1-3. (a) Kumbi tingasambiranji vakukwaskana ndi mo ŵanthu akulengeke asani tiwona vo vichitika pakati pa apapi ndi mwana wawu wa bonda? (b) Kumbi mwakawi tichita wuli asani munthu munyaki watitiyanja, nanga ndi fumbu nili lakukhumbika ko tingajifumba?

 APAPI akondwa ukongwa kuwona mwana wawu wa bonda wachimwemwete. Kanandi aŵika chisku chawu pafupi ndi chisku cha mwanayo ndipu achita nayu saza kweniso kumumwemwete. Apapi akhumbisiska kuti awonengi kuti mwana wawu nayu wamwemwete. Ndipu pechendajumphi nyengu yitali, mwanayo nayu watamba kumwemwete. Kuchita venivi kutovya kuti mwana waziŵengi kuti apapi ŵaki atimuyanja ndipu pakumaliya paki nayu watamba kuŵayanja.

² Kumwemwete kwa mwana kutitikumbusa fundu yakukhumbika ukongwa ya vo isi taŵanthu tichita mwakawi. Asani munthu munyaki wayamba kutilongo kuti watitiyanja, nasi titamba kumulongo kuti titimuyanja. (Salimo 22:9) Asani tikuwa, titamba so kuziŵa nthowa zinyaki zo tingalongore chanju ku ŵanthu wo titiŵayanja. Panyaki mukumbuka mo apapi ŵinu, achibali ŵinu pamwenga anyinu akuyanjiyaningi mweche anamana. Venivi vinguchitisa kuti mukondwengi nawu ndipu pakumaliya paki namwi mungwamba kuŵayanja. Kumbi venivi ndivu vichitika so ndi ubwezi winu ndi Yehova Chiuta?

³ Bayibolu likamba kuti: “Te ndi chanju chifukwa iyu ndiyu wangwamba kutiyanja.” (1 Yohane 4:19) Mu Chigaŵa 1 mpaka 3 va buku linu tingukumbuskika kuti Yehova Chiuta walongo nthazi, urunji kweniso zeru zaki mwachanju kuti watiwovyi. Ndipu Muchigaŵa 4 mungusambira kuti iyu walongo ŵanthu chanju, kusazgapu yimwi pakumwija munthowa zapade ukongwa. Mwaviyo mungachita umampha kujifumba fumbu lakukhumbika ukongwa lakuti: ‘Kumbi ndingalongo wuli kuti nditanja Yehova?’

4. Kumbi wanthu anandi aŵanaŵana kuti kwanja Chiuta kung’anamuwanji?

⁴ Yehova, ndiyu mweneku wa jalidu la chanju ndipu waziŵa kuti kulongo chanju kuchitiska ŵanthu kuti alongongi mijalidu yamampha ukongwa yo ŵenayu. Chinanga kuti ŵanthu anyaki angugalukiya Yehova mwadala, kweni wagomezga kuti ŵanthu anyaki awongengi mbwenu chanju chaki. Ndipu venivi ndivu ŵanthu mamiliyoni nganandi achita. Kweni vachitima kuti alongozgi anandi avisopa achitisa ŵanthu kuti aleki kuziŵa vo kwanja Chiuta kung’anamuwa. Ŵanthu anandi akamba kuti atanja Chiuta, kweni yiwu awona kuti kuŵanaŵana pamwenga kukamba ŵaka kuti ‘nditanja Chiuta’ nkhwakukwana. Mbuneneska kuti chenichi chingaja chiyambi chamampha nge mo mwana wa bonda wangalongore kuti watanja apapi ŵaki asani watiŵamwemwete. Kweni asani tayamba kuziŵa vinandi vakukwaskana ndi chanju, tikhumbika kuchita vinandi kuluska penapa.

5. Kumbi Bayibolu likamba kuti kopa Chiuta kung’anamuwanji, nanga ntchifukwa wuli tikhumbika kukondwa ndi venivi?

⁵ Yehova watitikambiya mo munthu wangalongore kuti watimuyanja. Mazu ngaki ngatiti: “Kwanja Chiuta kung’anamuwa kusunga marangu ngaki.” Mwaviyo tingalongo kuti titanja Chiuta kuziya mu vo tichita. Kweni ŵanthu anandi akhumba cha kuvwiya munthu munyaki. Kweni vesi ili lilutirizga so kuti: “Ndipu marangu [ngaku Chiuta] ngaki ngazitu cha.” (1 Yohane 5:3) Yehova wakutipasa Marangu kweniso fundu zaki kuti zitikandilizengi cha, kweni kuti zitiwovyengi. (Yesaya 48:17, 18) Mu Mazu ngaku Chiuta mwe fundu zinandi zo zitovya kuti tije nayu pa ubwezi. Ntchifukwa wuli tikamba viyo? Tiyeni tikambiskani vinthu vitatu vo vititiwovya kukholeska ubwezi widu ndi Yehova. Chakwamba, nkhukambiskana nayu, chachiŵi kumusopa ndipu chachitatu kumuyezga.

6-8. (a) Kumbi tingalongo wuli kuti tivwisiya kwaku Yehova? (b) Kumbi tingachita wuli kuti kuŵerenga Bayibolu kutikondwesengi?

⁶ Mutu 1 ungwamba ndi fundu yakuti, “Yeruzgiyani kuti mukambiskana ndi Chiuta?” Tingusambira kuti venivi ndivu ŵanthu  anyaki anguchita. Mwakuyeruzgiyapu, Mozesi wangukambiskana ndi Chiuta. Nanga wuli isi mazuŵa nganu? Mazuŵa nganu Yehova watuma angelu cha kuti akambiskani ndi ŵanthu. Kweni Yehova we ndi nthowa zamampha zo wagwiriskiya ntchitu pakukambiskana nasi. Kumbi Yehova wakamba nasi wuli, nanga tingalongo wuli kuti titimuvwisiya?

⁷ Chifukwa chakuti “Malemba ngosi ngakukambirika ndi Chiuta,” tivwisiya kwaku Yehova asani tiŵerenga Mazu ngaki, Bayibolu. (2 Timote 3:16) Mwaviyo wakulembaku buku la masalimo wanguchiska ateŵeti aku Yehova kuti aŵerengengi Bayibolu “msana ndi usiku.” (Salimo 1:1, 2) Kuti venivi vichitiki pakhumbika phamphu. Kweni asani tichita viyo tiyanduwa ukongwa. Nge mo tingusambiriya mu Mutu 18, Bayibolu le nge kalata yakukhumbika ukongwa yo yituliya kwa Awusefwi akuchanya. Mwaviyo tingawonanga cha kuti kuliŵerenga ndi mphingu. Tiliŵerengengi munthowa yakuti litikondwesengi. Kumbi tingachita wuli venivi?

⁸ Muwonengi vo muŵerenga mumaŵanaŵanu mwinu. Muwonengi ŵanthu wo akuzumbulika mu Bayibolu nge ŵanthu chayiwu. Muyesesengi kuvwisa kuti wenga ŵanthu amtundu wuli, mo vinthu venge pa umoyu wawu kweniso vilatu vawu pakuchita vinthu. Pavuli paki muŵanaŵaniyengepu ukongwa pa vo muŵerenga. Mujifumbengi mafumbu yanga: ‘Kumbi nkhani iyi yitindisambizanji vakukwaskana ndi Yehova? Kumbi ndi jalidu nili la Chiuta lo ndisaniyapu? Kumbi ndi fundu niyi yo Yehova wakhumba kuti ndisambiri, nanga ndingayigwiriskiya wuli ntchitu pa umoyu wangu?’ Muŵerengengi, kuŵanaŵaniyapu mwandimba kweniso kuchita vo muwerenga. Asani muchitengi venivi, kuŵerenga Mazu ngaku Chiuta kukukondweseningi.—Salimo 77:12; Yakobe 1:23-25.

9. Kumbi “kapolu wakugomezgeka ndi wazeru” ndiyani, nanga ntchifukwa wuli tikhumbika kuvwisiya mwakuphwere?

⁹ Yehova walongoro so nasi kuziya mwa “kapolu wakugomezgeka ndi wazeru.” Mwakukoliyana ndi vo Yesu wangukambiya limu, pe kagulu ka Akhristu akusankhika wo apereka “chakurya pa nyengu yakwenere” mu mazuŵa ngakusuzga nganu. (Mateyu 24:45-47) Asani tiŵerenga mabuku wo nganozgeka kuti ngatiwovyi kuziŵa fundu zauneneska za mu Bayibolu kweniso asani tifika pa  maunganu nga mpingu ndipuso ngakulungakulu, tiryiskika ndi kapolu. Chifukwa chakuti kapolu mwenuyu ngwaku Khristu, tilongo kuti te azeru asani tichita vo Yesu wangukamba kuti: “Muvwisiyengi mwakuphwere.” (Luka 8:18) Tivwisiya mwakuphwere chifukwa tiziŵa kuti kapolu mwenuyu ndi nthowa yimoza yo Yehova wagwiriskiya ntchitu pakulongoro nasi.

10-12. (a) Ntchifukwa wuli pempheru ndi mphasu yakutuliya kwaku Yehova? (b) Kumbi tingapemphera wuli kuti Yehova wakondwengi ndi mapempheru ngidu, nanga ntchifukwa wuli tigomezga kuti wavwisiya mapempheru ngidu?

¹⁰ Tawona nthowa zo Yehova wagwiriskiya ntchitu pakulongoro nasi. Nanga isi tingalongoro nayu wuli? Asani tiŵanaŵaniya venivi panyaki tingachita mantha. Tiyeruzgi kuti mukhumba kuti mukambiskani ndi pulezidenti wa charu chinu va masuzgu nginu, kumbi mungakumana nayu mwambula kusuzga? Muvyaru vinyaki kuchita venivi kungaja kwakofya! Munyengu yaku Esiteri ndi Modikayi, munthu wakhumbikanga kubayika asani waluta kwa fumu ya Perisiya kwambula kudanika ndi fumu yo. (Esiteri 4:10, 11) Sonu kwe wuli kuwoneke pamasu pa Ambuya Fumu ya Chilengedu Chosi, yo kwaku iyu ŵanthu anthazi “ŵe nge azombi.” (Yesaya 40:22) Kumbi tikhumbika kuchita mantha kukambiskana nayu? Awa!

¹¹ Yehova wakunozga nthowa yipusu yo tingagwiriskiya ntchitu asani tikhumba kulongoro nayu. Nthowa yeniyi ndi pempheru. Chinanga ndi mwana munamana ukongwa wakhoza kupemphera mwachivwanu kwaku Yehova kuziya mu zina laku Yesu. (Yohane 14:6; Aheberi 11:6) Pempheru lititiwovya so timukambiyengi vo ve mumtima mwidu, vo vititifipiska mtima kweniso vo vititisuzga maŵanaŵanu mwakuti tingatondeka kuvikonkhoska umamphaumampha. (Aroma 8:26) Pakupemphera, mbumampha cha kuŵanaŵana kuti Yehova wangakondwa asani tingapereka mapempheru ngatalingatali pamwenga tiwerezengiwerezengi waka mazu. (Mateyu 6:7, 8) Chinanga kuti ve viyo, Yehova wakutiŵikiya mphaka cha pa utali wa nyengu yo tingalongoro nayu kweniso kuti tikhumbika kukamba nayu kalinga. Mazu ngaki ngatitikambiya kuti “Tipempherengi nyengu zosi.”—1 Atesalonika 5:17.

¹² Kumbukani kuti Yehova yija ndiyu waziŵika kuti “Wakuvwa pempheru,” ndipu wachivwisiya watitilongo lisungu. (Salimo  65:2) Kumbi Yehova wawona kuti kuvwisiya mapempheru nga ateŵeti ŵaki akugomezgeka ndi mphingu? Awa, wakondwa kuvwisiya mapempheru ngawu. Mazu ngaki ngayeruzgiya mapempheru ngaviyo ndi vakununkhira, vo josi laki lo likwera kuchanya lituzga kafungu kamampha kakujalika mtima pasi. (Salimo 141:2; Chivumbuzi 5:8; 8:4) Vakuchiska ukongwa kuziŵa kuti Ambuya Fumu Yikulu akondwa kuvwisiya mapempheru ngidu ngakutuliya pasi pa mtima. Mwaviyo, asani mukhumba kuja pa ubwezi wakukho ndi Yehova, mukhumbika kupemphera kwaku iyu zuŵa lelosi kweniso kaŵikaŵi. Mumukambiyengi chechosi cho che mumtima mwinu. (Salimo 62:8) Yiwu Mbada ŵinu akuchanya mwaviyo muŵakambiyengi vosi vo vitikufipiskani mtima, vo vakukondwesani, vo muŵanaŵana kweniso chifukwa cho imwi mutiŵayanjiya. Asani muchitengi viyo ubwezi winu ndi yiwu ukhongi ukongwa.

13, 14. Kumbi kusopa Yehova kung’anamuwanji, nanga ntchifukwa wuli tikhumbika kumusopa?

¹³ Asani tikambiskana ndi Chiuta, titimuvwisiya ŵaka cha pamwenga kukambiskana nayu nge mo tingakambiskiyana ndi mubali widu pamwenga bwezi lidu. Mumalu mwaki tija kuti tisopa Yehova kweniso ndi nthowa yimoza yakulongore kuti titimutumbika ndipuso tilongo kuti titimuyanja ndi mtima wosi. Kusopa kwauneneska kukwaska umoyu widu wosi. Kutovya so kuti ateŵeti wosi aku Yehova a pacharu chapasi kweniso kuchanya akoliyananegi. Mu chiwona, wakutumika Yohane wanguvwa mungelu wachipharazga kuti: “Sopani Yo wakupanga kuchanya, charu chapasi, nyanja ndipuso akasupi a maji.”—Chivumbuzi 14:7.

¹⁴ Ntchifukwa wuli tikhumbika kusopa Yehova? Aŵanaŵniyani mijalidu yo takambiskana mu buku ili, mijalidu nge kuja atuŵa, nthazi, kujiko, urunji, chiganga, lisungu, zeru, kujiyuyuwa, chanju, kuchitiya anyidu chitima, kugomezgeka kweniso umampha. Tawona kuti Yehova ndiyu walongo ukongwa mijalidu yeniyi kuluska munthu weyosi. Asani titesesa kuvwisa nthowa zakupambanapambana zo Yehova walongore mijalidu yaki yosi, tiziŵengi kuti iyu ndi munthu yo walongo waka mijalidu yamampha ŵaka cha. Mumalu mwaki, ngwaunkhankhu kweniso ngwapachanya kuluska  isi. (Yesaya 55:9) Tikayikiyapu cha kuti Yehova ndiyu ngwakwenere kulamuliya kweniso ndiyu titenere kumusopa. Kumbi tingamusopa wuli Yehova?

15. Kumbi tingamusopa wuli Yehova “mu mzimu ndi mu uneneska,” nanga pa maunganu ngidu tija ndi mwaŵi wakuchitanji?

¹⁵ Yesu wangukamba kuti: “Chiuta ndi Mzimu ndipu wo atimusopa atenere kumusopa mu mzimu ndi mu uneneska.” (Yohane 4:24) Kuti tisopengi Chiuta “mu mzimu,” titenere kuja ndi mzimu waki kweniso kuzomereza kuti utilongozengi. Kusopa kwidu kutenere kuja kwakukoliyana ndi uneneska, kung‵anamuwa fundu zauneneska zo zisanirika mu Mazu ngaku Chiuta. Nyengu yeyosi yo tawungana ndi Akhristu anyidu, tija ndi mwaŵi wakusopa Yehova ‘mwakulongozeka ndi mzimu ndi uneneska.’ (Aheberi 10:24, 25) Asani titumba sumu zakuthamika, kupemphere limoza, kuvwisiya kweniso kutopu chigaŵa asani tikambiskana Mazu ngaki, tilongo kuti titimuyanja kweniso kumusopa munthowa yo iyu wakhumba.

16. Kumbi limoza mwa marangu ngakulungakulu ngo Akhristu auneneska akupaskika ndi nili, nanga ntchifukwa wuli tiwona kuti tikhumbika kulivwiya?

 ¹⁶ Titimusopa so Yehova asani tikambiyaku ŵanthu anyaki vakukwasana ndi iyu ndipu asani tichita viyo tilongo kuti titimuthamika. (Aheberi 13:15) Limoza mwa dangu likulu lo Akhristu auneneska akupaskika, ndakuti apharazgengi uthenga wamampha wa Ufumu waku Yehova. (Mateyu 24:14) Tivwiya dangu lenili mwakukhumbisiska chifukwa chakuti titimuyanja Yehova. Asani tingaŵanaŵaniya mo “chiuta wa mu nyengu yinu,” yo ndi Satana Dyaboli ‘wabulumutizgiya maŵanaŵanu nga ŵanthu ambula kugomezga,’ kweniso mo wawandisiya vinthu vaboza vakukwasana ndi Yehova, tikhumbisiska kuja Akaboni aku Chiuta ndi kukambiyanga ŵanthu vinthu vauneneska vakukwasana ndi Chiuta. (2 Akorinto 4:4; Yesaya 43:10-12) Ndipuso asani tiŵanaŵaniya mijalidu yaku Yehova tikhumbisiska kukambiyaku anyidu vakukwasana ndi iyu. Kukamba uneneska, palivi mwaŵi ukulu kuluska kuwovya ŵanthu kuziŵa Awusefwi akuchanya kuti ayambi kuŵayanja nge mo nasi titiŵayanjiya.

17. Kumbi kusopa Yehova kukwaska so vinthu nivi, nanga ntchifukwa wuli tikhumbika kumusopa mwakugomezgeka?

¹⁷ Kusopa Yehova kusazgapu so vinthu vinyaki vinandi. Kukwaska chigaŵa chechosi cha umoyu widu. (Akolose 3:23) Asani tizomerezga nadi kuti Yehova ndiyu Ambuya Fumu Yikulu, tiyesesengi kuchita vo iyu wakhumba pa chechosi kwali ndi munthengwa, kuntchitu, pakuchita vinthu ndi ŵanthu anyaki kweniso asani te kwakutija. Tichitengi vosi vo tingafiska kuti titeŵete Yehova ndi ‘ mtima widu wosi,’ kweniso mwakugomezgeka. (1 Mbiri 28:9) Mwaviyo asani munthu wasopa Yehova munthowa yeniyi wachita vinthu mwachinyengu cha pamwenga mwauryarya, kweniso wachita cha vinthu vakuti wawonekengi kuti wateŵete Yehova penipo kumphepeti wachita maubudi ngakulungakulu. Kugomezgeka kuchitisa kuti munthu waleki kuja wachinyengu ndipu kwanja Chiuta kutimuchitiska kuti watinkhengi viheni. Kopa Chiuta kutitiwovya so kuti timuteŵetiyengi ndi mtima wosi. Bayibolu likamba kuti kopa Chiuta kutitiwovya kuti tilutirizgi kuja nayu pa ubwezi.—Salimo 25:14.

18, 19. Ntchifukwa wuli tikamba kuti vingachitika kuti ŵanthu ambula kufikapu amuyezgi Yehova Chiuta?

¹⁸ Chigaŵa chechosi cha buku ili chimaliza ndi mutu wo ulongo mo ‘tingamuyezge Chiuta nge ŵana ŵaki akwanjiwa.’ (Aefeso 5:1) Nyengu zosi tikumbukengi kuti chinanga kuti te ambula kufikapu, tingamuyezga Yehova pa nkhani yakulongo nthazi, urunji, zeru kweniso chanju. Kumbi tiziŵa wuli kuti vingachitika kuyezga Wanthazizosi? Kumbukani kuti vo zina laku Yehova ling’anamuwa kutitisambiza kuti iyu wangaja chechosi cho wakhumba kuti wafiski khumbu laki. Kukamba uneneska tizukuma ukongwa ndi venivi. Kweni kumbi vingachitika kuti nasi tisankhengi kuja yo takhumba kuja? Awa.

¹⁹ Tikulengeka muchikozgu chaku Chiuta. (Genezesi 1:26) Mwaviyo isi taŵanthu tipambana ndi vakulengeka vinyaki vosi pacharu. Tichita vinthu mwakutole waka zeru zo tikuwa nazu cha pamwenga kutole waka vinthu vo vatizunguliya pamalu po. Yehova wakutipasa mphasu yapade yo ndi wanangwa wakusankha vakuchita. Chinanga kuti te ambula kufikapu kweniso titondeka kufiska vinthu vinyaki, te ndi wanangwa wakusankha kuti tije munthu wamtundu wuli. Kweniso titenere kukumbuka kuti zina laku Chiuta ling’anamuwa kuti iyu wangachitisa ateŵeti ŵaki kuja chechosi cho iyu wakhumba. Kumbi yimwi mukhumba kuja munthu wa chanju, wazeru, yo wachita vinthu mwaurunji ndi kugwiriskiya ntchitu mazaza ngaki mwakwenere? Mzimu waku Yehova ungakuwovyani kuja munthu waviyo! Aŵanaŵaniyani vinthu vamampha vo mungafiska kuchita asani mungaja munthu waviyo.

20. Kumbi ndi vinthu vamampha nivi vo vichitika asani titezga Yehova?

²⁰ Mukondwesengi mtima wa Awusemwi akuchanya. (Nthanthi 27:11) Mungafiska ‘kumukondwesa ukongwa,’ chifukwa waziŵa vo mungafiska ndi vo mungatondeka kufiska. (Akolose 1:9, 10) Ndipu asani mulutirizga kulondo mijalidu ya Awusemwi akwanjiwa, mwazamuja ndi mwaŵi unyaki wapade. Mu charu chiheni ichi cho ŵanthu anandi atimuziŵa cha Chiuta, mungaŵawovya kuti aziŵi ukweru wa uneneska. (Mateyu 5:1, 2, 14) Asani tilongo mijalidu yamampha yaku Yehova, ŵanthu anyaki angaziŵa kuti iyu ndi Chiuta wamampha ukongwa. Wenuwu ndi mwaŵi wapade ukongwa!

21, 22. Kumbi ŵanthu wosi wo atopa Yehova azamulutirizga kuchitanji kwamuyaya?

²¹ Vinthu vo vikulembeka pa Yakobe 4:8, ndi vinthu vakuti vichitika kamoza cha pamwenga kwa nyengu yimanavi. Ndi vinthu vo tichita kwa umoyu widu wosi asani tilutirizga kuja akugomezgeka. Tazamulutirizga kundere kufupi ndi Yehova. Nyengu zosi paja vinthu vinandi vakukhumba kusambira vakukwaskana ndi iyu. Ndipu tingaŵanaŵananga cha kuti buku ili latisambiza vosi vakukwaskana ndi Yehova Chiuta widu. Yapa tayambapu waka kukambiskana vo Bayibolu likamba! Ndipu chinanga ndi Bayibolu lititikambiya vosi cha vakukwaskana ndi Yehova. Wakutumika Yohane wangukamba kuti asani vinthu vosi vo Yesu wanguchita pacharu chapasi vingulembeka ndikuti, “charu chatingi chiŵengevi malu ngakukwana kusungamu mipukutu yaki.” (Yohane 21:25) Asani ndimu viliri ndi vakukwaskana ndi Mwana, nanga kwewuli vakukwaskana ndi Ada!

²² Chinanga mpha nyengu yo tazamuja ndi umoyu kwamuyaya, tazamufiska cha kusambira vosi vakukwaskana ndi Yehova. (Wakutawula 3:11) Mwaviyo aŵanaŵaniyani vinthu vo tilinidiza kunthazi. Asani tazija ndi vyaka mahandiredi nganandi, masawuzandi,  mamiliyoni kweniso mabiliyoni, tazamuziŵa vinandi vakukwaskana ndi Yehova Chiuta kuluska vo tiziŵa pasonu panu. Kweni tazamuwona mbwenu kuti pe vinthu vinandi vakuziziswa vo tikhumbika kuzisambira. Tazamukhumbisiska kusambira vinandi chifukwa, nyengu zosi tazamuja ndi vifukwa vinandi vakukambiya mazu ngakuyanana ndi ngo munthu munyaki yo wangulembaku buku la Sumu wangukamba kuti: “Kwaku ini, chinthu chamampha nkhundere kufupi ndi Chiuta.” (Salimo 73:28) Umoyu mu Paradayisu wazamuja wakukondwesa ukongwa kuluska mo tingaŵanaŵaniya kweniso tazamuchitanga vinthu vakupambanapambana. Ndipu chakukondwesa ukongwa ntchakuti nyengu zosi tazamunderenga kufupi ndi Yehova.

23. Kumbi muchiskika kuchitanji?

²³ Pakuti Yehova watikuyanjani, namwi muyesesengi kumuyanja ndi mtima wosi, umoyu winu wosi, maŵanaŵanu nginu ngosi, ndipuso nthazi zinu zosi. (Mariko 12:29, 30) Mumuyanjengi ndi chanju chinu chambula kumala kweniso mwakugomezgeka. Zuŵa lelosi asani musankha vakuchita, kwali vikuluvikulu pamwenga ndi vimanavimana mulongongi kuti mukhumbisiska kuja pa ubwezi wakukho ndi Awusemwi akuchanya. Kuluska vosi, nyengu zosi muyesesengi kundere kufipi ndi Yehova ndipu nayu wanderengi kufupi ndi yimwi kwamuyaya!