KU Africa kwe tivipasu tinyaki to tiwoneka mwakuziziswa ukongwa. Tivipasu teniti tiwoneka nge mfungu ndipu te mgulu la vipasu vo mu chingelezi viziŵika kuti Pollia condensata. Tivipasu iti tiwoneka tabulu, kweni chakuziziswa ntchakuti mukati mulivi timaji tabulu. Sonu ntchinthu wuli cho chichitisa kuti tiwonekengi viyo?

Ŵanaŵaniyani ivi: Mukati mwa tivipasu ta pollia berry mwe tinthu to tiwoneka nge tivingwi ndipu tikupangika nge mo machisa ngajaliya muchibiliti. Muzeri wewosi wa tinthu teniti ukupinjikika ndi mzeri wo we pasi paki. Ivi vichitisa kuti tiwonekengi nge nthakuzunguliya. Tinthu teniti to tiwoneka nge tivingwi nthabulu cha. Chinanga kuti mukati mwa tivipasu ta pollia berry mulivi timaji tabulu, kweni tiwoneka tabulu chifukwa cha mo tivingwi to te mukati mwaki tikuyerekiyana. Tivingwi iti nditu so tichitisa kuti tivipasu iti tiwonekengi nge kuti nthavisulu ndipuso kuti mtundu waki usinthengi asani mwatilazisiya ku lumwi. Chinanga kuti tivipasu ta pollia berry tiwoneka tabulu, kweni asani mwatilazisiya ku lumwi pawoneka so mitundu yinyaki nge girini, pinki pamwenga ntcheti. Mitundu iyi yiwoneka mkatikati nge mo mitundu yiwoneke pamasikilini nga makompyuta.

Chifukwa chakuti mukati mwa tivipasu ta pollia berry mulivi timaji to tichitisa kuti tiwonekengi tabulu, tivipasu iti tilutiriza kuwoneka tabulu chinanga tingaponthoka. Mwakuyeruzgiyapu, tivipasu tinyaki to ŵanthu angutondo vyaka pafupifupi 100 vajumpha, teche kuwoneka takutowa! Ŵanthu wo achita kafukufuku akamba kuti chinanga kuti mukati mwa tivipasu iti musanirika nje pe, kweni tiwoneka takutowa ukongwa mwakuti tikopa tiyuni.

Asayansi agomeza kuti kusambira vo vichitisa kuti tivipasu ta pollia berry tiwonekengi tabulu, vingawovya ŵanthu kuti apangengi vinthu vambula kutuwa utotu ndipuso mapepala ngo ŵanthu anyaki angatondeka kungapanga mwachinyengu.

Kumbi Imwi Muwona Wuli? Kumbi vikuchitika ŵaka vija kuti tivipasu ta pollia berry tiwonekengi tabulu? Pamwenga walipu yo wakutilenga?