Mugwiriskiyengi ntchitu maukaboni ngauneneska. Fundu zinu zituliyengi m’Mazu Ngaku Chiuta, ndipu asani mphakwenere muŵerengengi kutuliya m’Bayibolu. Asani mukhumba kugwiriskiya ntchitu ukaboni wa sayansi, nkhani zo mwavwa pamwenga kuŵerenga, vo vinguchitikiyapu ŵanthu anyaki pamwenga maukaboni nganyaki, wonesesani kuti ngauneneska nadi kweniso kuti fundu zaki zechekugwira ntchitu.

Mugwiriskiyengi ntchitu maukaboni mwakwenere. Asani mukhumba kukonkhoska lemba, vo mungakamba vikoliyanengi ndi nkhani ya pa lemba lo, uthenga wosi wa m’Bayibolu kweniso mabuku ngo “kapolu wakugomezgeka ndi wazeru” walemba. (Mate. 24:45) Asani mukhumba kugwiriskiya ntchitu mabuku nganyaki, mungasinthanga cha mazu nga m’buku lo pamwenga kukamba vinthu vakupambana ndi vo mweneku wa buku lo wakulemba.

Wovyani akuvwisiya kuvwisa vo mwaŵerenga. Asani mwaŵerenga lemba pamwenga buku linyaki, mufumbengi mafumbu mwazeru pamwenga mungakamba chakuwoniyapu kuti akuvwisiya avwisi fundu yinu.