1. Konkhoskani vo achimi aku Yehova pamwenga kuti alonda achitanga, kweniso vo vinguchitika pavuli paki.

ZUŴA linyaki mulonda wanguma pampanda wa Yerusalemu ndipu wangujala kumasu kuti walereski umampha lumwi lichisere. Iyu walereskanga uku ndi uku. Mwamabuchibuchi, wangusoska mbata, wangututiya mukati pavuli paki wangumba mbata kuti watcheŵeski ŵanthu kuti kutuza asilikali a ku Babiloni! Kweni yapa ndipu nyengu yamala kuti ŵanthu a mutawuni ya Yerusalemu achitepu kanthu. Kwa vyaka vakujumpha 100, Yehova waŵaŵikiyanga alonda pamwenga kuti achimi wo aŵatcheŵeskanga kuti zuŵa ili lizengi, kweni ŵanthu avwiyanga cha. Sonu pa nyengu iyi, asilikali a Babiloni anguzingiliza mpanda. Asilikali ŵenaŵa ŵati azingiliza tawuni yeniyi kwa myezi yinandi, angusere mumpanda. Yiwu angubwanganduwa nyumba yakusopiyamu, angubaya kweniso anguko ŵanthu ambula chivwanu wo ajanga mu Yerusalemu, wo asopanga angoza.

2, 3. (a) Kumbi ntchinthu wuli cho chichitikiyengi ŵanthu wo aja pacharu chapasi? (b) Kumbi tikambiskanengi mafumbu nanga?

² Mazuŵa nganu, asilikali aku Yehova aja kamanavi kupereka cheruzgu ku ŵanthu ambula chivwanu wo aja pacharu chapasi. (Chivu. 17:12-14) Venivi vazamuchitiska kuti pacharu chapasi pachitiki chisuzgu chikulu ukongwa cho chechendachitikepu. (Mate. 24:21) Kweni nyengu yecheŵaka kuti ŵanthu anandi avwiyi uthenga  wakutcheŵeska, wo ŵanthu wo Yehova waŵasankha kuja nge alonda apereka.

³ Kumbi ntchinthu wuli cho chinguchitiska kuti Yehova wasankhi alonda? Kumbi mulonda waperekanga uthenga wuli? Mbayani wo ŵenga alonda, nanga isi tingawovya wuli? Tiyeni tikambiskani mafumbu ngenanga.

4. Ntchifukwa wuli Yehova wasankhanga alonda? (Wonani chithuzi cho che pachanya.)

⁴ Ŵerengani Ezekiyeli 33:7. Kali, alonda chayiwu amanga pachanya pampanda wa tawuni kuti avikiliyi ŵanthu wo ajanga mutawuni yo. Venivi valongonga kuti fumu ya tawuni yo yiphwere ŵanthu ŵaki. Chinanga kuti nyengu zinyaki munthu yo wagona wachulukanga asani wavwa kuliya kwa mbata, kweni mbata yeniyi yataskanga so maumoyu nga ŵanthu wo achitapu kanthu. Mwakuyanana ŵaka, Yehova nayu wasankhanga alonda kuti wawofyezi Ayisirayeli ndi mauthenga nga cheruzgu cha, kweni wakhumbanga kuŵalongo kuti watiŵaphwere ndipu wakhumba kuŵataska.

5, 6. Kumbi Yehova walongo wuli kuti ndi murunji?

⁵ Yehova wachisankha Ezekiyeli kuti waje mulonda, wangulongo mijalidu yaki yamampha yo yititichiska. Tiyeni tikambiskanepu ŵaka mijalidu yaki yiŵi.

⁶ Urunji: Urunji waku Yehova ulongo kuti wachita nasi vinthu mwambula kwanjiya. Mwakuyeruzgiyapu, chinanga kuti ŵanthu anandi anguvwa ndi kukana uthenga waku Ezekiyeli, kweni Yehova wanguŵanaŵanapu cha kuti mtundu wosi wa Ayisirayeli ngwakugaruka. Mumalu mwaki wakhumbanga kuti waziŵi mo munthu weyosi pakuyija wachitiyengi. Iyu wakambanga mwakuwerezawereza ku “munthu muheni” ndipuso ku “munthu murunji.” Mwaviyo, Yehova wapereka cheruzgu mwakukoliyana ndi mo munthu weyosi wachitiya ndi uthenga wakutcheŵeska wo wavwa.—Ezeki. 33:8, 18-20.

7. Kumbi Yehova watiŵayeruzga wuli ŵanthu?

⁷ Urunji waku Yehova uwoneke so mo iyu wapereke cheruzgu ku ŵanthu. Munthu weyosi wayeruzgika mwakukoliyana ndi vinthu vo wakuchita kali cha, kweni wayeruzgika mwakukoliyana ndi mo wachitiya asani wavwa uthenga wakutcheŵeska. Yehova wangukambiya Ezekiyeli kuti: “Asani ndakambiya munthu muheni kuti: ‘Ufwengi,’ ndipu iyu watuwaku ku ubudi waki ndi kwamba kuchita vinthu vakwenere kweniso vaurunji, . . . iyu walutirizgengi kuja ndi umoyu.” Pavuli paki Yehova wangukamba so kuti: “Iyu wazamumbika mulandu cha chifukwa cha maubudi ngo wanguchita.” (Ezeki. 33:14-16) Kweni ŵanthu wo achitanga kali vinthu mwaurunji, atenere cha kuŵanaŵana kuti Yehova wazakuŵalanga cha asani sonu achitiya dala vinthu viheni. Yehova wangukamba kuti asani munthu “wayamba kuthemba urunji waki ndi kuchita vinthu viheni, ntchitu zaki zaurunji zazamukumbukika cha, kweni wazamukufwa chifukwa cha vinthu viheni vo wachita.”—Ezeki. 33:13.

8. Kumbi Yehova walongo so wuli kuti ndi murunji?

⁸ Yehova walongo so kuti ndi murunji chifukwa iyu watcheŵeska dankha ŵanthu wechendapereki cheruzgu. Ezekiyeli wangwamba  ntchitu yaki kweche vyaka 6 kuti Ababiloni abwanganduwi Yerusalemu. Kweni Ezekiyeli ndiyu wenga munthu wakwamba cha kutcheŵeska ŵanthu aku Chiuta. Kweche vyaka vakujumpha 100 kuti Yerusalemu wabwanganduliki, Yehova wangutuma achimi nge Hoseya, Yesaya, Mika, Odedi ndi Yeremiya kuti aje nge alonda. Yehova wangutuma Yeremiya kuti wakumbusi Ayisirayeli kuti: “Ndinguŵika alonda wo angukamba kuti, ‘Vwisiyani kuliya kwa mbata!’” (Yere. 6:17) Mwaviyo, Yehova kweniso ŵanthu wo ŵenga nge alonda, ŵengavi mulandu wewosi wa ndopa za ŵanthu wo angufwa Ababiloni ŵati apereka cheruzgu chaku Yehova.

9. Kumbi Yehova wangulongo wuli chanju chambula kumala?

⁹ Chanju: Yehova wangulongo kuti we ndi chanju chambula kumala mwakutuma alonda kuti atcheŵesi ŵanthu arunji kweniso aheni wo amukwiyisanga ndipuso kufipiska zina laki. Kumbukani kuti Ayisirayeli aziŵikanga kuti mbanthu aku Yehova, kweni kaŵikaŵi amulazganga msana ndipu asopanga achiuta aboza! Yehova wangulongo kuti vo Ayisirayeli achitanga vingumupweteka ukongwa chifukwa wanguŵayeruzgiya ndi “munthukazi wachigololu.” (Ezeki. 16:32) Chinanga kuti venga viyo, Yehova wanguŵajowo mwaliŵi cha. Iyu wakhumbanga kuŵaweze cha, kweni wakhumbanga kuti awere kwaku iyu. Venivi vilongo kuti Yehova wakhumbanga kulanga ŵanthu ŵaki cha, kweni wakhumbanga kuti asinthi. Ntchifukwa wuli tikamba viyo? Iyu wangukambiya Ezekiyeli kuti: “Ndikondwa cha ndi nyifwa ya munthu muheni, kweni ndikondwa asani munthu muheni wasintha nthowa yaki ndipu walutirizga kuja ndi umoyu.” (Ezeki. 33:11)  Venivi ndivu Yehova wakhumbanga, ndipu chinanga ndi sonu ndivu wakhumba.—Mala. 3:6.

10, 11. Kumbi mo Yehova wachitiyanga vinthu ndi ŵanthu ŵaki, vititisambizanji?

¹⁰ Kumbi tingasambiranji pa urunji kweniso chanju cho Yehova wangulongo Ayisirayeli? Chakwamba, tisambirapu kuti ŵanthu wo titiŵapharazgiya tingaŵayeruzganga wosi pamoza nge chigulu cha, kweni tiŵanaŵaniyengi munthu weyosi pakuyija. Mbumampha cha kuyeruzga munthu kuti wangavwisiya cha uthenga wo tipharazga chifukwa cha vo wachitanga kali, mtundu waki, ndi mukavu pamwenga ngwakukhupuka kweniso chifukwa cha chineneru chaki! Yehova wangusambiza wakutumika Peturo sambiru lakukhumbika ukongwa lo leche kugwira ntchitu mpaka msanawale lakuti: “Chiuta walivi sankhu, kweni iyu walondere munthu wakutuliya mu mtundu wewosi yo watimuwopa ndi kuchita urunji.”—Machi. 10:34, 35.

¹¹ Chinthu chinyaki chakukhumbika cho tisambirapu ntchakuti tikhumbika kuphwere ukongwa, ndipu tingaŵanaŵananga cha kuti chifukwa chakuti kali tachitanga vinthu vamampha, tilangikengi cha sonu chinanga tingachita vinthu viheni. Titenere kukumbuka kuti mwakuyanana ndi ŵanthu wo titiŵapharazgiya, nasi te akubuda. Vo wakutumika Paulo wangukambiya mpingu wa ku Korinto, nasi vititikwaska. Iyu wangukamba kuti: “Yo waŵanaŵana kuti wama, waphwere kuti wangawa. Palivi mayeseru ngo ngakuwiyani ngakuluska ngo ngawiya ŵanthu wosi.” (1 Akori. 10:12, 13) Kweniso tikhumbika cha kuja munthu yo ‘wathemba urunji waki,’ ndi kwamba kuŵanaŵana kuti tingachita vinthu viheni ndipu tilangikengi cha chifukwa  tichita vinthu vamampha. (Ezeki. 33:13) Kwali tateŵete Yehova kwa nyengu yitali wuli, tikhumbika kulutirizga kuja ŵanthu akujiyuyuwa kweniso akuvwiya.

12. Kumbi titenere kukumbukanji asani kuvuli tinguchitapu maubudi ngakulungakulu?

¹² Nanga wuli asani kuvuli tinguchitapu maubudi ngakulungakulu kweni titijimba mbwenu mulandu? Uthenga waku Ezekiyeli utitisambiza kuti Yehova wazamulanga ŵanthu ambula kulapa. Kweniso tisambira kuti Yehova ndi Chiuta wakuweze cha, kweni ndi Chiuta wachanju. (1 Yoha. 4:8) Asani vakuchita vidu vilongo kuti tikulapa, tikhumbika cha kuŵanaŵana kuti maubudi ngidu ngakulu ukongwa mwakuti Chiuta wangatigowoke cha. (Yako. 5:14, 15) Yehova wenga wakukhumbisiska kugowoke mtundu wa Ayisirayeli, wo wenga nge munthukazi wachigololu. Mwaviyo nasi wangatondeka cha kutigowoke.—Salimo 86:5.

13, 14. (a) Kumbi alonda aku Yehova akhumbikanga kupharazga uthenga wuli? (b) Kumbi Yesaya wangupharazga uthenga wuli?

¹³ Ŵerengani Ezekiyeli 33:2, 3. Kumbi alonda aku Yehova akhumbikanga kupharazga uthenga wuli? Ntchitu yawu yikulu yenga yakupereka uthenga wakutcheŵeska. Kweni yiwu apharazganga so uthenga wamampha. Tiyeni tiwoni vakuyeruzgiyapu.

¹⁴ Yesaya yo wanguteŵete kutuwa mu 778 mpaka 732 B.C.E., wangutcheŵeska kuti Ababiloni abwanganduwengi Yerusalemu ndipu atoliyengi ŵanthu ku ukapolu. (Yesa. 39:5-7) Kweni Yehova wangumukambiya so kuti walembi kuti: “Vwisiya! Alonda ŵaku adaniriza. Mwakukoliyana, adaniriza mwalikondwa, pakuti azamuwona ndi masu ngawu Yehova wachiweziyapu so Ziyoni.” (Yesa. 52:8) Yapa, Yesaya wangupharazga uthenga wamampha wakuti kusopa kwauneneska kuweriyengepu!

15. Kumbi Yeremiya wangupharazga uthenga wuli?

¹⁵ Yeremiya yo wanguteŵete kutuwa mu 647 mpaka 580 B.C.E., kanandi ŵanthu awona nge kuti “wapharazganga ŵaka soka.” Tikayika cha kuti wanguyesesa kutcheŵeska Ayisirayeli wo achitanga vinthu viheni kuti Yehova waŵawisiyengi soka. * Kweni iyu wapharazganga so uthenga wamampha, chifukwa wangukambiya limu kuti ŵanthu aku Chiuta, azamuwere so kucharu chawu ndipu amukwamba so kusopa kwauneneska.—Yere. 29:10-14; 33:10, 11.

16. Kumbi ŵanthu wo ŵenga ku ukapolu ku Babiloni anguyanduwa wuli ndi uthenga waku Ezekiyeli?

¹⁶ Ezekiyeli wangusankhika kuja nge mulonda mu 613 B.C.E., ndipu wangugwira ntchitu yeniyi mpaka cha mu ma 591 B.C.E. Nge mo tinguwone mu Mutu 5 ndi 6, Ezekiyeli watcheŵeskanga Ayisirayeli mwaphamphu vakukwaskana ndi soka lo lenga pafupi kuŵawiya. Venivi vinguchitiska kuti iyu waŵevi mulandu wa ndopa za ŵanthu wo angubayika. Yapa Ezekiyeli watcheŵeskanga Ayuda wo ŵenga ku ukapolu kuti Yehova walangengi Ayisirayeli ampatuku wo ŵenga ku Yerusalemu. Kweniso vo iyu wanguchita vinguwovya wo ŵenga ku ukapolu ku Babiloni kuti aje pa ubwezi wakukho ndi Yehova ndipuso kuti anozgeke ntchitu yo atingi azigwirengi kunthazi. Kukumaliya kwa vyaka 70, Yehova wanguweze ŵanthu ŵaki ku charu cha Isirayeli. (Ezeki. 36:7-11) Ŵanthu ŵenaŵa, ŵenga ŵana ndi azuku a ŵanthu  wo anguvwiya vo Ezekiyeli wakambanga. Nge mo mitu yinyaki ya mu Chigaŵa 3 yilongore, Ezekiyeli wangupharazga uthenga wamampha wo wasimikiziyanga kuti kusopa kwauneneska kuweriyengepu ku Yerusalemu.

17. Kumbi Yehova wasankhanga alonda pa nyengu niyi?

¹⁷ Kumbi achimi ŵenaŵa wo angulongoro ndi ŵanthu aku Chiuta Yerusalemu wechendabwanganduliki mu 607 B.C.E., ndiwu pe wo Yehova wanguŵagwiriskiya ntchitu nge alonda? Awa. Nyengu zosi asani Yehova wakhumba kuti khumbu laki lifiskiki, iyu wasankhanga alonda kuti atcheŵeskengi ŵanthu aheni kweniso kuti apharazgi uthenga wamampha.

18. Kumbi ndi ntchitu wuli yo Yohane Mubatizi wangugwira?

¹⁸ Yohane Mubatizi nayu wangugwira ntchitu ya mulonda. Iyu wangutcheŵeska ŵanthu a mu nyumba yaku Isirayeli kuti kwaja kamanavi kuti Yehova waŵakani. (Mate. 3:1, 2, 9-11) Kweni iyu wangugwira so ntchitu yinyaki. Yesu wangukamba kuti Yohane wenga “muthenga” yo wangukambikiya limu yo wangunozga nthowa yaku Mesiya. (Mala. 3:1; Mate. 11:7-10) Uthenga unyaki wo wangupharazga wenga wakuti Yesu yo ndi “Mwanawambereri waku Chiuta” waza ndipu watuzgengepu “ubudi wa charu.”—Yoha. 1:29, 30.

19, 20. Kumbi Yesu ndi akusambira ŵaki angugwira ntchitu ya ulonda mu nthowa wuli?

¹⁹ Pa alonda wosi, Yesu ndiyu wenga wakuluska wosi. Mwakuyanana ndi Ezekiyeli, nayu Yehova wangumutuma ku “nyumba yaku Isirayeli.” (Ezeki. 3:17; Mate. 15:24) Yesu wangutcheŵeska Ayisirayeli kuti Yehova waja kamanavi kuŵakana ndipu Yerusalemu wabwangandulikengi. (Mate. 23:37, 38; 24:1, 2; Luka 21:20-24) Kweni ntchitu yaki yikulu yenga ya kupharazga uthenga wamampha.—Luka 4:17-21.

²⁰ Pa nyengu yo wenga pacharu chapasi, Yesu wangukambiya akusambira ŵaki kuti: “Lutirizgani kuja masu.” (Mate. 24:42) Yiwu anguvwiya vo Yesu wanguŵatcheŵeska ndipu anguja nge alonda, atcheŵeskanga ŵanthu kuti Yehova wayikana nyumba yaku Isirayeli kweniso tawuni ya Yerusalemu. (Aro. 9:6-8; Aga. 4:25, 26) Mwakuyanana ndi alonda wo ŵengaku kali, nawu angupharazga so uthenga wamampha. Uthenga wo apharazganga, wasazgangapu uthenga wakukondwesa wakuti ŵanthu amitundu yinyaki, nawu so ajengi Isirayeli wauzimu waku Chiuta ndipu nawu ajengi ndi mwaŵi wakuwovyana ndi Khristu pa kuweziyapu kusopa kwauneneska pacharu chapasi.—Machi. 15:14; Aga. 6:15, 16; Chivu. 5:9, 10.

21. Kumbi Paulo wangulongo chakuwoniyapu wuli?

²¹ Pa gulu la ŵanthu wo ŵenga alonda mu nyengu ya akutumika, wakutumika Paulo ntchakuwoniyapu chamampha ukongwa. Iyu wawonanga kuti udindu waki ngwakukhumbika ukongwa. Mwakuyanana ndi Ezekiyeli, iyu wanguziŵa kuti wajengi ndi mulandu wa ndopa asani walekengi kufiska ntchitu yaki. (Machi. 20:26, 27) Nge mo alonda anyaki achitiyanga, Paulo nayu watcheŵeskanga ŵanthu ndi kupharazga uthenga wamampha. (Machi. 15:35; Aro. 1:1-4) Mwakulongozgeka ndi mzimu wakupaturika, iyu wanguko mazu ngo ngakulembeka ndi Yesaya ngakuti: “Hati kutowa maphazi nga  munthu yo watenda pachanya pa mapiri kuti wazi ndi uthenga wamampha.” Ndipu iyu wangugwiriskiya ntchitu mazu ngenanga pakukonkhoska ntchitu yakupharazga vakukwaskana ndi Ufumu waku Chiuta yo akusambira aku Khristu achitanga.—Yesa. 52:7, 8; Aro. 10:13-15.

22. Ntchinthu wuli cho chinguchitika akutumika wosi ŵati afwa?

²² Akutumika wosi ŵati afwa, mu mpingu wachikhristu munguzaza ŵanthu a mpatuku wo angukambikiya limu. (Machi. 20:29, 30; 2 Ate. 2:3-8) Pati pajumpha nyengu yitali, Akhristu aboza wo ŵenga nge duru anguŵa anandi ukongwa kuluska Akhristu auneneska wo ŵenga nge tirigu. Ndipu venivi vinguchitiska kuti uthenga wamampha wa Ufumu waku Chiuta ujalizgiki ndi visambizu vaboza. (Mate. 13:36-43) Kweni nyengu yati yakwana yakuti Yehova wachitepu kanthu, iyu wangulongo so chanju chaki kweniso urunji waki mwa kusankha alonda kuti apereki uthenga wakutcheŵeska kweniso apharazgi uthenga wamampha. Kumbi alonda ŵenaŵa ŵenga ayani?

23. Kumbi Mubali C. T. Russell ndi anyaki angugwira ntchitu wuli?

²³ Chaka cha 1914 chechendafiki, Charles Taze Russell ndi anyaki angugwira so ntchitu nge “muthenga” yo ‘wangunozga nthowa’ Ufumu waku Mesiya wechendajalikiskiki. * (Mala. 3:1) Ŵanthu ŵenaŵa angugwira so ntchitu ya mulonda mwakugwiriskiya ntchitu magazini ya Zion’s Watch Tower and Herald of Christ’s Presence,  kuti atcheŵeski ŵanthu kuti Chiuta wayeruzgengi charu kweniso kuti apharazgi uthenga wamampha wa Ufumu waku Chiuta.

24. (a) Kumbi kapolu wakugomezgeka wagwira ntchitu ya mulonda mu nthowa wuli? (b) Kumbi mwasambiranji pa vakuwoniyapu va alonda a mu nyengu yakali? (Wonani tchati chakuti “Alonda Anyaki a Chakuwoniyapu Chamampha.”)

²⁴ Ufumu wati wajalikiskika, Yesu wangusankha kagulu kanyaki ka ŵanthu kuti ateŵete nge kapolu wakugomezgeka. (Mate. 24:45-47) Kutuliya pa nyengu yeniyi, kapolu wakugomezgeka, yo sonu waziŵika so kuti Wupu Wakulongozga, wagwira ntchitu nge mulonda. Wupu Wakulongozga wenuwu, ulongozga pa ntchitu yakutcheŵeska ŵanthu vakukwaskana ndi “zuŵa lakuweze nduzga” kweniso ulongozga pakupharazga “chaka chaku Yehova chakuchitiya ŵanthu lisungu.”—Yesa. 61:2; wonani so 2 Akorinto 6:1, 2.

25, 26. (a) Kumbi ndi ntchitu wuli yo Akhristu wosi atenere kugwira, nanga ntchitu yeniyi yigwirika wuli? (b) Kumbi tisambirengenji mu Mutu 12?

²⁵ Pa nyengu yo kapolu wakugomezgeka walongozga pa ntchitu ya mulonda, Yesu wakukambiya akusambira ŵaki “wosi” kuti ‘alutirizgi kuja masu.’ (Mariko 13:33-37) Tivwiya dangu lenili asani tilutirizga kuja masu mwauzimu, mwakugwiraku ntchitu ya mazuŵa nganu ya mulonda. Tilongo kuti te masu asani tifiska udindu widu wakupharazga. (2 Timo. 4:2) Kumbi ntchinthu wuli cho chititiwovya kuti tigwirengi ntchitu yeniyi? Chinthu chinyaki cho chititiwovya ntchakuti tikhumbisiska kutaska maumoyu nga ŵanthu. (1 Timo. 4:16) Pambula kuswera yapa, ŵanthu anandi atayengi maumoyu ngawu chifukwa chakuleka kuvwiya pa nyengu yo mulonda wa mazuŵa nganu watcheŵeska. (Ezeki. 3:19) Kweni cho isi tikhumbisiska kuchita, nkhupharazga uthenga wamampha wakuti kusopa kwauneneska kwawezekiyapu! Sonu panu, mu “chaka chaku Yehova chakuchitiya ŵanthu lisungu,” khomu ndakujulika kuti ŵanthu anandi akoliyani nasi pa kusopa Yehova Chiuta widu, yo ndi murunji kweniso wachanju. Pambula kuswera yapa, ŵanthu wosi wo azamupona pa kumala kwa vakuchitika va mu nyengu yiheni iyi, azamuyanduwa ndi ulamuliru wamampha wa Mwana waki Khristu Yesu. Nasi titenere kuyesesa kuwovyaku pa ntchitu yo mulonda wa mazuŵa nganu wagwira, ya kukambiya ŵanthu uthenga wamampha wenuwu!—Mate. 24:14.

²⁶ Chinanga ndi sonu po umaliru wa nyengu yiheni iyi wechendazi, Yehova watovya ŵanthu ŵaki kuti akoliyanengi. Mu Mutu 12, tikambiskanengi uchimi wakukwaskana ndi timiti tiŵi wo ulongo mo venivi vafiskikiya.