Bayibolu likambapu chechosi cha. Kweni Bayibolu likonkhoska fundu zinyaki zo zitenere kuti zikunguŵachitiska kuti aleki kuwere dankha ku Nazareti.

Mungelu wangukambiya Mariya kuti waŵengi ndi nthumbu ndipu wabalengi mwana. Pa nyengu yo mungelu wangupereke uthenga wenuwu, Mariya ndi Yosefi ajanga ku Nazareti, tawuni ya ku Galileya. (Luka 1:26-31; 2:4) Pavuli paki, ŵati aweku ku Ijipiti anguwere ku Nazareti. Yesu wangukuliya kwenuku ndipu wanguja Mnazareti. (Mate. 2:19-23) Mwaviyo, mphakuvwika kukamba kuti wosi ŵatatu Yesu, Yosefi ndi Mariya ŵenga aku Nazareti.

Mariya wenga ndi mubali waki zina laki Elizabeti yo wajanga ku Yuda. Elizabeti wenga muwolu wa wasembi Zekariya ndipu wanguja nyina waku Yohane Mubatizi. (Luka 1:5, 9, 13, 36) Nyengu yinyaki Mariya wanguluta kwaku Elizabeti ndipu wanguja kwenuku ku Yuda kwa myezi yitatu. Pavuli paki, Mariya wanguwere ku Nazareti. (Luka 1:39, 40, 56) Ndichu chifukwa chaki Mariya wakuziŵanga umampha ku Yuda.

Nyengu yinyaki Yosefi wanguvwiya dangu lakuti ‘akalembesi.’ Mwaviyo Yosefi wangutuwa ku Nazareti ndi kuluta ku Betelehemu, yo yenga ‘tawuni yaku Davidi.’ Betelehemu ngenga so malu ngo uchimi ungukambiya limu kuti ndiku kwazamuwiya Mesiya. (Luka 2:3, 4; 1 Samu. 17:15; 20:6; Mika 5:2) Yesu wati wawaku, Yosefi wangumuto cha Mariya, kwenda nayu ulendu utali kuwere ku Nazareti limoza ndi bonda wawu. Yiwu anguja ku Betelehemu ndipu kutuwa kwenuku kufika ku Yerusalemu, penga mtunda wa makilomita pafufupi 9. Mwaviyo, venga vambula kusuzga kuti ato bonda wawu mwenuyu ndi kuluta nayu ku nyumba yakusopiyamu kuti akapereki sembi mwakukoliyana ndi Dangu.​—Levi. 12:2, 6-8; Luka 2:22-24.

Pakwamba mungelu waku Chiuta wangukambiya Mariya kuti mwana waki, wazamupaskika ‘mpandu waufumu waku Davidi’ ndipu “wazamulamuliya nge Fumu.” Panyaki Yosefi ndi Mariya anguwona kuti penga pakwenere kuti Yesu wanguwiya mu tawuni ya ku Davidi. (Luka 1:32, 33; 2:11, 17) Panyaki, yiwu anguŵanaŵana kuti mbumampha kuti alutirizgi kuja kwenuku kuti alindizgi mpaka po Chiuta waŵakambiya vo atenere kuchita.

Tiziŵa cha kuti pangujumpha nyengu yitali wuli po yiwu angujaliya ku Betelehemu mpaka po akusanda nyenyezi anguziya. Kweni pa nyengu iyi, banja ili ndipu lija mu nyumba ndipuso Yesu wenga bonda cha kweni ndipu wakuwaku. (Mate. 2:11) Viwoneka kuti mumalu mwakuwere ku Nazareti, yiwu angulutirizga kuja ku Betelehemu kwa nyengu yitali.

Herodi wangulamula kuti “ŵana wosi anthulumi ku Betelehemu . . . akwambiya vyaka viŵi kusikiya pasi,” abayiki. (Mate. 2:16) Mungelu wangutcheŵeska Yosefi vakukwaskana ndi venivi. Mwaviyo, iyu ndi Mariya anguthaŵiya ku Ijipiti limoza ndi Yesu ndipu anguja kwenuku mpaka po Herodi wangufwiya. Pavuli paki, Yosefi wanguto banja laki ndi kuluta ku Nazareti. Ntchifukwa wuli yiwu anguwere ku Betelehemu cha? Chifukwa pa nyengu iyi mwana waku Herodi, Akelawo walamuliyanga ku Yudeya ndipu wenga munthu wankhaza. Kweniso mungelu waku Chiuta wangutcheska Yosefi kuti wangalutangaku cha. Mwaviyo, Nazareti ngenga malu ngamampha kuti Yosefi waleriyeku Yesu kuti waje mteŵeti wakugomezgeka waku Chiuta.​—Mate. 2:19-22; 13:55; Luka 2:39, 52.

Viwoneka kuti Yosefi wangufwa Yesu wechendajuli nthowa yakuti ŵanthu anyaki aluti kuchanya. Mwaviyo, Yosefi wazamuyuskikiya pacharu chapasi. Ŵanthu anandi azamukumana nayu ndipu azamukhumba kuziŵa chifukwa cho iyu ndi Mariya angulutirizgiya kuja ku Betelehemu Yesu wati wawaku.