1-2. Ntchifukwa wuli Yehova wangujula nthowa kuti isi tije mubanja laki, ndipu wanguchita wuli venivi?

YEHOVA wakutisankha kuti tije mubanja la ateŵeti ŵaki. Uwu ndi mwaŵi ukulu ukongwa! Mubanja ili, mwe ŵanthu wo akujipereka kwaku Chiuta kweniso wo ŵe ndi chivwanu mu sembi ya Mwana waki. Banja lidu ndalikongwa. Te ndi umoyu wamampha sonu ndipu kunthazi tilindizga kuzija ndi umoyu wambula kumala kuchanya pamwenga mu Paradayisu pacharu chapasi.

² Chifukwa chakuti Yehova watitiyanja, wangunozga nthowa kuti isi tije ŵana ŵaki chinanga kuti chenga chipusu cha kuti wachiti viyo. (Yoha. 3:16) ‘Tikugulika ndi mtengu’ ukulu. (1 Akori. 6:20) Kuziya mu sembi yaku Yesu, Yehova wakuchitiska kuti tije nayu pa ubwezi. Te ndi mwaŵi wakudana Munthu mura ukongwa kuchanya ndi pacharu chapasi kuti Ada. Ndipu nge mo tinguwone mu nkhani yajumpha, Yehova Mbada amampha ukongwa.

3. Asani tiŵanaŵaniya vinthu vamampha vo Yehova watitichitiya, kumbi tingajifumba fumbu wuli? (Wonani bokosi lakuti “ Kumbi Yehova Watinditoliyaku Kanthu?”)

³ Nge mo wanguchitiya munthu munyaki yo wangulembaku Bayibolu, nasi tingafumba kuti: “Kumbi ndimuweziyengenji Yehova pa vamampha vosi vo iyu wandichitiya?” (Sumu 116:12) Kwamuka nkhwakuti tingaŵaweze cha Ada ŵidu akuchanya. Kweni chifukwa chakuti atitiyanja, nasi titiŵayanja. Wakutumika Yohane wangulemba kuti: “Te ndi chanju chifukwa iyu ndiyu wangwamba kutiyanja.” (1 Yoha. 4:19) Kumbi tingalongo wuli kuti titiŵayanja Ada ŵidu akuchanya?

4. Mwakukoliyana ndi Yakobe 4:8, ntchifukwa wuli tikhumbika kuyesesa kundere kufupi ndi Yehova?

⁴ Yehova wakhumba kuti tindere kufupi ndi iyu kweniso kuti  tikambiskanengi nayu. (Ŵerengani Yakobe 4:8.) Iyu watitipempha kuti ‘tifwiyengepu kupemphera,’ ndipu nyengu zosi wavwisiya mapempheru ngidu. (Aro. 12:12) Yehova watangwanika ukongwa cha mpaka kutondeka kuvwisiya mapempheru ngidu ndipu wavuka nangu cha. Isi tivwisiya kwaku iyu asani tiŵerenga Bayibolu ndi mabuku ngo ngatitiwovya kuti tilivwisengi. Tivwisiya so kwaku iyu asani tivwisiya ukongwa pa maunganu. Apapi ndi ŵana akoliyana ukongwa asani akambiskana kaŵikaŵi. Mwakuyanana waka, asani nasi tikambiskana kaŵikaŵi ndi Yehova, tiŵengi nayu pa ubwezi wakukho.

5. Kumbi tingachita wuli kuti Yehova wavwengi mapempheru ngidu?

⁵ Kumbi mupemphera wuli kwaku Chiuta? Yehova wakhumba kuti timukambiyengi vosi vo ve mumtima widu. (Sumu 62:8) Tingachita umampha kujifumba kuti: ‘Kumbi ndipemphera mwakuthaŵiliya, ndichita kulemba, kuloŵeza waka, pamwenga ndipemphera kutuliya pasi pamtima?’ Tikayika cha kuti mutimuyanja ukongwa Yehova ndipu mukhumba cha kuti ubwezi winu ndi iyu umali. Kuti muchiti viyo, mutenere kulongoro nayu kaŵikaŵi. Mumukambiyengi vakukhosi kwinu. Mumukambiyengi vinthu vo mukondwa navu kweniso vo vitikufipiskani mtima. Ndipu mungakayikanga cha kuti Yehova wakuwovyeningi asani mungamupempha.

6. Kumbi titenere kuchitanji kuti ubwezi widu ndi Ada ŵidu akuchanya uleki kumala?

⁶ Kuti ubwezi widu ndi Ada ŵidu akuchanya uleki kumala, titenere kuŵa ndi mtima wakuwonga nyengu zosi. Nasi tikoliyana ndi yo wangulembaku buku la Sumu yo wangukamba kuti: “Mwachita vinthu vinandi ukongwa, Yimwi Yehova Chiuta wangu, mwachita ntchitu zakuziziswa kweniso pe vinandi vo mutitiŵanaŵaniya. Palivi yo wangayanana namwi; asani ndingayesa kukamba pamwenga kuvikonkhoska, viŵengi vinandi ukongwa ndipu nditondekengi kuvikonkhoska!” (Sumu 40:5) Titimuwonga Yehova mumtima pe cha kweni tilongo kuti titimuwonga kuziya mu vo tikamba ndi kuchita. Venivi vilongo kuti te akupambana ndi ŵanthu anandi mazuŵa nganu. Ŵanthu anandi mazuŵa nganu awonga cha vosi vo Chiuta watiŵachitiya. Ndipu chinthu chimoza cho chilongo kuti tija “mu mazuŵa ngakumaliya,” ntchakuti ŵanthu mbambula kuwonga. (2 Timo. 3:1, 2) Tikhumbika cha kutoliyaku jalidu lenili!

7. Kumbi Yehova wakhumba kuti tichitengenji ndipu ntchifukwa wuli?

⁷ Apapi akhumba cha kuti ŵana ŵawu apindanengi kweni akhumba kuti akoliyanengi. Mwakuyanana waka, Yehova nayu wakhumba kuti ateŵeti ŵaki wosi akoliyanengi. Ndipu ŵanthu aziŵa kuti te Akhristu auneneska asani titanjana. (Yoha. 13:35) Nasi tikoliyana ndi vo wangukamba yo wangulembaku buku la Sumu. Iyu wanguti: “Ntchinthu chamampha ukongwa kweniso chakukondwesa kuti abali aje pamoza mwakukoliyana!” (Sumu 133:1) Asani titanja abali ndi azichi ŵidu, tilongo kuti titanja Yehova. (1 Yoha. 4:20) Vakukondweska ukongwa kuja mubanja la abali ndi azichi wo ‘achitiyana lisungu ndi kuvwiyana chitima’!​—Aefe. 4:32.

8. Mwakukoliyana ndi 1 Yohane 5:3, kambani chifukwa chikulu cho tivwiya Yehova.

⁸ Yehova wakhumba kuti ŵana avwiyengi apapi ŵawu ndipuso wakhumba kuti tosi timuvwiyengi. (Aefe. 6:1) Iyu ngwakwenere kumuvwiya chifukwa ndi Mlengi widu, watitipaska vakukhumbika pa umoyu kweniso ngwazeru kuluska mpapi weyosi. Kweni chifukwa chikulu cho tivwiya Yehova ntchakuti titimuyanja. (Ŵerengani 1 Yohane 5:3.) Chinanga kuti pe  vifukwa vinandi vo tikhumbikiya kuvwiya Yehova, kweni wachita kutichichizga cha. Yehova wakutipaska wanangwa wakusankha. Mwaviyo, wakondwa asani tasankha kumuvwiya chifukwa chakuti titimuyanja.

9-10. Ntchifukwa wuli kuziŵa ndi kuvwiya marangu ngaku Chiuta nkhwakukhumbika?

⁹ Apapi akhumba cha kuti ŵana ŵawu akumanengi ndi masuzgu. Ndichu chifukwa chaki atiŵapaska marangu kuti ngaŵavikiliyengi. Asani ŵana avwiya marangu ngenanga, alongo kuti atiŵagomezga apapi ŵawu kweniso atiŵatumbika. Mwaviyo, nkhwakukhumbika ukongwa kuziŵa ndi kuvwiya marangu nga Ada ŵidu akuchanya. Asani tichita viyo, tilongo kuti titanja Yehova ndipuso titimutumbika ndipu tiyanduwa ndisi taŵeni. (Yesa. 48:17, 18) Kweni ŵanthu wo akana Yehova ndi fundu zaki atijipweteka ŵija.​—Aga. 6:7, 8.

¹⁰ Asani tichita vo vikondweska Yehova, titijivikiliya ku vinthu vo vingananga liŵavu lidu, vingatiguŵisa pamwenga vo vingananga ubwezi widu ndi iyu. Yehova watitikhumbiya vamampha. Mzichi Aurora yo waja ku United States wangukamba kuti: “Ndiziŵa kuti vinthu vitenda umampha ukongwa asani munthu wavwiya Yehova.” Uwu mbuneneska nadi. Kumbi yimwi mwayanduwa wuli chifukwa chakuvwiya marangu ngaku Yehova?

11. Kumbi pempheru lititiwovya wuli?

¹¹ Pempheru lititiwovya kuti tivwiyengi chinanga mphanyengu yo nkhwakusuzga kuchita viyo. Nyengu zinyaki kutuŵa kwakusuzga kuvwiya Yehova chifukwa chakuti te akubuda.  Kweni nyengu zosi tikhumbika kufwiyapu kuti timuvwiyengi. Munthu munyaki yo wangulembaku buku la Sumu, wangupempha Chiuta kuti: “Ndipaskeni mtima wakukhumbisiska kukuvwiyani.” (Sumu 51:12) Denise yo wachita upayiniya wanyengu zosi, wangukamba kuti: “Asani ndiwona kuti vitindisuzga kuvwiya dangu linyaki laku Yehova, ndipemphera kuti wandipaski nthazi zakuchitiya cho ntchamampha.” Tikayika cha kuti nyengu zosi Yehova wamuka mapempheru ngaviyo.​—Luka 11:9-13.

12. Mwakukoliyana ndi Aefeso 5:1, kumbi titenere kuchitanji?

¹² Ŵerengani Aefeso 5:1. Nge “ŵana akwanjiwa” aku Yehova, tichita vosi vo tingafiska kuti timuyezgengi. Titimuyezga asani titanja anyidu, titiŵalenge lisungu kweniso asani titiŵagowoke. Asani ŵanthu wo aleka kuziŵa Chiuta awona nkharu yidu yamampha, achiskika kuti aziŵi vinandi vakukwaskana ndi iyu. (1 Petu. 2:12) Apapi Achikhristu atenere kuchita vinthu ndi ŵana ŵawu nge mo Yehova wachitiya nasi. Asani achitengi viyo, ŵana ŵawu angakhumba kuŵa pa ubwezi ndi Ada ŵidu achanju pakuŵija.

13. Kumbi titenere kuchitanji kuti tije ndi chiganga?

¹³ Kanandi ŵana amalika ndi awusewu ndipu akondwa kukamba vaku yiwu. Mwakuyanana waka, nasi timalika ndi Ada ŵidu a Yehova, ndipu tikhumba kuti anyidu aŵaziŵi. Mumtima mwidu, tituvwa nge mo Fumu Davidi yinguvwiya. Iyu yingukamba kuti: “Ndijiŵikengemu  chifukwa chaku Yehova.” (Sumu 34:2) Kweni wuli asani tichita mantha? Kumbi tingachita wuli kuti tije ndi chiganga? Tingaŵa ndi chiganga asani tiŵanaŵaniya mo Yehova wakondwe ndipuso mo anyidu angayanduliya asani asambira vakukwaskana ndi iyu. Yehova wangatiwovya kuti tije ndi chiganga. Iyu wanguwovya Akhristu a mu nyengu ya akutumika kuti aje ndi chiganga ndipu nasi watiwovyengi.​—1 Ate. 2:2.

14. Ntchifukwa wuli ntchitu yakupharazga njakukhumbika?

¹⁴ Yehova walivi sankhu ndipu wakondwa asani wawona kuti titanja anyidu, chinanga angaŵa kuti tipambana nawu mtundu. (Machi. 10:34, 35) Nthowa yamampha ukongwa yo tingalongore kuti titanja anyidu nkhuŵapharazgiya uthenga wamampha. (Mate. 28:19, 20) Kumbi ntchitu iyi yitovya wuli? Ŵanthu wo avwisiya uthenga widu angasintha umoyu wawu sonu ndipu kunthazi angazilonde umoyu wamuyaya.​—1 Timo. 4:16.

15-16. Kumbi te ndi vifukwa wuli vakukondwe?

¹⁵ Yehova Mbada achanju ndipu akhumba kuti banja lawu losi likondwengi. (Yesa. 65:14) Pe vifukwa vinandi vo tingajaliya ndi likondwa sonu chinanga kuti tikumana ndi masuzgu. Mwakuyeruzgiyapu, tisimikiza kuti Ada ŵidu akuchanya atitiyanja ukongwa. Kweniso titiwuziŵa umampha uneneska wa mu Mazu ngaku Chiuta. (Yere. 15:16) Kusazgiyapu yapa, te mugulu lapade ukongwa lo ŵanthu ŵaki atanjana ndipuso atanja Yehova ndi marangu ngaki.​—Sumu 106:4, 5.

¹⁶ Tingaŵa ndi likondwa lambula kumala chifukwa tisimikiza kuti kunthazi tazamuja ndi umoyu wamampha ukongwa. Tiziŵa kuti pambula kuswera yapa, Yehova wazamutuzgapu ŵanthu wosi aheni ndipu wazamugwiriskiya ntchitu Ufumu waki kunozga charu chapasi kuti chizije Paradayisu. Ndipuso tilindizga kuti ŵanthu wo akutayika azamuyuka ndi kukumana so ndi abali ŵawu. (Yoha. 5:28, 29) Venivi vazamukuŵa vakukondwesa ukongwa! Ndipu chakuzirwa ukongwa ntchakuti, tisimikiza kuti pambula kuswera yapa, weyosi kuchanya ndi panu pasi wazamutumbika, kuthamika ndi kusopa Ada ŵidu akuchanya nge mo akhumbiya.