Akwanjiwa Abali ndi Azichi:

Kwanja Chiuta kweniso ŵanthu kutitichiska kuti ‘tilutengi tikasambizengi ŵanthu amitundu yosi kuti aje akusambira ndipuso kuŵabatiza.’ (Mate. 28:​19, 20; Mariko 12:​28-31) Chanju chayichu ntchanthazi ukongwa. Chingaŵafika pamtima ŵanthu wo ŵe ndi “maŵanaŵanu ngamampha ngakuŵawovya kuti azisaniyi umoyu wamuyaya.”—Machi. 13:48.

Mu vyaka vo vajumpha, taŵikanga ukongwa mtima pakuloŵeza masachizgu nga mo tingapharazgiya kweniso kugaŵiya mabuku. Kweni pasonu panu tikhumbika kusazgiyaku lusu lidu pakukambiskana ndi ŵanthu. Tikhumba kulongo kuti titiŵayanja ŵanthu mwakukambiskana nawu nkhani zo zitiŵakondwesa. Venivi ving’anamuwa kuti tikhumbika kusintha kweniso kuŵanaŵaniya vo munthu weyosi wafipa navu mtima kweniso vo vingamukondwesa. Kumbi kabuku yaka katiwovyengi wuli kuti tifiski kuchita venivi?

Kabuku yaka ke ndi masambiru 12 ngo ngakonkhoska mijalidu yo titenere kuŵa nayu, kuti tilongo kuti titiŵayanja ŵanthu ndipuso kuŵawovya kuti aje akusambira. Sambiru lelosi latuliya pa nkhani yinyaki ya mu Bayibolu yo yikonkhoska jalidu lo Yesu pamwenga Akhristu akwambiriya alongonga asani ŵe mu uteŵeti. Chilatu chidu nkhuloŵeza masachizgu nga mo tingapharazgiya cha, kweni kusaniya nthowa zo tingalongore kuti titanja ŵanthu. Chinanga kuti jalidu lo likonkhoskeka pa sambiru lelosi ndakukhumbika ukongwa mu uteŵeti, kweni tiwonengi mijalidu yo tikhumbika kuja nayu, ukongwa asani titamba kukambiskana ndi ŵanthu, tichita maulendu ngakuweriyaku pamwenga tichitisa masambiru nga Bayibolu.

Pa sambiru lelosi, muŵanaŵaniyengi mo mungalongore jalidu lo lakonkhoskeka mu sambiru lo asani mukambiskana ndi ŵanthu muchigaŵa chinu. Muyesesengi kumuyanja ukongwa Yehova kweniso kwanja ŵanthu. Venivi vikuwovyeningi kuti mufiski chilatu chinu chakuwovya ŵanthu kuti aje akusambira.

Tiwonga ukongwa mwaŵi ukulu wo tenawu wakuteŵete namwi limoza. (Zefa. 3:9) Yehova wakutumbikeni po mulutirizga kwanja ŵanthu ndi kuŵawovya kuja akusambira!