Yosefi wanguyuska Mariya kuti wamukambiyi vo akhumbikanga kuchita mwaliŵiliŵi. Mungelu waku Yehova wanguza kwaku Yosefi mu malotu ndi kumukambiya kuti: “Soka, to mwana waku ndi anyina ndipu uthaŵiyi ku Ijipiti, ukaje kweniko mpaka po ndazakukukambiya, chifukwa chakuti Herodi we pafupi kupenja mwana yo kuti wamubayi.”—Mateyu 2:13.

Yosefi, Mariya ndi mwana wawu anguthaŵa usiku wenuwu. Yiwu anguchita venivi pa nyengu yakwenere chifukwa Herodi wanguziŵa kuti akusanda nyenyezi amupusisa. Iyu wanguŵakambiya kuti azimukambiyi ko kwe Yesu, kweni yiwu angumukambiya cha. Ivi vinguchitisa kuti Herodi wakwiyi ukongwa. Chifukwa chakuti wakhumbanga mbwenu kuti Yesu wabayiki, iyu wangulamula kuti abayi ŵana wosi anthulumi akwambiya vyaka viŵi kusikiya pasi. Iyu wangukamba kuti venivi vichitiki ku Betelehemu ndi muvigaŵa vakuzunguliya. Herodi wanguŵatuma kuti akabayi ŵana avyaka venivi mwakukoliyana ndi vo wanguvwa kwa akusanda nyenyezi wo angutuwa Kuvuma.

Venga vakuchitisa chitima ukongwa kuwona ŵana ŵenaŵa achibayika. Tiziŵa cha kuti mbana alinga wo angubayika. Kweni vo tiziŵa vakuti kuliya ndipuso chitenje chikulu cha anyinawu vingufiska uchimi wa m’Bayibolu wo Chiuta wangukambiya mchimi Yeremiya kuti walembi.—Yeremiya 31:15.

Pa nyengu iyi, Yosefi ndi banja laki anguthaŵiya ku Ijipiti ndipu angulutirizga kuja kweniko. Zuŵa linyaki ndi usiku mungelu waku Yehova wanguza so kwaku Yosefi mu malotu. Iyu wangumukambiya kuti: “Soka, to mwana yo ndi anyina ndipu uluti mucharu cha Isirayeli, chifukwa wo akhumbanga kubaya mwana yo akufwa.” (Mateyu 2:20) Mwaviyo, Yosefi wanguwona kuti iyu ndi banja laki akhumbika kuwere ku charu chawu. Ivi vingufiska uchimi unyaki wa m’Bayibolu wo ukamba kuti Mwana waku Chiuta wazamudanika kutuwa mu Ijipiti.—Hoseya 11:1.

Viwoneka kuti Yosefi wakhumbanga kuti iyu ndi banja laki akajengi ku Yudeya, panyaki kufupi ndi tawuni  ya Betelehemu, ko ajanga ŵechendathaŵiyi ku Ijipiti. Kweni wanguvwa kuti Akelawo mwana waku Herodi ndiyu wawusa Yudeya. Chiuta wangumutcheŵesa so Yosefi mu malotu. Mwaviyo, Yosefi ndi banja laki anguserere kunkhondi ndi kuchija mutawuni ya Nazareti, muchigaŵa cha Galileya, ko kwenga kutali ndi likulu la chisopa cha Ayuda ku Yerusalemu. Yesu wangukuliya mutawuni yeniyi ndipu venivi vingufiska uchimi unyaki wakuti: “Wazamudanika kuti Mnazareti.”—Mateyu 2:23.