Yesu wangusankha akusambira anayi, Peturo, Andireya, Yakobe ndi Yohane kuti aje alovi a ŵanthu. Zuŵa la Sabata lati lakwana, yiwu anguluta kusinagogi munyaki ku Kaperenao ndipu Yesu wangwamba kusambiza musinagogi. Ŵanthu anguzizwa ukongwa ndi mo iyu wasambiziyanga, chifukwa wasambizanga nge munthu wa udindu. Venivi venga vakupambana ndi mo alembi asambiziyanga.

Pa zuŵa la Sabata lenili, ku sinagogi kwenga munthu yo wenga ndi mizimu yiheni. We musinagogi, munthu mwenuyu wangudaniriza kuti: “Takunangiyaninji Yesu wa ku Nazareti? Kumbi mwaziya kuzitinanga? Nditikuziŵani umampha kuti ndimwi Wakupaturika waku Chiuta!” Yesu wanguchenya mzimu uheni wo wasuzganga munthu mwenuyu ndipu wangukamba kuti: “Ja cheti, tuwamu mwaku iyu!”—Mariko 1:24, 25.

Pa nyengu iyi, mzimu uheni wenuwu unguwisiya munthu yo pasi, ndipu wangwamba kukunkhuluka kweniso kudaniriza ukongwa. Kweni mzimu wenuwu ungutuwa mwa munthu yo “kwambula kumupweteka.” (Luka 4:35) Ŵanthu wo ŵenga musinagogi anguzizwa ukongwa ndipu angwamba kufumbana kuti: “Ntchinthu wuli chachitika? . . . Chinanga ndi mizimu yiheni watiyilamula mwamazaza ndipu yitimuvwiya.” (Mariko 1:27) Tikayika cha kuti nkhani yakukondwesa yeniyi yinguwanda ukongwa mucharu chosi cha Galileya.

Ŵati atuwa kusinagogi, Yesu ndi akusambira ŵaki anguluta kunyumba yaku Simoni yo waziŵikanga so kuti Peturo. Kwenuku, anyina a muwolu waku Peturo angutama ukongwa ndipu Peturo wakhumbanga kuti Yesu wakaŵachizgi. Yesu wati wafika, wanguŵako janja ndipu wanguŵayuska. Wati wachita ŵaka viyo, yiwu anguchira ndipu angukambiya Yesu ndi akusambira ŵaki kuti angalutanga nyengu yeniyo cha. Panyaki yiwu angukamba viyo chifukwa akhumbanga kuŵabikiya chakurya.

Lumwi le pafupi kusere, ŵanthu a muvigaŵa vakupambanapambana anguza ndi ŵanthu wo atamanga kunyumba kwaku Peturo. Ndipu pati pajumpha ŵaka nyengu yimanavi, ŵanthu anguzaza pamalu ngenanga. Kumbi yiwu anguza kuzichitanji? Akhumbanga kuti Yesu waŵachizgi. Mwaviyo, ‘wosi wo ŵenga ndi ŵanthu wo atamanga matenda ngakupambanapambana anguza nawu kwaku iyu. Ndipu iyu wanguŵachizga mwakuŵika manja ngaki pa munthu weyosi.’ (Luka 4:40) Chinanga kuti ŵanthu ŵenaŵa atamanga matenda ngakupambanapambana, Yesu wanguŵachizga nge mo Malemba ngangukambiya limu. (Yesaya 53:4) Yesu wanguchizga so ŵanthu wo ŵenga ndi mizimu yiheni. Ndipu mizimu yiheni yichituwa mu ŵanthu ŵenaŵa, yadanirizanga kuti: “Ndimwi Mwana waku Chiuta!” (Luka 4:41) Kweni Yesu wanguyichenya ndipu wanguyikaniza kuti yingalongoronga so cha. Mizimu iyi, yaziŵanga kuti Yesu ndiyu Khristu ndipu wakhumbanga cha kuti yichitengi vinthu nge kuti yiteŵete Chiuta wauneneska.