Kumbi nyengu zinyaki musuzgika kukumbuka lemba linyaki la mu Bayibolu? Lingaŵa lemba lo litikupembuzgani, lo litikuwovyani kuti muleki kuŵanaŵana vinthu viheni pamwenga lo mukhumba kukambiyaku anyinu. (Salimo 119:​11, 111) Tiyeni tikambiskani fundu zinyaki zo zingakuwovyani kuti mukumbukengi malemba.

• Mugwiriskiyengi ntchitu timatagi to te pa JW Library^®. Mungapanga ka tagi ndi kulembapu kuti “Malemba ngo Nditanja.” Asani muŵerenga Bayibolu pa JW Library ndipu mwaŵerenga lemba lo mukhumba kuti mulikumbukengi, mungaliŵika mu tagi yeniyo.

• Muŵikengi lemba pamalu ngo mungaliwona liŵi. Mulembengi pakapepala lemba lo mukhumba kuti mulikumbukengi ndipu kapepala ko mukaŵikengi pamalu ngakuti mukawonengi kaŵikaŵi. Ŵanthu anyaki atikamata pachimati, penipo anyaki atikamata pafiliji. Anyaki ajambula ŵaka lemba lo mufoni yawu pamwenga pa kompyuta ndipu atiliseva pasikilini ya foni yawu pamwenga pa kompyuta.

• Mupangengi timakadi ndikulembapu lemba. Mungapanga kakadi, lwandi linyaki mungalembepu mazu nga pa vesi lo mupenja kukumbukanga ndipu lwandi linyaki mungalembepu vesi lo. Pavuli paki, wonani lwandi lo mwalemba vesi lo ndipu yesani kukumbuka vo vesi lo likamba pamwenga ŵerengani mazu nga vesi lo mwalemba pakakadi ndi kuyesa kukumbuka kuti ndi vesi wuli.