NYENGU yinyaki Yesu wangukamba kuti: “Kupaska kuchitiska kuti munthu wakondwengi ukongwa kuluska kulonde.” (Machi. 20:35) Fundu iyi yikwaska so ubwezi widu ndi Yehova. Chifukwa wuli? Yehova wakutipaska vinthu vinandi vo vititiwovya kuti tikondwengi. Kweni tingakondwa ukongwa asani titimupaska vo tenavu. Kumbi Yehova tingamupaska mphasu wuli? Lemba la Nthanthi 3:9 likamba kuti: “Tumbika Yehova ndi vinthu vaku vakuzirwa.” ‘Vinthu vidu vakuzirwa’ visazgapu nyengu, malusu, nthazi ndi katundu yo tenayu. Asani tigwiriskiya ntchitu vinthu venivi pakulutiska panthazi kusopa kwauneneska, ndikuti titimupaska mphasu Yehova. Kuchita viyo, kutovya kuti tikondwengi ukongwa.

Kumbi ntchinthu wuli cho chingatiwovya kuti tileki kusuraku kupaska Yehova vo tenavu? Wakutumika Paulo wangukambiya Akhristu a ku Korinto kuti ‘aŵikengi pamphepeti’ kanthu kanyaki kuti akapaski Yehova. (1 Akori. 16:2) Kumbi mungachita wuli kuti muziŵi nthowa zo mungapereke ndalama muchigaŵa chinu? Wonani bokosi lo le mumphata.

Ndi vyaru vosi cha vo angapereka ndalama kuziya pa intaneti. Chinanga kuti ve viyo, nthowa zinyaki zo tingapereke ndalama zisanirika pa webusayiti yidu. Mu vyaru vinyaki, pa jw.org patuŵa nkhani yo yitovya kumuka mafumbu ngo ŵanthu anandi afumba ngakukwaskana ndi mo angapereke ndalama