Mulengi widu we ndi zeru ukongwa kuphara isi. Iyu watitiŵanaŵaniya ukongwa chifukwa Mbawusefwi achanju. Kweniso wakutilenga kuti tithembengi iyu mumalu mwakujimiya pakutija. (Yeremiya 10:23) Nge mwana yo wakhumbika kusambizika ndi apapi ŵaki, taŵanthu tosi tikhumbika kusambizika ndi Chiuta. (Yesaya 48:17, 18) Fundu za mu Bayibolu ndi mphasu yakutuliya kwaku Chiuta chifukwa zititiwovya ukongwa.​—Ŵerengani 2 Timote 3:16.

Marangu ngaku Yehova ngatitisambiza vo tingachita kuti tije ndi umoyu wamampha sonu ndipuso kuti tizisaniyi umoyu wambula kumala kunthazi. Mwaviyo, titenere kukondwa ukongwa asani Chiuta watitisambiza chifukwa iyu ndiyu wakutilenga.​—Ŵerengani Masalimo 19:7, 11; Chivumbuzi 4:11.

Fundu zinyaki za mu Bayibolu zititiwovya kuziŵa vo tingachita kuti tikondwesengi Chiuta pa vakuchitika vakupambanapambana. Kweni marangu nganyaki ngagwira ntchitu pa vakuchitika vinyaki pe. (Dotoronome 22:8) Titenere kugwiriskiya ntchitu lusu lidu lakuŵanaŵana kuti tivwisi fundu za mu Bayibolu ndi kuzigwiriskiya ntchitu pa umoyu widu. (Nthanthi 2:10-12) Mwakuyeruzgiyapu, Bayibolu lititisambiza kuti umoyu ndi mphasu yakutuliya kwaku Chiuta. Kuŵanaŵaniya fundu yeniyi kungatiwovya kuti tijivikiliyengi ku ngozi asani te kuntchitu, panyumba ndipuso asani titenda.​—Ŵerengani Machitidu 17:28.

Yesu wangukamba za marangu ngaŵi ngakuzirwa ukongwa. Dangu lakwamba lilongo chifukwa chikulu cho Chiuta wakutilenge. Iyu wakutilenga kuti timuvwiyengi, timuyanjengi kweniso timuteŵetiyengi mwakugomezgeka. Nyengu zosi titenere kukumbuka dangu lakwamba lenili asani tikhumba  kusankha vakuchita. (Nthanthi 3:6) Ŵanthu wo ayesesa kulondo dangu ili aja pa ubwezi ndi Chiuta, aja ndi likondwa lenechu kweniso azamulonde umoyu wamuyaya.​—Ŵerengani Mateyu 22:36-38.

Dangu lachiŵi lititiwovya kuti tichitengi vinthu mwachimangu ndi anyidu. (1 Akorinto 13:4-7) Kuti munthu walongo kuti wagwiriskiya ntchitu dangu lachiŵi lenili, watenere kuchita vinthu nge mo Chiuta wachitiya ndi ŵanthu.​—Ŵerengani Mateyu 7:12; 22:39, 40.

Marangu ngaku Chiuta ngatovya ŵanthu mubanja kuti ajengi mwakukoliyana kweniso ayanjanengi. (Akolose 3:12-14) Mazu ngaku Chiuta ngavikiliya so mabanja chifukwa ngakamba kuti ŵanthu akutorana atenere kujaliya limoza kwa umoyu wawu wosi.​—Ŵerengani Genezesi 2:24.

Kulondo fundu za mu Bayibolu kungatiwovya kuti tisaniyengi vinthu vakhukumbika pa umoyu kweniso kuti tileki kusuzgika maŵanaŵanu. Mwakuyeruzgiyapu, mabwana nganandi ngatanja kulemba ntchitu ŵanthu wo agwiriskiya ntchitu fundu za mu Bayibolu pa umoyu wawu. Fundu izi zisazgapu kuchita vinthu mwauneneska ndipuso kugwira ntchitu mwaphamphu. (Nthanthi 10:4, 26; Aheberi 13:18) Mazu ngaku Chiuta ngatitisambiza so kuti tikhorwengi ndi vinthu vakukhumbika vo te navu ndipuso tiwonengi kuti ubwezi widu ndi Chiuta ndiwu ngwakuzirwa ukongwa kuluska vinthu vakuliŵavu.​—Ŵerengani Mateyu 6:24, 25, 33; 1 Timote 6:8-10.

Kugwiriskiya ntchitu marangu ngaku Chiuta kungavikiliya so umoyu widu. (Nthanthi 14:30; 22:24, 25) Mwakuyeruzgiyapu, kuvwiya dangu laku Chiuta lo likaniza kumwa ukongwa moŵa kungativikiliya ku matenda ngakofya kweniso ngozi. (Nthanthi 23:20) Yehova watitikaniza cha kumwa moŵa kweni wakamba kuti tingamwanga mwakujumpha mwesu cha. (Masalimo 104:15; 1 Akorinto 6:10) Marangu ngaku Chiuta ngatitikambiya kuti titcheŵengi ndi vo tichita kweniso vo tiŵanaŵana. (Masalimo 119:97-100) Kweni Akhristu auneneska avwiya marangu ngaku Chiuta kuti ngaŵawovyi ŵaka cha. Yiwu achita ivi kuti atumbiki Yehova.​—Ŵerengani Mateyu 5:14-16.