• Yazamusankhika ndi Chiuta. “Ini ndamweni ndaŵika fumu yangu pampandu . . . ini ndikupaskengi mitundu kuti yije chihara chaku. Kweniso ndikupaskengi vigoti va charu kuti vije vaku.”​—Sumu 2:6, 8.

• Yazamuhara ufumu waku Davidi. “Kwaku isi kwawa mwana, isi tapaskika mwana munthulumi . . . Kukuwa kwa ulamuliru waki, kweniso chimangu, vazamumala cha pa mpandu waufumu waku Davidi ndipuso pa ufumu waki kuti wawujalikiski mwanthazi.”​—Yesaya 9:6, 7.

• Yazamuwiya ku Betelehemu. “Yiwi Betelehemu . . . , mwaku yiwi mwazamutuwa wakulamuliya . . . Pakuti ukulu waki wazamufika kuvigoti va charu chapasi.”​—Mika 5:2, 4.

• Ŵanthu azakuyikana ndipu yazamubayika. “Iyu wanguyuyulika ndipu tingumuwona kuti ngwambula ntchitu. . . . Kweni wangugwazika chifukwa cha mphulupulu zidu.”​—Yesaya 53:3, 5.

• Yazamuyuskika kwa akufwa kweniso yazamupaskika udindu ukulu. “Mwazakundisiya mu Dindi cha. Mwazamuzomereza cha kuti wakugomezgeka winu wawoni zenji. . . . Ku janja linu lamaryi kwe likondwa mpaka muyaya.”​—Sumu 16:10, 11.

Mu mbiri yosi ya ŵanthu, ndi munthu yumoza pe yo wafiska mauchimi ngosi ngenanga ngakukwaskana ndi Wakulamuliya wamampha. Munthu mwenuyu ndi Yesu Khristu. Kweniso, mungelu wangukambiya anyina aku Yesu a Mariya kuti: “Chiuta wazakumupaska mpandu waufumu wa awisi a Davidi, . . . ndipu Ufumu waki wazamumala cha.”—Luka 1:31-33.

Yesu wakujapu fumu cha pa nyengu yo wenga pacharu chapasi. Mumalu mwaki, wazamulamuliya ŵanthu pacharu we kuchanya nge Fumu ya Ufumu waku Chiuta. Kumbi ntchifukwa wuli tingakamba kuti Yesu ngwakwenere nadi kulamuliya ŵanthu? Wonani vo Yesu wanguchita pa nyengu yo wenga pacharu chapasi.

•   Yesu waŵanaŵaniyanga ŵanthu. Yesu wawovyanga ŵanthu wosi, anthulumi ndi anthukazi kweniso ŵana ndi arara mwambula kuphwere kanthu za ko atuliyanga ndipuso mo vinthu venge pa umoyu wawu pankhani za chuma. (Mateyu 9:36; Mariko 10:16) Munthu yo wenga ndi makhati wati wamupempha kuti: “Asani mukhumba, munganditowesa,” Yesu wangumuchitiya lisungu ndipu wangumuchizga.​—Mariko 1:40-42.

• Yesu wakutisambiza vo tingachita kuti tikondwesi Chiuta. Iyu wangukamba kuti: “Mungaja cha kapolu waku Chiuta ndipuso kapolu wa Chuma.” Iyu wangukamba so fundu yakukhumbika ukongwa yakuti tichitiyengi anyidu vinthu vo tingakhumba kuti nawu atichitiyi. Yesu wangulongo kuti Chiuta wawona vinthu vo tichita pe cha kweniso waziŵa mo tiŵanaŵaniya ndipuso mo tivwiya. Mwaviyo, kuti tikondwesi Chiuta, tikhumbika kuphwere ndi vo tiŵanaŵana mumtima. (Mateyu 5:28; 6:24; 7:12) Yesu wangukamba so kuti tikhumbika kusambira ndi kuchita vo Chiuta wakhumba kuti tichitengi. Venivi ndivu vingatiwovya kuti tisaniyi likondwa chayilu.​—Luka 11:28.

• Yesu wakutisambiza mo tingayanjiya anyidu. Vo Yesu wakambanga ndi kuchita vaŵafikanga pamtima ukongwa ŵanthu wo amuvwisiyanga. “Chigulu chosi cha ŵanthu chinguzizwa ndi mo wasambiziyanga chifukwa waŵasambizanga nge munthu waudindu.” (Mateyu 7:28, 29) Wanguŵasambiza kuti: “Lutirizgani kwanja arwani ŵinu.” Iyu wangupemphere chinanga ndiwo angumubaya. Wangupemphera kuti: “Ada, agowokiyeni chifukwa aziŵa cha vo achita.”​—Mateyu 5:44; Luka 23:34.

Yesu ngwakwenere nadi kulamuliya charu chosi chifukwa ngwakovya kweniso ngwalisungu. Kweni kumbi wayambengi zukwanji kulamuliya?