SAMBIRU 39
Mo Chiuta Wawone Ndopa
Ndopa zakukhumbika ukongwa. Palivi munthu yo wangaja ndi umoyu kwambula ndopa. Chiuta we ndi wanangwa wakutikambiya mo tingagwiriskiya ntchitu ndopa chifukwa iyu ndiyu Mlengi widu. Kumbi iyu wakukambanji pa nkhani ya ndopa? Kumbi tingarya pamwenga kuŵikika ndopa? Nanga mungachita wuli kuti musankhengi umampha pa nkhani yeniyi?
1. Kumbi Yehova watiziwona wuli ndopa?
Mu nyengu yakali, Yehova wangukambiya ateŵeti ŵaki kuti: “Umoyu wa nyama yeyosi ndi ndopa zaki.” (Levitiko 17:14) Yehova wawona kuti ndopa zimiya umoyu. Chifukwa chakuti umoyu ngwakupaturika ndipu ndi mphasu yakutuliya kwaku Chiuta, ndopa nazu zakupaturika.
2. Kumbi Chiuta wakaniza kugwiriskiya ntchitu ndopa mu nthowa nizi?
Yehova wangukambiya ŵanthu wo amusopanga mu nyengu yakuvuli Chikhristu chechendayambi kuti angaryanga cha ndopa. (Ŵerengani Genezesi 9:4 ndipuso Levitiko 17:10.) Pati pajumpha nyengu, iyu wangulongo kuti dangu lenili lechekugwira ntchitu, chifukwa wupu wakulongozga ungukambiya Akhristu kuti: “Mulutirizgi kukana . . . ndopa.”—Ŵerengani Machitidu 15:28, 29.
Kumbi kukana ndopa kung’anamuwanji? Asani dokotala wangakukambiyani kuti muleki moŵa, mungawamu waka mwija kuti wang’anamuwa kuti muleki kumwa moŵa. Kweni kumbi mungarya chakurya cho kwe moŵa pamwenga mungajihoma tholora wa moŵa? Tikayika kuti mungachita venivi. Mwakuyanana waka, dangu laku Chiuta lakuti tikani ndopa, ling’anamuwa kuti tikhumbika cha kumwa ndopa pamwenga kurya nyama yambula kuchinja pakhosi. Kweniso tikhumbika cha kurya chakurya chechosi cho asazgaku ndopa.
Nanga tingachita wuli pa nkhani ya chovyu cha kuchipatala? Nthowa zinyaki zo agwiriskiya ntchitu kuchipatala, ziwoneke limu kuti zituswa dangu laku Chiuta. Nthowa zenizi zisazgapu kuŵika munthu ndopa pamwenga vigaŵa vikuluvikulu va ndopa. Vigaŵa venivi ndi maselu ngayera, maselu ngatuŵa, maselu ngo ngatovya kuti ndopa zileki kulutirizga kutuwa kweniso maji nga mundopa. Kweni pe so nthowa zinyaki zo munthu wakhumbika kusankha yija vakuchita a chifukwa paziŵika umampha cha kuti munthu watuswa dangu laku Chiuta pamwenga cha. Mwakuyeruzgiyapu, pe nthowa zinyaki zo agwiriskiya ntchitu tivigaŵa timanatimana ta ndopa to tituliya ku vigaŵa vikuluvikulu va ndopa. Ndipuso pe nthowa zinyaki zo agwiriskiya ntchitu ndopa zakuwamweni.—Agalatiya 6:5.
SAMBIRANI VINANDI
Wonani vo mungachita pakusankha chovyu cha kuchipatala cho chikwaskana ndi ndopa.
3. Musankhengi chovyu cha kuchipatala cho chingakondwesa Yehova
Kumbi mungachita wuli kuti pakusankha chovyu cha kuchipatala musankhengi vo vikoliyana ndi mo Chiuta wawone ndopa? Woneriyani VIDIYO, pavuli paki kambiskanani kukhumbika kwa kuchita vinthu vo valembeka mumphata.
-
Kupemphera kwaku Chiuta kuti wakupaskeni zeru.—Yakobe 1:5.
-
Kufufuza fundu za mu Bayibolu ndi kuzigwiriskiya ntchitu.—Nthanthi 13:16.
-
Kufufuza chovyu cho chiperekeka kuvipatala va muchigaŵa cho muja.
-
Kuziŵiya limu chovyu cho muwona kuti ntchambula kuzomerezeka.
-
Kuwonesesa kuti njuŵi yinu yikusuzgeningi cha chifukwa cha vo musankhengi.—Machitidu 24:16. b
-
Kuziŵa kuti palivi munthu yo wakhumbika kukusankhiyani vinthu vo tisankha mwakukoliyana ndi njuŵi yidu,—kaya wangaŵa yo mukutorana nayu, mura mumpingu pamwenga yo watikusambizani Bayibolu.—Aroma 14:12.
-
Kukhumbika kwa kulemba vo mwasankha.
4. Akaboni aku Yehova akhumbisiska kulonde chovyu chamampha ukongwa cha kuchipatala
Munthu wangafiska kuvwiya dangu laku Chiuta lakukwaskana ndi ndopa, chifukwa pe nthowa zinyaki zamampha ukongwa zambula kugwiriskiya ntchitu ndopa. Woneriyani VIDIYO.
Ŵerengani Tito 3:2, pavuli paki kambiskanani fumbu ili:
-
Ntchifukwa wuli tikhumbika kukambiskana mwaulemu ndipuso mwakuzika ndi madokotala?
|
Vakukanizika |
Vo Mkhristu wangasankha yija |
|---|---|
|
A. Maji nga mundopa |
Tivigaŵa ta maji nga mundopa |
|
B. Maselu ngatuŵa |
Tivigaŵa ta maselu ngatuŵa |
|
C. Maselu ngo ngatovya kuti ndopa zileki kulutirizga kutuwa |
Tivigaŵa ta maselu ngo ngatovya kuti ndopa zileki kulutirizga kutuwa |
|
D. Maselu ngayera |
Tivigaŵa ta maselu ngayera |
5. Asani agwiriskiyengi ntchitu tivigaŵa timanatimana ta ndopa
Ndopa ze ndi vigaŵa vikuluvikulu vinayi, vo ndi maselu ngayera, maselu ngatuŵa, maselu ngo ngatovya kuti ndopa zileki kulutirizga kutuwa kweniso maji nga mundopa. Vigaŵa vikuluvikulu venivi ve ndi tivigaŵa tinandi ukongwa timanatimana. c Tinyaki mwa tivigaŵa timanatimana teniti atitigwiriskiya ntchitu pakupanga munkhwala kweniso atitigwiriskiya ntchitu kuti ndopa zileki kulutirizga kutuwa asani munthu wapwetekeka.
Pa nkhani ya tivigaŵa timanatimana ta ndopa, Mkhristu weyosi wakhumbika kusankha yija mwakukoliyana ndi njuŵi yaki yakusambizika fundu za mu Bayibolu. Anyaki angakana chovyu cha kuchipatala pamwenga munkhwala wo ukupangika mwakugwiriskiya ntchitu tivigaŵa timanatimana ta ndopa. Kweni anyaki njuŵi yawu yingaŵazomereza.
Asani musankha vakuchita pa nkhani iyi, mujifumbengi fumbu ili:
-
Asani dokotala wangandifumba, kumbi ndingafiska kumukonkhoske chifukwa cho ndizomere pamwenga ndikaniya tivigaŵa tinyaki timanatimana ta ndopa?
MUNTHU MUNYAKI WANGAFUMBA KUTI: “So pe suzgu wuli kuŵikika ndopa?”
-
Kumbi yimwi muwona wuli?
KUMBI MWASAMBIRANJI?
Yehova wakhumba kuti tiwonengi kuti ndopa zakupaturika.
Kuweriyamu
-
Ntchifukwa wuli Yehova wawona kuti ndopa zakupaturika?
-
Kumbi tiziŵa wuli kuti dangu laku Chiuta lakukaniza ndopa, ling’anamuwa so kuti tikhumbika cha kuŵikika ndopa?
-
Kumbi mungachita wuli kuti musankhengi umampha chovyu cha kuchipatala cho chisazgapu ndopa?
FUFUZANI
Kumbi ndi fundu nizi zo mukhumbika kuŵanaŵaniya asani musankha chovyu cho agwiriskiya ntchitu ndopa zinu?
“Vo Akuŵerenga Afumba” (Chigongwi cha Alinda, October 15, 2000)
Kumbi mukhumbika kuŵanaŵaniya fundu nizi asani mukhumba kuzomera tivigaŵa timanatimana ta ndopa?
“Vo Akuŵerenga Afumba” (Chigongwi cha Alinda, June 15, 2004)
Kumbi ntchinthu wuli cho chinguchitiska dokotala munyaki kuti wayambi kugomezga kuti dangu laku Yehova pa nkhani ya ndopa ndakuvwika?
“Ndinguvwisa Chifukwa cho Chiuta Watitikaniziya Ndopa” (Jani Masu!, December 8, 2003)
Wonani mo ŵara wo ateŵete mu Makomiti Ngakukambiskana ndi Achipatala atovye abali ndi azichi.
a Wonani Sambiru 35, “Vo Vingakuwovyani Kuti Musankhengi Umampha Vinthu.”
b Wonani kamutu kanambala 5 mu sambiru lenili kakuti, “Asani Agwiriskiyengi Ntchitu Tivigaŵa Timanatimana ta Ndopa”; Fundu Yakukumaliya 3, “Nthowa za Kuchipatala zo Agwiriskiya Ntchitu Ndopa”; kweniso Uteŵeti Widu wa Ufumu wa Chichewa November 2006 peji 3-6.
c Madokotala nganyaki ngawona kuti vigaŵa vikuluvikulu vinayi va ndopa, navu so nthivigaŵa timanatimana. Mwaviyo, mukhumbika kuŵakonkhoske kuti mukusankha kuleka kuŵikika ndopa kweniso maselu ngayera, maselu ngatuŵa, maselu ngo ngatovya kuti ndopa zileki kulutirizga kutuwa ndipuso maji nga mundopa.
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
