngwalisungu likulu’?
11 Yehova walongo “lisungu likulu.” (Luka 1:78) Munthu walisungu wakwaskika asani wawona kuti ŵanthu asuzgika ndipu wasaniya nthowa zakuŵawovye kweniso kuŵapembuzga. Mo Yesu wachitiyanga vinthu ndi ŵanthu, wangulongo mo Yehova watiŵayanjiya. (Yoha. 5:19) Wati wawona chigulu cha ŵanthu, Yesu “wanguŵalenge lisungu chifukwa ŵenga akulimukalimuka kweniso akujowoleka nge mbereri zambula mliska.” (Mate. 9:36) Yesu wanguchita vinandi kuluska waka kuŵalongo lisungu ŵanthu ŵenaŵa. Iyu wanguchizga wo atamanga kweniso wangusisipuwa “akulakatuka ndi ntchitu ndipuso akufyoka ndi katundu muzitu.”—Mate. 11:28-30; 14:14.
Muyezgengi Yehova mwakuja akupaska kweniso kuŵalongo lisungu abali ndi azichi ŵinu (Wonani ndimi 12-14) *
12. Kumbi tingaŵalongo wuli lisungu abali ndi azichi ŵidu?
12 Techendaŵalongo lisungu abali ndi azichi ŵidu, tikhumbika kuziŵa dankha masuzgu ngo akumana nangu. Mwakuyeruzgiyapu, mzichi wangaŵa kuti watama matenda ngakulu. Iyu wadandawulapu cha vakukwaskana ndi suzgu lenili, kweni panyaki wangakondwa ukongwa asani munthu munyaki wangamuwovya. Iyu watenere kuti wasuzgika kuphwere banja laki mwakuliŵavu. Kumbi tingamuwovya mwakumubikiya chakurya pamwenga kumunozge munyumba? Pamwenga vingachitika kuti mubali ntchitu yikumumaliya. Asani ndi viyo, tingamupaskaku kandalama kamanavi, panyaki kwambula kumukambiya kuti ndisi tamupaska, kuti kamuwovyi mpaka po wasaniriya ntchitu yinyaki.
13-14. Kumbi tingamuyezga wuli Yehova pa nkhani yakupaska?
13 Yehova ngwakupaska. (Mate. 5:45) Tikhumbika cha kulindizga kuti abali ndi azichi atipemphi dankha ndipu tiŵalongongi lisungu. Mwakuyanana ndi Yehova, tingaŵawovya ŵechendatipemphi. Iyu watitiŵaliskiya lumwi zuŵa lelosi chinanga tingaleka kumupempha! Ndipu mbanthu wo awonga pe cha wo ayanduwa ndi lumwi, kweni weyosi wayanduwa. Namwi mungazomereza kuti Yehova pakutipaska vinthu vo tikhumbikiya, walongo kuti watitiyanja. Titimuyanja ukongwa Yehova chifukwa chakuti ngwalisungu kweniso ngwakupaska!
14 Abali ndi azichi ŵidu anandi ayezga Awusefwi akuchanya ndipu mbakupaska. Mwakuyeruzgiyapu, mu 2013, chimphepu cha Super Typhoon Haiyan chingunanga vinthu ukongwa ku Philippines. Abali kweniso azichi anandi, nyumba zawu zingubwanganduka kweniso katundu wawu wangunangika. Kweni abali ndi azichi ŵawu pacharu chosi anguŵawovya mwaliŵi. Anandi angupereka ndalama zawu pamwenga angufwiyapu kugwira ntchitu yikulu yakunozga pamwenga kuzenga so nyumba pafufupi 750 chaka chechendakwani. Pa nyengu ya mulili wa COVID-19, Akaboni anguyesesa kovya abali ndi azichi ŵawu. Asani tichitapu kanthu mwaliŵi kuti tiwovyi abali ndi azichi ŵidu, tilongo kuti titiŵayanja.
15-16. Mwakukoliyana ndi Luka 6:36, kumbi ndi nthowa yamampha niyi yo tingayezge Awusefwi akuchanya?
15 Yehova ngwalisungu kweniso ngwakugowoka. (Ŵerengani Luka 6:36.) Zuŵa lelosi Awusefwi akuchanya atitilongo lisungu. (Salimo 103:10-14) Akusambira aku Yesu ŵenga ambula kufikapu, kweni iyu waŵalongonga lisungu kweniso kuŵagowoke. Ndipu iyu wenga wakukhumbisiska kupereka umoyu waki nge sembi kuti maubudi ngidu ngagowokereki. (1 Yoha. 2:1, 2) Kumbi muwona kuti mphakwenere cha kundere kufupi ndi Yehova kweniso Yesu chifukwa chakuti mbalisungu ndipuso mbakugowoka?
16 Tija pa ubwezi wakukho ndi ŵanthu a mubanja lidu lauzimu asani ‘titiŵagowoke ndi mtima wosi.’ (Aefe. 4:32) Kweni nyengu zinyaki ntchipusu cha kugowoke anyidu, mwaviyo tikhumbika kugwiriyapu ntchitu. Mzichi munyaki wati waŵerenga nkhani ya mu Chigongwi cha Alinda ya mutu wakuti “Muzikhululukirana ndi Mtima Wonse” yingumuwovya kuti wagowokengi ndi mtima wosi. * Iyu wangulemba kuti: “Kusambira nkhani iyi kwandiwovya kuziŵa mo kugowoke anyangu kutindiwovye. Nkhani iyi yikonkhoska kuti kuja wakunozgeka kugowoke ŵanthu anyaki, kung’anamuwa kuti uzomereza nkharu yawu yiheni cha pamwenga kuti vo anguchita vinguleka kukupweteka. Kweni asani waŵagowoke usunga vifukwa cha ndipu ulutirizga kuja ndi chimangu cha mumtima.” Asani titiŵagowoke ndi mtima wosi abali ndi azichi ŵidu, tilongo kuti titiŵayanja ndipuso tiyezga Awusefwi, a Yehova.
MUWONGENGI KUTI MWE MUBANJA LAKU YEHOVA
Ŵana ndipuso arara alongo kuti atanja abali ndi azichi ŵawu pacharu chosi (Wonani ndimi 17) *
17. Mwakukoliyana ndi Mateyu 5:16, kumbi tingaŵatumbika wuli Awusefwi akuchanya?
17 Ndi mwaŵi ukulu ukongwa kuja mubanja la pacharu chosi lo litanjana. Tikhumba kuti ŵanthu anandi akoliyani nasi pakusopa Chiuta widu. Mwaviyo, tikhumbika cha kuchita chechosi cho chingachitiska kuti ŵanthu aŵengi ndi maŵanaŵanu ngaheni ngakukwaskana ndi Yehova pamwenga ŵanthu ŵaki. Titesesa kulongo nkharu yamampha yo yingakopa ŵanthu kuti avwisiyi uthenga wamampha.—Ŵerengani Mateyu 5:16.
18. Kumbi ntchinthu wuli cho chingatiwovya kuti tipharazgengi kwambula mantha?
18 Nyengu zinyaki, ŵanthu anyaki angatisuska pamwenga kutitombozga chifukwa chakuti tivwiya Awusefwi akuchanya. Kumbi tingachita wuli asani tichita mantha kukambiyaku anyidu vo tigomezga? Tingakayikiyanga cha kuti Yehova ndi Mwana waki atiwovyengi. Yesu wangusimikiziya akusambira ŵaki kuti akhumbikanga cha kufipa mtima kuti amulongoro wuli pamwenga amukambanji. Chifukwa wuli? Yesu wanguti: “Mwazamupaskika pa nyengu yeniyo vakuti mukambi, pakuti mwazamulongoro pakumwija cha, kweni mzimu wa Awusemwi ndiwu wazamulongoro kuporote mwaku yimwi.”—Mate. 10:19, 20.
19. Kambani chakuwoniyapu cha munthu munyaki yo wanguchitiya ukaboni mwachiganga.
19 Tiyeni tikambiskani vo vinguchitikiya Robert. Nyengu yinyaki kuvuli wachisambira waka Bayibolu ndipu waziŵanga vinandi cha vakukwaskana ndi Bayibolu, iyu wakhumbikanga kuluta mukhoti ku South Africa kuti wakakonkhoske wakweruzga chifukwa cho wakaniyanga kusere usilikali. Iyu wanguŵakonkhoske mwachiganga ŵanthu wo ŵenga mukhoti kuti wakhumba cha kusere usilikali chifukwa chakuti watanja abali ndi azichi ŵaki. Robert wawonganga kuti we mubanja laku Yehova! Mwamabuchibuchi wakweruzga wangumufumba kuti: “Kumbi abali ŵaku wo mbayani?” Robert wakhazganga cha kuti angamufumba fumbu laviyo, kweni nyengu yeniyo iyu wangukumbuka lemba la zuŵa, la pazuŵa lenili. Lenga lemba la Mateyu 12:50 lo likamba kuti: “Munthu weyosi yo wachita khumbu la Ada wo ŵe kuchanya, mweniyo ndiyu mvurwa wangu, mzichi wangu kweniso ama.” Chinanga kuti Robert wenga wakuti wasambira waka Bayibolu, mzimu waku Yehova ungumuwovya kumuka fumbu lenili kweniso nganyaki ngo wakhazganga cha. Yehova watenere kuti wangukondwa nayu ukongwa Robert! Ndipu nasi Yehova wakondwa nasi asani titimuthemba kuti tichitiyi ukaboni mwachiganga pa nyengu yakusuzga.
20. Kumbi titenere kusimikiza mtima kuti tichitengenji? (Yohane 17:11, 15)
20 Tiyeni tilutirizgi kuwonga mwaŵi wo tenawu wakuja mubanja lauzimu lo litanjana. Te ndi Awusefwi amampha ukongwa kuluska weyosi kweniso abali ndi azichi anandi wo atitiyanja. Nyengu zosi tiwongengi chifukwa cha venivi. Satana ndipuso ŵanthu ŵaki aheni atesesa kuti tikayikiyengi kuti Awusefwi akuchanya atitiyanja ndipu atesesa so kutitimbanyizga kuti tilekengi kukoliyana. Chinanga kuti ve viyo, Yesu wangupemphera mumalu mwaku isi, wangupempha Awusefwi kuti ativikiliyengi kuti banja lidu lilutirizgi kukoliyana. (Ŵerengani Yohane 17:11, 15.) Yehova wamuka pempheru lenili. Mwakuyanana ndi Yesu, tingakayikiyanga cha kuti Awusefwi akuchanya atitiyanja kweniso atiwovyengi. Tiyeni tisimikizi mtima kuti tilutirizgengi kumuyanja ukongwa Yehova ndipuso abali ndi azichi ŵidu.
SUMU 99 Abali Mamiliyoni Nganandi
^ ndimi 5 Tikondwa ukongwa kuti te mubanja la abali ndi azichi wo atanjana ukongwa. Tosi tikhumbisiska kuti tiyanjanengi ukongwa. Kumbi tingachita wuli venivi? Tingachita venivi mwakuyezga mo Yehova walongore kuti watitiyanja kweniso mwakulondo chakuwoniyapu chaku Yesu ndipuso cha abali ndi azichi ŵidu.
^ ndimi 16 Wonani Chigongwi cha Alinda cha Chichewa cha November 15, 2012, peji 26-30.
^ ndimi 57 VITHUZI: Yehova watuma mungelu kuti wachiski Yesu mumunda wa Gesemani.
^ ndimi 59 VITHUZI: Pa nyengu ya mulili wa COVID-19, abali apakila vakurya ndi kuchipereka kwa abali ndi azichi ŵawu.
^ ndimi 61 VITHUZI: Ama atovya mwana wawu munthukazi yo watumiza kalata yakuchiska kwa mubali yo we kujeri.
