KUMBI vitikusuzgani kusambira Bayibolu sabata yeyosi? Kumbi nyengu zinyaki muwona kuti kusambira Bayibolu kutikunozgiyani cha? Kweni ŵanaŵaniyani vinthu vinyaki vo tichita kaŵikaŵi nge kusamba muliŵavu. Kusamba kuto nyengu kweni tituvwa umampha ukongwa asani tasamba. Kusambira Bayibolu naku kungayanana ndi ‘kujitowesa ndi maji mwakugwiriskiya ntchitu mazu’ ko kutitiwovya kuti tivwengi umampha mumtima. (Aefe. 5:26) Tiyeni tikambiskani masachizgu nganyaki ngo ngangakuwovyani:

• Mujengi ndi ndondomeku. Kusambira Bayibolu pakutija ntchimoza mwa “vinthu vakukhumbika ukongwa” vo munthu wakhumbika cha kuvitole saza. (Afi. 1:10) Kuti muyilondongi umampha ndondomeku yinu, mungachita umampha kuyiŵika pamalu ngambula kusuzga kuyiwona nge pa notisibodi pamwenga kuyibatika pachisasa cha firiji. Pamwenga mungathya alamu ya foni yinu kuti yimbengi asani nyengu yakusambiriya ye pafupi kukwana.

• Musankhengi nyengu kweniso nthowa yakusambiriya yo njamampha kwaku yimwi. Kumbi yimwi muwona kuti ntchipusu kusambira kwa nyengu yitali pamwenga kwa nyengu yimanavi? Yimwi mwaŵeni ndimwi muziŵa umampha mo vinthu viliri pa umoyu winu. Mwaviyo, mukhumbika kukumbuka fundu zenizi asani munozga nyengu yakusambiriya. Asani nyengu yakuti musambiriyi yakwana ndipu muwona kuti mugongowa, mungachita umampha kusambira waka kwa maminisi 10 pe. Asani mungasambiraku viyo kwa nyengu yimanavi yeniyi, mungayanduwa ukongwa kuluska kuleke limu. Asani mwayambapu waka kusambira, mungaja ndi mtima wakukhumba kulutirizga.—Afi. 2:13.

• Musankhiyengi limu nkhani zakuti musambiri. Asani pa nyengu yakusambiriya ndipu mupenja vakuti musambiri mbwenu “nyengu yinu muyigwiriskiyengi ntchitu mwakwenere” cha. (Aefe. 5:16) Mungachita umampha kulembe limu nkhani zo mukhumba kusambira. Asani mwe ndi fumbu pa nkhani yinyaki yo mutiyivwisa umampha cha, mungachita umampha kulemba fumbu lo. Ndipu pakumaliya pa sambiru lelosi mungalemba fundu zinyaki zo mukhumba kuti muzizisambiri nyengu yinyaki.

• Jani akunozgeka kusintha. Musinthengi vinthu vinyaki vo ve pa ndondomeku yinu nge unandi wa nyengu yakusambiriya pamwenga nkhani zo mwasankha. Chakukhumbika ukongwa ndi nyengu cha, utali wa nyengu cha pamwenga vinthu vo musambira, kweni kusambira sabata yeyosi.

Kukamba uneneska tiyanduwa ukongwa asani tisambira sabata yeyosi. Tindere kufupi ndi Yehova, tisambira kuchita vinthu mwazeru ndipu tituvwa umampha ukongwa mumtima.—Yoswa 1:8.