Tisambira Vakukwaskana ndi Chiuta Kuziya Mwa Achimi
Mu nyengu yakali, Chiuta wagwiriskiyanga ntchitu achimi kuti akambiyi ŵanthu uthenga waki. Kumbi mauthenga ngenanga ngangatiwovya wuli kuti tilonde vitumbiku vaku Chiuta? Tiyeni tikambiskani vo tingasambira kwa achimi atatu akugomezgeka.
ABRAHAMU
Chiuta walivi sankhu ndipu wakhumba kutumbika ŵanthu wosi.
Chiuta wangulayizga mchimi Abrahamu kuti: “Mabanja ngosi nga pacharu chapasi ngazamutumbikika kuziya mwaku yiwi.”—Chiyambo 12:3.
Kumbi tisambiranjipu? Chiuta watitiyanja ukongwa ndipu wakhumba kutumbika ŵanthu wosi wo atimuvwiya mu mabanja ngosi, anthulumi, anthukazi ndipuso ŵana.
MOZESI
Chiuta ngwalisungu ndipu watumbika ŵanthu wosi wo ayesesa kuti amuziŵi.
Chiuta Wanthazizosi wangumupaska nthazi mchimi Mozesi kuti wachitengi vakuziziswa. Chinanga kuti venga viyo, Mozesi wangupempha Yehova kuti: “Ndiziŵiseni nthowa zinu, kuti ndikuziŵeni ndipuso kuti ndilutirizgi kusaniya wezi pa masu pinu.” (Chituwa 33:13) Chiuta wangukondwa ndi vo Mozesi wangupempha ndipu wangumupaska zeru zinandi. Iyu wanguziziŵa nadi nthowa zaku Chiuta ndipuso mijalidu yaki. Mwakuyeruzgiyapu, Mozesi wangusambira kuti Mlengi ndi “Chiuta walisungu kweniso wawezi.”—Chituwa 34:6, 7.
Kumbi tisambiranjipu? Chiuta ngwakunozgeka kutumbika munthu weyosi asani tiyesesa kuti timuziŵi umampha. Kuziya mu Malemba Ngakupaturika, iyu watitikambiya mwakuvwika umampha mo tingamusope kweniso kuti ngwakukhumbisiska kutitumbika.
YESU
Yesu wenga walisungu ndipu wachizganga ŵanthu wo atamanga matenda ngakupambanapambana
Tingasaniya vitumbiku vambula kumala vakutuliya kwaku Chiuta asani tisambira vo Yesu wachitanga ndi kusambiza.
Mu Mazu ngaku Chiuta tingasambira vinthu vinandi vo Yesu wachitanga ndipuso kusambiza. Chiuta wangumupaska nthazi Yesu zakuchitiya vakuziziswa. Mwakuyeruzgiyapu, wanguchizga ŵanthu ambula kuwona, ambula kuvwa, ndipuso akupunduka. Yesu wanguyuska so ŵanthu akufwa. Vo Yesu wanguchita vingulongo mo Chiuta wazamutumbikiya ŵanthu wosi kunthazi. Iyu wangukonkhoska so vo tingachita kuti tizisaniyi vitumbiku venivi. Wangukamba kuti: “Azamusaniya umoyu wamuyaya asani aziŵa yimwi Chiuta yija wauneneska, ndi Yesu Khristu yo mungumutuma.”—Yohane 17:3.
Yesu waŵanaŵaniyanga ŵanthu ndipu waŵachitiyanga lisungu. Venivi vachitiskanga ŵanthu amisinkhu yosi kuti andondiyengi kwaku iyu chifukwa waŵapemphanga mwachanju kuti: “Sambirani kwaku ini chifukwa nde wakuzika kweniso wakujiyuyuwa, ndipu mwazamusisipulika.” (Mateyu 11:29) Mwakupambana ndi ŵanthu a munyengu yaki wo achitiyanga nkhaza anthukazi, Yesu watumbikanga anthukazi ndipuso waŵachitiyanga lisungu.
Kumbi tisambiranjipu? Yesu waŵalongonga chanju chayichu ŵanthu ndipu vo wachitanga vingatiwovya so nasi kuti tichitengi viyo ndi anyidu.
YESU NDI CHIUTA CHA
Malemba Ngakupaturika ngatitikambiya kuti “kwaku isi kwe Chiuta yumoza,” ndipu Yesu Khristu wenga mthenga waku Chiuta. (1 Akorinto 8:6) Yesu wangukonkhoska mwakuvwika umampha kuti Chiuta ndi mura kuphara iyu ndipu Chiuta mwenuyu ndiyu wangumutuma kuti wazi pacharu chapasi.—Yohane 11:41, 42; 14:28. *
^ ndimi 17 Kuti muziŵi vinandi vakukwaskana ndi Yesu Khristu, wonani chigaŵa 8 ndi mukabuku kakuti, Real Faith—Your Key to a Happy Life, ko kasanirika pa webusayiti ya www.jw.org.
