Yesu wati wamaliza kukamba nkhani yakugowoka kunyumba yaku Simoni yo wenga Mfarisi, wangwamba ulendu waki wachiŵi wakuchipharazga ku Galileya. Chenichi chenga chaka chachiŵi kutuliya po wangwambiya ntchitu yaki yakupharazga ndipu pa ulendu wenuwu wenga yija cha. Iyu wenga limoza ndi akutumika ŵaki 12 kweniso anthukazi anyaki “wo wanguŵatuzga mizimu yiheni ndi kuŵachizga matenda.” (Luka 8:2) Anyaki mwa anthukazi ŵenaŵa ŵenga Mariya yo wadanikanga kuti Mmagadala, Suzana ndi Jowana yo mulumu waki wenga kapitawu wa Fumu Herodi Antipasi.

Ŵanthu anandi angwamba kususka ŵati ayamba kuziŵa vo Yesu wachitanga. Venivi vinguwoneka pa nyengu yo ŵanthu anyaki anguza kwaku Yesu ndi munthu yo watondekanga kuwona, wenga ndi chiŵanda kweniso yo watondekanga kuŵereŵeta. Yesu wangutuzga chiŵanda mwa munthu mwenuyu kweniso wangwamba kuwona ndi kulongoro. Ŵanthu ŵati awona ivi anguzizwa ukongwa ndipu angukamba kuti: “Kumbi wangaŵa Mwana waku Davidi cha uyu?”—Mateyu 12:23.

Gulu la ŵanthu linguwungana kunyumba yo Yesu wajanga mwakuti Yesu ndi akusambira ŵaki angutondeka kurya. Kweni ndi ŵanthu wosi cha wo agomezganga kuti Yesu ndi “Mwana waku Davidi.” Pa gulu lenili penga so alembi ndi Afarisi wo angutuwa ku Yerusalemu. Kweni yiwu anguza kuzivwisiya vo Yesu wasambizanga cha pamwenga kumuchiska. Yiwu akambiyanga ŵanthu kuti: “We ndi Belezebule.” Yiwu ang’anamuwanga kuti wachitanga vakuziziswa mwakukoliyana ndi “mura wa viŵanda.” (Mariko 3:22) Abali aku Yesu ŵati avwa venivi anguza kuzimuto. Ntchifukwa wuli yiwu akhumbanga kuchita venivi?

Pa nyengu iyi, abali aku Yesu nawu agomezganga cha kuti iyu ndi Mwana waku Chiuta. (Yohane 7:5) Yiwu agomezganga cha kuti Yesu yo aziŵanga kweniso yo akuliyanga nayu limoza ku Nazareti ndiyu wachitanga vakuziziswa ndipu nkhani yaki yenga peposi. Yiwu  aŵanaŵananga kuti mutu waki utenda umampha cha ndipu angukamba kuti: “Wazunguliya mutu.”—Mariko 3:21.

Vo Yesu wanguchita vapambananga ndi vo ŵanthu yaŵa aŵanaŵananga. Pa nyengu iyi, ndipu Yesu wachizga ŵaka munthu yo wenga ndi chiŵanda ndipu iyu wangwamba kuwona ndi kulongoro. Ndipu palivi munthu yo watingi wasuskengi venivi. Mwaviyo, alembi ndi Afarisi angumumba mulandu waboza Yesu kuti amuchitiski soni. Yiwu angukamba kuti: “Munthu uyu watuzga viŵanda mu nthazi yinyaki yeyosi cha kweni yaku Belezebule, mura wa viŵanda.”—Mateyu 12:24.

Yesu wanguziŵa vo alembi ndi Afarisi aŵanaŵananga ndipu wanguŵakambiya kuti: “Ufumu wewosi wo ugaŵikana, ubwanganduka, ndipu tawuni yeyosi pamwenga nyumba yeyosi yo yigaŵikana, yikho cha. Mwakuyanana ŵaka, asani Satana watuzga Satana, ndikuti wajigaŵa; sonu ufumu waki ungakho?”—Mateyu 12:25, 26.

Yapa, Yesu wangukamba fundu yambula kususkika. Tikamba viyo chifukwa Afarisi aziŵanga kuti penga Ayuda anyaki wo atuzganga viŵanda. (Machitidu 19:13) Mwaviyo, wanguŵafumba kuti: “Asani ini ndituzga viŵanda mu nthazi yaku Belezebule, nanga ŵana ŵinu ativituzga mu nthazi yaku yani?” Yapa tingakamba kuti Yesu wang’anamuwanga kuti asani iyu watuzganga viŵanda mu nthazi yaku Satana ndikuti Ayuda nawu atuzganga viŵanda mu nthazi yaku Satana. Pavuli paki Yesu wangukamba kuti: “Kweni asani ndituzga viŵanda mu nthazi ya mzimu waku Chiuta, ndikuti Ufumu waku Chiuta wakubuchizgani nadi.”—Mateyu 12:27, 28.

Kutuzga viŵanda ko Yesu wachitanga wenga ukaboni wakuti we ndi nthazi zinandi kuphara Satana. Iyu wangulongo fundu yeniyi po wangukamba kuti: “Munthu wangasere wuli munyumba ya munthu wanthazi ndi kulonda katundu waki kwambula kumumanga dankha munthu wanthazi yo? Pijapija asani wangamumanga ndipu wangalonda nyumba yaki. Yo waleka kuŵa pamoza nani, wasuskana nani ndipu yo waleka kuwunjika nani, waparanya.” (Mateyu 12:29, 30) Alembi ndi Afarisi angulongo kuti alongozgekanga ndi Satana chifukwa chakuti asuskanga Yesu. Yiwu akambiyanga ŵanthu kuti angamuvwiyanga cha Yesu yo ndi Mwana waku Chiuta kweniso yo wawovyekanga ndi Yehova.

Yesu wangutcheŵeska ŵanthu aheni ŵenaŵa kuti: “Ŵanthu azamugowokereka maubudi ngosi ngo angachita, kwali ngangaŵa ngamtundu wuli, kweniso kwali anganyoza mwamtundu wuli. Kweni munthu weyosi yo wanyoza mzimu wakupaturika wazamugowokerekapu cha, kweni we ndi ubudi wambula kumala.” (Mariko 3:28, 29) Mwaviyo, ŵanthu wo atumbika Satana chinanga kuti awone limu kuti vinthu vo vichitika chifukwa cha mzimu waku Chiuta, azamukumana ndi soka likulu ukongwa.