NKHANI YAKUSAMBIRA YA NAMBALA 26
Kumbi Mungawovya Ŵanthu Kuja Akusambira aku Yesu?
“Chiuta . . . watikupaskani vosi viŵi, khumbu kweniso nthazi zakuchitiya.”—AFI. 2:13.
SUMU 64 Tigwirengi Ntchitu Yakuvuna Mwakukondwa
VO TISAMBIRENGI MU NKHANI IYI *
1. Kumbi ndi vinthu wuli vo Yehova wakuchitiyani?
KUMBI vinguchitika wuli kuti muje Kaboni waku Yehova? Chakwamba munguvwa “uthenga wamampha” panyaki kutuliya kwa apapi ŵinu, pamwenga kutuliya ku munthu yo mwagwiranga nayu ntchitu, pamwenga yo mwasambiranga nayu sukulu. Asani po cha panyaki Akaboni aku Yehova angukupharazgiyani pa nyumba yinu. (Mariko 13:10) Pavuli paki, munthu munyaki wanguchita phamphu kweniso kumaliya nyengu yinandi kuchita namwi sambiru la Bayibolu. Pa nyengu yo mwasambiranga Bayibolu, mungwamba kumuyanja Yehova ndipuso mungusambira kuti nayu watikuyanjani. Yehova wangukuguziyani mu uneneska ndipu sonu nge wakusambira waku Yesu Khristu, mwe ndi mwaŵi wakuzilonde umoyu wamuyaya. (Yoha. 6:44) Mutenere kuti mukondwa ukongwa kuwona kuti Yehova wanguchiska munthu munyaki kuti wakusambizeni uneneska ndipu Iyu wakuzomereza kuti muje mteŵeti Waki.
2. Kumbi tikambiskanengenji mu nkhani iyi?
2 Pakuti sonu tikusambira uneneska te ndi mwaŵi wakovya ŵanthu anyaki kuti nawu ayambi kwenda pa nthowa yakuluta ku umoyu. Chingaŵa chipusu kupharazga nyumba ndi nyumba, kweni tingasuzgika kwambisa kweniso kuchitiska masambiru nga Bayibolu. Kumbi ndimu viliri ndi yimwi? Asani ndi viyo, mbwenu masachizgu nga mu nkhani iyi ngangakuwovyani. Tikambiskanengi vo vititichiska kuti tiwovyengi ŵanthu kuja akusambira aku Yesu. Kweniso tiwonengi vo tingachita kuti timalani ndi masuzgu ngo ngatititondekesa kuchitiska sambiru la Bayibolu. Chakwamba, tiyeni tikambiskani chifukwa cho titenere kujaliya apharazgi kweniso asambizi a uthenga wamampha.
YESU WAKUTILAMULA KUTI TIPHARAZGENGI KWENISO KUSAMBIZA
3. Ntchifukwa wuli tipharazga?
3 Pa nyengu yo Yesu wenga pacharu chapasi, wangulamula akusambira ŵaki kuti agwirengi ntchitu yo ye ndi vigaŵa viŵi. Chakwamba, wanguŵakambiya kuti apharazgengi uthenga wamampha wa Ufumu ndipu wanguŵalongo mo angachitiya venivi. (Mate. 10:7; Luka 8:1) Mwakuyeruzgiyapu, Yesu wanguŵakambiya vo atenere kuchichita asani ŵanthu avwisiya uthenga wamampha wa Ufumu kweniso vo angachichita asani avwisiya cha. (Luka 9:2-5) Wangukamba so kuti akusambira ŵaki azamupharazgiya ŵanthu anandi kweniso mumalu nganandi po wangukamba kuti azamupereka “ukaboni ku ŵanthu amitundu yosi.” (Mate. 24:14; Machi. 1:8) Kwali ŵanthu avwisiyengi uthenga pamwenga cha, Yesu wangulamula akusambira ŵaki kuti apharazgengi vakukwaskana ndi Ufumu waku Chiuta kweniso vo wazamuchita.
4. Mwakukoliyana ndi Mateyu 28:18-20, kumbi ntchinthu wuli so chinyaki cho titenere kuchita kusazgiyapu pa kupharazga vakukwaskana ndi Ufumu?
4 Kumbi ntchinthu chachiŵi nichi cho Yesu wangulamula akusambira ŵaki kuti achitengi? Iyu wangukambiya akusambira ŵaki kuti asambizengi ŵanthu wo angaja akusambira kuti asungengi vinthu vosi vo wakulamula. Ŵanthu anyaki angakamba kuti Yesu wangulamula Akhristu a mu nyengu ya akutumika pe kuti apharazgengi ndi kusambiza. Kumbi wenuwu mbuneneska? Awa. Yesu wangulongo kuti ntchitu yakukhumbika yeniyi, yazamulutiliya “mpaka pakumaliya pa nyengu yinu.” (Ŵerengani Mateyu 28:18-20.) Iyu watenere kuti wangupereka dangu lenili pa nyengu yo wanguwoneke kwa akusambira ŵaki akujumpha 500. (1 Akori. 15:6) Kweniso mu chiwona cho wangulongo Yohane, Yesu wangulongo mwakuvwika umampha kuti akusambira ŵaki wosi atenere kovya ŵanthu anyaki kuti asambiri vakukwaskana ndi Yehova.—Chivu. 22:17.
5. Mwakukoliyana ndi 1 Akorinto 3:6-9, kumbi wakutumika Paulo wangukamba chakuyeruzgiyapu wuli cho chilongo kuti pe kukoliyana pakati pa kupharazga ndipuso kusambiza?
5 Wakutumika Paulo wanguyeruzgiya ntchitu yakovya ŵanthu kuja akusambira ndi kulima munda ndipu wangulongo kuti tikhumbika kuchita vinandi kuphara ŵaka kupanda mbewu. Iyu wangukumbusa Akhristu aku Akorinto kuti: “Ini ndingupanda, Apolo wangudiriya . . . Ndipu yimwi ndimwi munda waku Chiuta wo ulimika.” (Ŵerengani 1 Akorinto 3:6-9.) Nge antchitu mu “munda waku Chiuta,” tipanda mbewu pe cha kweniso titizidiriya ndipu kaŵikaŵi tiwona mo zikuliya. (Yoha. 4:35) Kweni pa nyengu yeniyi pe, tiziŵa umampha kuti ndi Chiuta yo wachitiska kuti zikuwi.
6. Asani tisambiza ŵanthu, kumbi tikhumbika kuŵawovya kuti achitenji?
6 Tipenja ŵanthu wo ŵe ndi “maŵanaŵanu ngamampha ngakuŵawovya kuti azisaniyi umoyu wamuyaya.” (Machi. 13:48) Kuti tiwovyi ŵanthu ŵenaŵa kuti aje akusambira, titenere kuŵawovya kuti (1) avwisengi, (2) agomezgengi, ndipuso (3) agwiriskiyengi ntchitu vinthu vo asambira kutuliya mu Bayibolu. (Yoha. 17:3; Ako. 2:6, 7; 1 Ate. 2:13) Ŵanthu wosi mumpingu angawovya ŵanthu wo asambira Bayibolu, mwa kuŵalongo chanju kweniso kuŵalondere umampha asani ŵaza ku maunganu. (Yoha. 13:35) Kweniso yo wasambiza munthu Bayibolu, wakhumbika kusaniya nyengu yinandi kweniso nthazi za kuwovye munthu yo wasambira nayu kuleka vigomezgu “vakujinthika mwanthazi.” (2 Akori. 10:4, 5) Pangato myezi yinandi kovya munthu yo wasambira Bayibolu kuti wasinthi ndipu pavuli paki, kubatizika. Kweni phamphu lidu lingawa paŵaka cha.
CHANJU CHITITICHISKA KUTI TIWOVYENGI ŴANTHU KUJA AKUSAMBIRA
7. Kumbi ntchinthu wuli cho chititichiska kuti tipharazgengi kweniso kovya ŵanthu kuja akusambira?
7 Ntchifukwa wuli tipharazgiya ŵanthu kweniso kuŵawovya kuti aje akusambira? Chifukwa chakwamba ntchakuti titanja Yehova. Asani muyesesa kuvwiya dangu lakuti mupharazgengi kweniso kovya ŵanthu kuja akusambira, ndikuti mulongo kuti mutanja Chiuta. (1 Yoha. 5:3) Ŵanaŵaniyani fundu iyi: Chifukwa chakuti mutanja Yehova, mupharazga nyumba ndi nyumba. Kumbi dangu lenili lenga lipusu kulivwiya? Awa. Kumbi zuŵa lakwamba lo mungwambiya kupharazga, munguchita mantha? Tikayika cha kuti mwenga ndi mantha. Kweni munguziŵa kuti ntchitu iyi njeniyo Yesu wakhumba kuti muchitengi ndipu munguvwiya dangu. Ndipu pati pajumpha nyengu mwasuzgikanga cha kupharazga nyumba ndi nyumba. Kweni muchita wuli pa nkhani yakuchitiska sambiru la Bayibolu? Kumbi muchita mantha asani muŵanaŵaniya venivi? Panyaki muchita nadi mantha. Kweni asani mungapemphera kwaku Yehova kuti wakuwovyeni kuja ndi chiganga kweniso kwambisa sambiru la Bayibolu, iyu wangakuwovyani kuti muwovyengi ŵanthu kuja akusambira.
8. Mwakukoliyana ndi Mariko 6:34, kumbi ntchinthu wuli so chinyaki cho chititichiska kuti tisambizengi ŵanthu?
8 Chifukwa chachiŵi, kwanja anyidu kutitichitiska kuti tiŵasambizengi uneneska. Mwakuyeruzgiyapu, Yesu ndi akusambira ŵaki, anguvuka chifukwa chakuti angupharazga ukongwa. Yiwu apenjanga malu ngakuti apumuliyepu, kweni chigulu cha ŵanthu chinguŵasaniya. Yesu wanguŵalenge lisungu ndipu wangwamba kuŵasambiza “vinthu vinandi.” (Ŵerengani Mariko 6:34.) Iyu wangugwira ntchitu mwaphamphu chinanga kuti wanguvuka. Chifukwa wuli? Yesu waziŵanga mo ŵanthu ŵenaŵa avwiyanga. Iyu wakhumbanga kuŵawovya chifukwa wanguwona kuti akumananga ndi masuzgu ndipu akhumbikanga kuŵapaska chilindizga. Mazuŵa nganu napu, ŵanthu akumana ndi masuzgu ndipu akhumbika kuŵapaska chilindizga chinanga kuti angawoneka kuti mbakukondwa ndipuso akhorwa ndi umoyu. Yiwu ŵe nge mbereri za kulanda zo zilivi mliska wakuzilongozga. Wakutumika Paulo wangukamba kuti ŵanthu nge ŵenaŵa, atimuziŵa cha Chiuta ndipuso alivi chilindizga. (Aefe. 2:12) Yiwu atenda pa ‘msewu ukulu wo ulongozge ku pharanyiku.’ (Mate. 7:13) Asani tiŵanaŵaniya mo ŵanthu akhumbikiya kuziŵa Chiuta muchigaŵa chidu, chanju kweniso lisungu vititichiska kuti tiŵawovyi. Ndipu nthowa yamampha ukongwa yakuŵawovye, nkhwamba nawu sambiru la Bayibolu.
9. Mwakukoliyana ndi Afilipi 2:13, kumbi Yehova wangakuwovyani wuli?
9 Panyaki muchita mantha kwambisa sambiru la Bayibolu chifukwa chakuti muziŵa kuti pakhumbikengi nyengu yinandi pa kunozgeke kweniso kuchitiska sambiru. Asani ve viyo ndi yimwi, mbwenu mukambiyeni Yehova mo muvwiya. Mupempheni kuti wakuwovyeni kuti musaniyi kweniso kuchitiska sambiru la Bayibolu. (Ŵerengani Afilipi 2:13.) Wakutumika Yohane watitisimikiziya kuti Chiuta wamuka mapempheru ngakukoliyana ndi khumbu Laki. (1 Yoha. 5:14, 15) Mwaviyo, Yehova wakuwovyeningi kuti mukhumbisiskengi kusambiza ŵanthu.
MO TINGAMALIYANA NDI MASUZGU NGANYAKI
10-11. Kumbi ndi vinthu wuli vo vingatitondekesa kuchitiska sambiru la Bayibolu?
10 Tiŵikapu mtima pa ntchitu ya kusambiza chinanga kuti tikumana ndi masuzgu ngo ngangachitiska kuti titondekengi kuchita vinandi pa ntchitu yakovya ŵanthu kuja akusambira. Tiyeni tikambiskani nganyaki mwa masuzgu ngenanga ndipuso tiwoni mo tingamaliyana nangu.
11 Tingatondeka kuchita vinandi chifukwa cha mo vinthu viliri pa umoyu widu. Mwakuyeruzgiyapu, apharazgi anyaki mbakukota pamwenga kuti atamatama. Kumbi ndimu vinthu viliri ndi yimwi? Asani ndimu viliri, tiyeni tiwoni vo tasambira pa nyengu ya mulili wa COVID-19. Tasambira kuti tingachitiska masambiru nga Bayibolu mwakugwiriskiya ntchitu foni pamwenga vipangizu vinyaki va mazuŵa nganu. Mwaviyo, mungayambisa pamwenga kuchitiska sambiru la Bayibolu mwe ku nyumba kwinu. Ndipu venivi vakovya so mu nthowa yinyaki. Anyaki angayanja kusambira Bayibolu kweni asanirika cha pa nyengu yo kanandi mupharazga nyumba ndi nyumba. Kweni panyaki angasanirika ndi mlenjilenji pamwenga usiku. Kumbi mungasambira ndi ŵanthu ŵenaŵa pa nyengu yeniyi? Yesu wangusambiza Nikodimu ndi usiku, nyengu yeniyi ndiyu yenga yakwenere kwaku Nikodimu.—Yoha. 3:1, 2.
12. Kumbi ndi fundu nizi zo zingatiwovya kuti tije asambizi alusu?
12 Kujikayikiya kuti tilivi lusu lakuchitiska sambiru la Bayibolu. Panyaki tingaŵanaŵana kuti tikhumbika kuziŵa dankha vinandi pamwenga kuja ndi lusu techendayambi kusambira ndi munthu. Asani ndivu muŵanaŵana, wonani fundu zitatu zo zingakuwovyani kuti muleki kujikayikiya. Fundu yakwamba njakuti Yehova watikuwonani kuti mwe akwenere kusambiza ŵanthu. (2 Akori. 3:5) Fundu yachiŵi, Yesu yo we ndi ‘mazaza ngosi kuchanya ndi pacharu chapasi,’ wakukupaskani mazaza kuti musambizengi ŵanthu. (Mate. 28:18) Ndipu fundu yachitatu, muthembengi anyinu kuti akuwovyeni. Yesu wathembanga vo Awisi angumusambiza kuti wazikambi ndipu namwiso mungathemba Yehova. (Yoha. 8:28; 12:49) Chinthu chinyaki cho mungachita nkhufumba wakuwonere kagulu ka uteŵeti winu, mpayiniya walusu kweniso mupharazgi walusu kuti akuwovyeni kwambisa kweniso kuchitiska sambiru la Bayibolu. Ndipu chinyaki so cho chingakuwovyani kuti muje musambizi wamampha, nkhulutiya limoza ndi apharazgi ŵenaŵa ku masambiru ngawu nga Bayibolu.
13. Ntchifukwa wuli tikhumbika kugwiriskiya ntchitu nthowa zasonu pakuchitiska sambiru la Bayibolu?
13 Tingasuzgika kugwiriskiya ntchitu nthowa zasonu kweniso vidya vasonu va kupharazgiya. Sonu tikusintha mo tachitiskiyanga masambiru nga Bayibolu. Buku lo tigwiriskiya ntchitu pakusambiza lakuti, Kondwani ndi Umoyu Kwamuyaya!, likhumba kuti tinozekiyengi kweniso kuchitiska sambiru mwakupambana ndi mo tachitiskiyanga kali. Tiŵerenga ndimi zimanavi ndipu timaliya nyengu yinandi pa kukambiskana ndi munthu yo tisambira nayu. Asani tisambiza, tigwiriskiya ntchitu mavidiyo nganandi, vinthu va pa webusayiti yidu kweniso JW Library®. Asani vitikusuzgani kugwiriskiya ntchitu vinthu venivi, mbwenu pemphani munthu munyaki kuti wakusambizeni. Kanandi taŵanthu tisuzgika kuleka vinthu vo tikuziŵiliya. Ntchipusu cha kusintha ndi kwamba kugwiriskiya ntchitu nthowa zasonu pakuchita vinthu. Kweni ndi chovyu chakutuliya kwaku Yehova kweniso ku ŵanthu anyaki, musuzgikengi cha kusintha ndipu mukondwengi asani musambira ndi ŵanthu. Mpayiniya munyaki wangukamba kuti, nthowa yeniyi yakusambiziya “njakukondwesa ku munthu yo wasambira Bayibolu kweniso ku msambizi.”
14. Kumbi titenere kukumbukanji asani tipharazga kuchigaŵa cho nkhwakusuzga kwambisa masambiru nga Bayibolu, nanga lemba la 1 Akorinto 3:6, 7, lititichiska wuli?
14 Tingapharazga kuchigaŵa ko nkhwakusuzga kwambisa masambiru nga Bayibolu. Ŵanthu angakhumba cha kuvwisiya uthenga widu ndipu anyaki angatisuska. Kumbi ntchinthu wuli chingatiwovya kuja ndi maŵanaŵanu ngakwenere muchigaŵa chaviyo? Kumbukani kuti vinthu vingasintha mwaliŵiliŵi pa umoyu wa ŵanthu mucharu chakusuzga ichi ndipu ŵanthu wo nyengu yinyaki akhumbanga cha kuvwisiya uthenga widu, angaziŵa kuti akhumbika kulongozgeka ndi Chiuta pa umoyu wawu. (Mate. 5:3) Ndipu ŵanthu anyaki wo kuvuli uku akananga mabuku ngidu, angazomera kusambira Bayibolu. Tiziŵa so kuti Yehova ndiyu Mweneku wa ntchitu yakuvuna. (Mate. 9:38) Iyu wakhumba kuti tilutirizgi kupanda ndi kudiriya, kweni Iyu ndiyu wakuzga. (1 Akori. 3:6, 7) Ndipu vakuchiska kuziŵa kuti chinanga kuti pasonu panu tingaŵa kuti tichitiska sambiru la Bayibolu cha, kweni Yehova watititumbika chifukwa cha unandi wa ŵanthu wo taŵapaska mabuku cha pamwenga wo tisambira nawu Bayibolu, kweni iyu watititumbika chifukwa cha phamphu lidu! *
SANIYANI LIKONDWA CHIFUKWA CHA KOVYA ŴANTHU KUJA AKUSAMBIRA AKU YESU
Wonani mo ntchitu yakupharazga kweniso kusambiza ŵanthu yingawovye munthu (Wonani ndimi 15-17) *
15. Kumbi Yehova watuvwa wuli asani wawona kuti munthu munyaki wayamba kusambira Bayibolu ndipu wagwiriskiya ntchitu vo wasambira?
15 Yehova wakondwa asani munthu wasambira uneneska wa mu Bayibolu ndipu pavuli paki, nayu wasambiza ŵanthu anyaki. (Nthanthi 23:15, 16) Yehova wakondwa ukongwa asani wawona vo vichitika mazuŵa nganu pa ntchitu yakupharazga ndi kusambiza. Mwakuyeruzgiyapu, mu chaka cha uteŵeti cha 2020, chinanga kuti pacharu chapasi penga mulili, tinguchitiska masambiru nga Bayibolu ngakukwana, 7,705,765, vo vinguwovya ŵanthu 241,994 kuti ajipereki kwaku Yehova ndi kubatizika. Akusambira asonu ŵenaŵa, nawu achitiskengi masambiru nga Bayibolu ndipu awovyengi ŵanthu anandi kuja akusambira aku Yesu. (Luka 6:40) Tikayika cha kuti tikondwesa Yehova asani tigwiraku ntchitu ya kovya ŵanthu kuja akusambira.
16. Kumbi tikhumbika kuja ndi chilatu wuli?
16 Kovya ŵanthu kuja akusambira aku Yesu nkhwakusuzga, kweni mwakuwovyeka ndi Yehova tingagwiraku ntchitu yakusambiza asonu kuti ayanjengi Awusefwi akuchanya. Kumbi tingaja ndi chilatu chakwambisa kweniso kuchitiskaku sambiru limoza la Bayibolu? Tingazizwa kuwona vo vingachitika asani tingayesesa kupempha munthu weyosi yo tingakumana nayu kuti tisambirengi nayu. Tisimikiza kuti Yehova walekengi cha kutumbika phamphu lidu.
17. Kumbi ndi vinthu wuli vo vingachitika asani mungayamba kuchitiska sambiru la Bayibolu?
17 Ndi mwaŵi ukulu ukongwa kupharazgiya ŵanthu kweniso kuŵasambiza uneneska. Ntchitu yeniyi ndiyu yititiwovya kuti tijengi ndi likondwa chayilu. Wakutumika Paulo yo wangovya ŵanthu anandi a ku Atesalonika kuja akusambira wangukonkhoska mo wavwiyanga ndipu wangukamba kuti: “Kumbi chilindizga chidu, likondwa lidu pamwenga chisoti chidu chakumalikiya pa masu pa Ambuya Yesu pa nyengu ya kuŵapu kwawu, ndi vinthu wuli? Asi ndimwi? Yimwi ndimwi nadi unkhankhu widu ndi likondwa lidu.” (1 Ate. 2:19, 20; Machi. 17:1-4) Ndimu so ŵanthu anandi avwiya mazuŵa nganu. Mwakuyeruzgiyapu, mzichi munyaki zina laki Stéphanie yo limoza ndi mulumu waki awovya ŵanthu anandi kuti abatiziki wangukamba kuti: “Vakukondwesa ukongwa kovya ŵanthu kujipereka kwaku Yehova.”
SUMU 57 Tipharazgiya Ŵanthu a Mitundu Yosi
^ ndimi 5 Yehova watipaska mwaŵi wakuti tipharazgiyengi ŵanthu kweniso kuŵasambiza kuti asungengi vinthu vosi vo Yesu wakulamula. Kumbi ndi vinthu wuli vo vititichiska kuti tisambizengi ŵanthu? Kumbi ndi masuzgu nanga ngo tikumana nangu pa ntchitu yakusambiza ndi kovya ŵanthu kuti aje akusambira? Nanga tingachita wuli kuti timalani ndi masuzgu ngenanga? Nkhani iyi yimukengi mafumbu ngenanga.
^ ndimi 14 Kuti muziŵi vinandi vakukwaskana ndi mo weyosi mumpingu wangawovye pa ntchitu yakusambiza ŵanthu kuti aje akusambira, wonani nkhani ya mutu wakuti, “Weyosi mu Mpingu Wangawovya Kuti wo Asambira Bayibolu Abatiziki,” yo ye mu Chigongwi cha Alinda chakusambira cha March 2021.
^ ndimi 53 CHITHUZI: Wonani mo sambiru la Bayibolu lingawovye kuti munthu wasinthi umoyu waki: Pakwamba munthu watijiwona kuti ngwambula kukhumbika ndipu watimuziŵa cha Yehova. Pavuli paki, Akaboni akumana nayu achipharazga ndipu wazomera kusambira Bayibolu. Vo iyu wasambira vitimuwovya kuti wajipereki kwaku Yehova kweniso kubatizika. Nayu watamba kugwiraku ntchitu yakovya ŵanthu kuti aje akusambira. Ndipu pakumaliya, wosi akondwa ndi umoyu mu Paradayisu.
