Mazu ngenanga ngangukambika ndi akaswiri anyaki akutuliya mu vyaru vakupambanapambana wo angukumana kuti akambiskani vakukwaskana ndi kusintha kwa nyengu. Asani mugomezga kuti kwe Mlengi yo waphwere ŵanthu, ndikuti vo akaswiri yaŵa angukamba vingakukumbusani kuti Chiuta wakupanga charu kuti chijitowesengi chija.

Chinanga kuti ŵanthu ananga ukongwa charu kweni vingachitika cha kuti chiweriyemu chija. Ntchifukwa wuli tigomezga kuti Chiuta wachitengepu kanthu kuti wanozgi charu?

Malemba ngo nge bokosi umu ngatitisimikiziya kuti ŵanthu achinangiyengi limu cha charu ndipu chiŵengepu kwamuyaya.

• Charu chikulengeka ndi Chiuta. “Pakwamba Chiuta wangulenga kuchanya ndi charu chapasi.”—Genezesi 1:1

• Chiuta ndiyu mweneku wa charu. “Charu ndi vinthu vosi vo ve mwenimo vaku Yehova. a”—Salimo 24:1.

• Chiuta wakupanga charu kuti chije kwa muyaya. “Charu chapasi wachijalikiska pamafawundeshoni ngaki; chituzgikengepu cha pamalu ngaki muyaya mpaka muyaya.”—Salimo 104:5

• Chiuta walayizga kuti vinthu vamoyu vilutirizgengi kuŵapu mpaka muyaya. “Pakuti ivi ndivu Yehova wakamba, Mlengi wa kuchanya, . . . wakuchilenga ŵaka cha, kweni wakuchipanga kuti ŵanthu ajengemu.”—Yesaya 45:18

• Chiuta walayizga kuti ŵanthu ajengi kwamuyaya pacharu. “Ŵanthu arunji azamulonde charu chapasi, ndipu azamuja mwenimo kwamuyaya.”—Salimo 37:29

Chiuta wakupanga charu kuti chinganangikanga cha kuti ŵanthu akondwengi ndi umoyu. Bayibolu likukambiya limu kuti Yehova Chiuta wakuŵika nyengu yeniyo wazamutuzgiyapu vinthu viheni vo vinanga charu.—Chivumbuzi 11:18

Bayibolu lilayizga kuti Chiuta wazamusintha charu kuti chije chamampha, paradayisu wakutowa ndipu ‘chamoyu chechosi wazakuchipaska vo chikhumba mpaka kukhorwa.’—Salimo 145:16