Yesu wenga weche ku Yerusalemu ndipu penga pa Sabata. Iyu ndi akusambira ŵaki achiyenda mutawuni yeniyi, anguwona munthu munyaki wakupemphesa yo wanguwa wachibulumutiya. Akusambira ŵaki angufumba Yesu kuti: “Rabi, kumbi ndiyani yo wakubuda kuti munthu uyu wawi wachibulumutiya, ndiyu pamwenga apapi ŵaki?”—Yohane 9:2.

Akusambira aku Yesu aziŵanga kuti munthu walivi mzimu wo uja ndi umoyu kumalu nganyaki iyu wechendaweku. Kweni panyaki ajifumbanga asani vingachitika kuti munthu wabudi weche mumoyu mwa anyina. Yesu wanguŵamuka kuti: “Ndi munthu uyu cha pamwenga apapi ŵaki, kweni venga viyo kuti ntchitu zaku Chiuta ziwoneke mwaku iyu.” (Yohane 9:3) Mwaviyo, kuti munthu uyu wawi wachibulumutiya chenga chifukwa chakuti iyu pamwenga apapi ŵaki angunanga chinthu chechosi cha. M’malu mwaki, chifukwa chakuti Adamu wangubuda, ŵanthu wosi abalika akubuda. Venivi vichitiska kuti anyaki awengi akupunduka kweniso achibulumutiya. Pa nyengu iyi, chifukwa chakuti munthu uyu wenga wachibulumutiya, Yesu wangusaniriyapu mwaŵi kuti walongo ntchitu zaku Chiuta, nge mo wanguchitiya nyengu yinyaki kuvuli po wanguchizga ŵanthu wo atamanga.

Yesu wangulongo kuti wakhumbika kugwira mwaliŵi ntchitu yakuchizga ŵanthu. Iyu wanguti: “Ntchitu zaku Yo wakundituma titenere kuzigwira kweche msana, pakuti usiku utuza po kwazamuŵavi munthu wakugwira ntchitu. Penipo ini ndeche mucharu, ndini ukweru wa charu.” (Yohane 9:4, 5) Yesu wangukamba mazu ngenanga chifukwa wanguziŵa kuti kwaja nyengu yimanavi kuti wabayiki. Wati wabayika, wanguja nge kuti waponyeka mumdima chifukwa palivi cho watingi wachitengi we ku masanu. Kweni pa nyengu iyi, chifukwa chakuti wenga weche ndi umoyu, Yesu wenga ukweru wa charu.

Kumbi Yesu watingi wamuchizgengi wuli munthu mwenuyu? Iyu wangufunyiya mata pasi ndipu wangukasa dongu ndi mata ngaki. Ndipu pavuli paki, wanguto dongu lo ndikulinyeteka mumasu nga munthu mwenuyu. Wati wachita venivi wangukambiya munthu yo kuti: “Luta ukasambi muthaŵali la Silowamu.” (Yohane 9:7) Munthu uyu wanguluta nadi. Wati wachita vo Yesu wangumukambiya wangwamba kuwona. Aŵanaŵaniyani mo munthu mwenuyu wangukondwe wati wayamba kuwona kakwamba pa umoyu waki!

Ŵanthu wo ajanga pafupi ndi munthu mwenuyu ndipuso anyaki wo amuziŵanga, anguzizwa ukongwa ŵati awona kuti wayamba kuwona. Yiwu afumbananga kuti: “Asi munthu uyu ndiyu wayanjanga kuja pasi ndi kupemphesa?” Ndipu anyaki akambanga kuti: “Ndiyu.” Kweni anyaki agomezganga cha kuti munthu uyu wayamba kulereska ndipu akambanga kuti: “Awa, wakozgana ŵaka nayu.” Kweni iyu wanguŵamuka kuti: “Ndini.”—Yohane 9:8, 9.

Ŵanthu angumufumba kuti: “Sonu vayenda wuli kuti masu ngaku ngabanuki?” Iyu wanguŵamuka kuti: “Munthu munyaki yo wadanika kuti Yesu wakasa dongu ndi kulinyeteka mumasu ngangu ndipu wandikambiya kuti, ‘Luta kuthaŵali la Silowamu ukasambi.’ Mwaviyo ndinguluta kuchisamba ndipu ndayamba kuwona.” Pavuli paki, yiwu angumufumba so kuti: “We pani munthu mweniyo?” Munthu wakupemphapempha yuwa wanguŵamuka kuti: “Ndiziŵa cha.”—Yohane 9:10-12.

Ŵanthu yaŵa anguto munthu mwenuyu ndi kuluta nayu kwa Afarisi wo akhumbanga kuziŵa kuti wachizgika wuli. Iyu wanguŵakambiya kuti: “Wandinyeteka  dongu lakukasa mumasu, ndasamba ndipu ndayamba kuwona.” Ivi vati vachitika, Afarisi akhumbikanga kukondwe limoza ndi munthu mwenuyu kweni ndivu yiwu anguchita cha. M’malu mwaki, angwamba kunyoza Yesu kuti: “Munthu uyu ngwakutuliya kwaku Chiuta cha, chifukwa wasunga cha Sabata.” Kweni anyaki akambanga kuti: “Kumbi munthu wakubuda, wangachita visimikizu nge ivi?” (Yohane 9:15, 16) Mwaviyo, yiwu angugaŵikana ŵijaŵija.

Chifukwa chakuti angupambana maŵanaŵanu, ŵanthu ŵenaŵa angufumba munthu yo wanguchizgika kuti: “Sonu yiwi utiti wuli vakukwaskana ndi munthu uyu, pakuti wabanuwa masu ngaku?” Munthu mwenuyu wamukayikiyanga cha Yesu ndipu wangumuka kuti: “Ndi mchimi.”—Yohane 9:17.

Ayuda angukana kuzomereza vo munthu mwenuyu wangukamba. Yiwu aŵanaŵananga kuti Yesu wangupangana ndi munthu mwenuyu kuti wapusisengi ŵanthu kuti wayamba kuwona chifukwa chakuti Yesu wamuchizga. Kuti amalisi nkhani yeniyi, yiwu anguŵanaŵana kuti afumbi apapi a munthu mwenuyu asani wenga nadi wachibulumutiya.