Yesu wangusambira mijalidu yo pavuli paki yingumuwovya kuja chakuwoniyapu chamampha ukongwa cha munthu yo wagwiriya ntchitu limoza ndi anyaki. Kumbi tingayanduwa wuli ndi chakuwoniyapu chaku Yesu? Asani tingasambira chakuwoniyapu chaki, tingaziŵa fundu zitatu zo zingatiwovya kuti tigwirengi umampha ntchitu ndi anyidu. Fundu zenizi zitiwovyengi kuti tikoliyanengi ukongwa ndi anyidu.

Munthu yo wagwira umampha ntchitu limoza ndi anyaki yo ngwakujiyuyuwa, wawona kuti anyaki mbakukhumbika ndipuso wachita cha vinthu vo vingachitiska kuti anyaki aŵanaŵaniyengi vaku iyu pe. Jalidu lakujiyuyuwa ndilu Yesu wangusambira kwa Awisi. Chinanga kuti ndi Yehova pe yo ngwakwenere kudanika kuti Mlengi, kweni iyu wanguchitiska kuti ŵanthu aziŵi ntchitu yo Mwana waki wangugwiriya nayu limoza. Tiziŵa venivi chifukwa Chiuta wangukamba kuti: “Tiyeni tipangi munthu mu chikozgu chidu.” (Gene. 1:26) Yapa, Yesu watenere kuti wanguziŵa kuti Yehova ngwakujiyuyuwa ukongwa.—Salimo 18:35.

Pa nyengu yo Yesu wenga pacharu chapasi, wangulongo kuti wenga wakujiyuyuwa. Ndipu asani ŵanthu atimuthamika chifukwa cha vo wachitanga, iyu wathamikanga Yo ngwakwenere kuthamikika. (Mariko 10:17, 18; Yoha. 7:15, 16) Yesu wagwiranga ntchitu mwachimangu limoza ndi akusambira ŵaki ndipu waŵawonanga nge mabwezi ngaki, nge akapolu cha. (Yoha. 15:15) Iyu wangufika chinanga  mphakuŵasambisa maphazi ngawu kuti waŵasambizi kujiyuyuwa. (Yoha. 13:5, 12-14) Nasi tikhumbika kutumbika ŵanthu wo tigwiriya nawu ntchitu limoza mumalu mwakuŵika vakukhumba vidu pakwamba. Asani ‘tilongorana ulemu’ kweniso tifipa mtima cha kuti walumbikengi ndiyani, tingachita vinandi.—Aro. 12:10.

Munthu wakujiyuyuwa waziŵa so kuti vinthu “vifiskika asani pe ŵanthu anandi akupereka ulongozgi.” (Nthanthi 15:22) Kwali te ndi malusu wuli pamwenga tiziŵa vinthu vinandi wuli, titenere kukumbuka kuti palivi munthu yo waziŵa vinthu vosi. Chinanga ndi Yesu waziŵanga kuti penga vinthu vinyaki vo waviziŵanga cha. (Mate. 24:36) Iyu wakondwanga so ndi vinthu vo akusambira ŵaki ambula kufikapu aziŵanga pamwenga kuŵanaŵana. (Mate. 16:13-16) Ndichu chifukwa chaki ŵanthu wo agwiriyanga nayu ntchitu limoza afwatukanga nayu! Mwakuyanana ŵaka, asani mwakujiyuyuwa tiziŵa kuti pe vinthu vinyaki vo tingafiska cha kuchita kweniso tizomereza ŵanthu anyaki kuti akambepu maŵanaŵanu ngawu, vitovya kuti tijengi nawu mwachimangu, ndipu tosi pamoza vinthu ‘vingafiskika.’

Ŵara ndiwu akhumbika ukongwa kuyezga Yesu pa nkhani yakujiyuyuwa asani agwiriya ntchitu limoza. Yiwu akhumbika kukumbuka kuti mzimu wakupaturika, ungawovya mura weyosi kuti wakambi chinthu chinyaki cho chingawovya kuti asankhi umampha vinthu. Asani pa maunganu ngawu, ŵara atesesa kuti mura weyosi wafwatukengi kukambapu maŵanaŵanu ngaki, wosi pamoza angasankha vinthu vo vingawovya mpingu wosi.

Munthu yo wagwira ntchitu umampha ndi anyaki, wangangamiya fundu zaki pe cha. Iyu waja wakoloŵa. Yesu wenga ndi mwaŵi wakuwona kuti Awisi mbakoloŵa. Mwakuyeruzgiyapu, Yehova wangutuma Yesu kuti waziwombo ŵanthu ku nyifwa, chilangu cho yiwu akhumbikiyanga.—Yoh 3:16.

Yesu wachitanga vinthu mwakoloŵa asani mphakwenere kuchita viyo. Kumbukani mo iyu wanguwovye munthukazi wa ku Fonike, chinanga kuti wangutumika ku nyumba yaku Isirayeli. (Mate. 15:22-28) Ndipuso chifukwa chakuti iyu wenga wakoloŵa, waziŵanga kuti akusambira ŵaki angafiska cha kuchita vinthu vinyaki. Mubwezi waki Peturo wati wamukana pagulu la ŵanthu, Yesu wenga wakunozgeka kumugowoke. Pavuli paki, Yesu wangumupaska udindu wakuzirwa Peturo. (Luka 22:32; Yoha. 21:17; Machi. 2:14; 8:14-17; 10:44, 45) Chakuwoniyapu chaku Yesu, chilongore limu kuti tikhumbika kulongo kuti “ŵanthu wosi aziŵi kuti [te] akoloŵa.”—Afi. 4:5.

 Kuja akoloŵa, kungatiwovya so kuti tileki kusuzgika kugwira ntchitu limoza ndi ŵanthu a mitundu yakupambanapambana. Yesu wachitanga nawu vinthu mwakwenere ŵanthu wo waŵanga nawu pafupi, mwakuti arwani ŵaki wo amuchitiyanga sanji, angumumba mulandu kuti “ndi munyawu wa akusonkhesa msonkhu ndi akubuda” wo avwisiyanga uthenga waki. (Mate. 11:19) Mwakuyanana ndi Yesu, kumbi nasi tingagwira nawu ntchitu umampha ŵanthu wo apambana nasi? Mubali Louis yo wanguwoneliyapu dera kweniso kuteŵete pa Beteli ndi ŵanthu a mitundu yakupambanapambana wangukamba kuti: “Ndayesesanga kuyeruzgiya gulu lelosi lo ndagwiranga nalu ntchitu ndi mpanda wo uzengeka ndi mya yakupambanapambana. Pakhumbika phamphu kuti mpanda uwu unyoloki chifukwa chakuti mya njakupambanapambana. Mwaviyo, ndingwesesa kusintha kuti ndigwirengi ntchitu mwachimangu ndi ŵanthu anyaki kuti ntchitu yiyendi umampha.” Wenuwu ndi mtima wamampha ukongwa!

Kumbi mphanyengu niyi po tingalongo kuti tikoliyana ndi abali ndi azichi mumpingu widu? Tingachita venivi asani te limoza ndi abali a mu kagulu kidu ka uteŵeti. Tingapharazgiya limoza ndi apharazgi wo ŵe ndi maudindu ngakupambanapambana ku banja kwawu kuluska isi pamwenga wo tipambana nawu vyaka. Kumbi tingayesesa kuja akoloŵa mwakusintha mo tigwiriskiya ntchitu nyengu yidu mu uteŵeti pamwenga nthowa zakupharazgiya kuti tiŵawovyi kuti akondwengi ukongwa mu uteŵeti?

Munthu yo wagwira ntchitu umampha ndi anyaki watuŵa wakunozgeka ‘kugaŵana nawu.’ (1 Timo. 6:18) Yesu wachigwira ntchitu ndi Awisi, watenere kuti wawonanga kuti Yehova wachitanga vinthu mwambula kubisa. Yehova “wachipanga kuchanya” Yesu ‘wengapu’ ndipu wasambiranga kwaku iyu. (Nthanthi 8:27) Pavuli paki wati waza pacharu chapasi, Yesu wakondwanga kukambiyaku akusambira ŵaki ‘vinthu vo wanguvwa’ kwa Awisi. (Yoha. 15:15) Nasi tingayezga Yehova asani tija akunozgeka kukambiyaku anyidu wo tigwira nawu ntchitu vinthu vo tiziŵa. Kukamba uneneska, munthu yo wagwira ntchitu umampha ndi anyaki wabisa cha ulongozgi wakukhumbika pamwenga wakovya ndi chilatu chakuti walamuliyengi anyaki. Iyu wakondwa kukambiyaku anyaki vinthu vamampha vo wasambira.

Tingaŵakambiyaku so mazu ngakuchiska ŵanthu wo tigwira nawu ntchitu. Asani munthu munyaki wawona phamphu lidu ndipu watiwonga kutuliya pasi pa mtima, kumbi tituvwa umampha cha? Yesu wasaniyanga nyengu yakuwonge ŵanthu wo wagwiriyanga nawu ntchitu limoza chifukwa cha vinthu vamampha vo wawonanga mwaku yiwu. (Yeruzgiyani ndi Mateyu 25:19-23; Luka 10:17-20.) Mwakuti wanguŵakambiya kuti azamuchita “ntchitu zikulu kuluska” zo iyu wachitanga. (Yoha. 14:12) Usiku wakuti mawa laki wafwengi, iyu wanguwonga akutumika ŵaki akugomezgeka kuti: “Yimwi ndimwi mwajaliya nani limoza mu mayeseru ngangu.” (Luka 22:28) Aŵanaŵaniyani ŵaka mo mazu ngenanga ngatenere kuti nganguŵachiskiya ndi kuŵawovya kuti achitepu kanthu! Nasi asani tipatuwa nyengu kuti tiwongi ŵanthu wo tigwiriya nawu ntchitu limoza, yiwu angakondwa ukongwa ndipuso panyaki angachita umampha ntchitu yawu.

Mubali munyaki zina laki Kayode wangukamba kuti: “Munthu yo wagwira ntchitu umampha ndi anyaki watenere kuja wakufikapu cha. Kweni watovya kuti wo wagwira nawu ntchitu akondwengi ndipuso kuti ntchitu yiyendengi umampha.” Kumbi ndimu yimwi mulili? Mwalekiyanji kufumba Akhristu anyinu wo mugwiriya nawu ntchitu limoza kuti akukambiyeni mo yiwu atikuwoniyani pa chigaŵa chenichi? Asani yiwu akondwa kugwiriya namwi ntchitu limoza, nge mo akusambira aku Yesu akondwiyanga kugwiriya nayu ntchitu limoza, mungakamba nge mo wakutumika Paulo wangukambiya kuti: “Te antchitu anyinu kuti mukondwengi.”​—2 Akori. 1:24.