SAMBIRU 08
Mungaja Bwezi Laku Yehova
Yehova wakhumba kuti mumuziŵi umampha. Chifukwa wuli? Iyu waziŵa kuti mungaja nayu pa ubwezi asani mungayiziŵa umampha mijalidu yaki, nthowa zaki ndipuso khumbu laki. Kumbi muwona kuti vingachitika kuti muje pa ubwezi ndi Chiuta? (Ŵerengani Salimo 25:14.) Kumbi mungachita wuli kuti muje bwezi laki? Bayibolu limuka mafumbu ngenanga kweniso lilongo kuti kuja pa ubwezi ndi Yehova nkhwakukhumbika ukongwa kuluska kuja pa ubwezi ndi munthu munyaki weyosi.
1. Kumbi Yehova watikupemphani kuti muchitenji?
“Ndereni kufupi ndi Chiuta, ndipu nayu wanderengi kufupi ndi yimwi.” (Yakobe 4:8.) Kumbi venivi ving’anamuwanji? Yehova watikupemphani kuti muje nayu pa ubwezi. Anyaki awona kuti mphakusuzga kugomezga kuti angaja pa ubwezi ndi Chiuta chifukwa chakuti atimuwona cha. Kweni Yehova watitivumbuliya mijalidu yaki yosi kuziya mu Mazu ngaki Bayibolu kuti timuziŵi umampha kweniso kuti tije nayu pa ubwezi. Asani tiŵerenga uthenga wo Chiuta wakutilembe mu Bayibolu, tija nayu pa ubwezi wakukho chinanga kuti techendamuwonepu.
2. Ntchifukwa wuli Yehova ndiyu bwezi lamampha kuluska bwezi lelosi lo mungaŵa nalu?
Palivi munthu munyaki yo watikuyanjani ukongwa kuluska Yehova. Iyu wakhumba kuti mukondwengi kweniso mukambiskanengi nayu nyengu yeyosi yo mungakhumbiya chovyu. Kweniso “[mungamuponye] vosi vo vitikufipiskani mtima, chifukwa iyu watikuŵanaŵaniyani.” (1 Peturo 5:7) Yehova ngwakunozgeka nyengu zosi kuwovya ndipuso kupembuzga mabwezi ngaki. Iyu wavwisiya so asani alongoro nayu.—Ŵerengani Salimo 94:18, 19.
3. Kumbi Yehova wakhumba kuti tichitengenji kuti tije mabwezi ngaki?
Yehova watanja munthu weyosi, “kweni waja pa ubwezi wakukho ndi munthu wakunyoloka.” (Nthanthi 3:32) Yehova wakhumba kuti mabwezi ngaki ngayesesengi kuchita vinthu vamampha kweniso ngangachitanga cha vinthu viheni. Ŵanthu anyaki awona kuti angafiska cha kuchita vo Yehova wakhumba ndipuso kuleka kuchita vinthu viheni. Kweni Yehova ngwalisungu. Iyu walondere munthu weyosi yo watimuyanja nadi ndipu wayesesa kuchita vinthu vo vitimukondwesa.—Salimo 147:11; Machitidu 10:34, 35.
SAMBIRANI VINANDI
Ziŵani so vinthu vinyaki vo mungachita kuti muje bwezi laku Yehova, ndipuso ziŵani chifukwa cho tingakambiya kuti iyu ndi bwezi lamampha kuluska bwezi lelosi lo mungaŵa nalu.
4. Abrahamu wenga bwezi laku Yehova
Nkhani ya mu Bayibolu yaku Abrahamu (yo wadanikanga so kuti Abramu) yititiwovya kuvwisa vo ving’anamuwa kuja bwezi laku Chiuta. Ŵerengani nkhani yaku Abrahamu pa Genezesi 12:1-4. Pavuli paki kambiskanani mafumbu yanga:
-
Kumbi Yehova wangukambiya Abrahamu kuti wachitenji?
-
Kumbi Yehova wangumulayizganji?
-
Nanga Abrahamu wanguchita wuli ndi vo Yehova wangumukambiya?
5. Vo Yehova wakhumba kuti mabwezi ngaki ngachitengi
Weyosi wakhumba kuti mabwezi ngaki ngachitengi vinthu vo vingamukondwesa.
-
Kumbi ndi vinthu wuli vo mungayanja kuti anyinu akuchitiyeningi?
Ŵerengani 1 Yohane 5:3, pavuli paki kambiskanani fumbu ili:
-
Kumbi Yehova wakhumba kuti mabwezi ngaki ngachitengenji?
Kuti tilongo kuti tivwiya Yehova, tikhumbika kusintha mijalidu yidu. Ŵerengani Yesaya 48:17, 18, pavuli paki kambiskanani fumbu ili:
-
Ntchifukwa wuli Yehova wapempha mabwezi ngaki kuti ngasinthi mijalidu yawu?
Bwezi lamampha lingatikambiya kuti tichitengi vinthu vo vingativikiliya ndipuso vo vingatiwovya. Yehova nayu wachita so viyo ndi mabwezi ngaki
6. Vo Yehova wachitiya mabwezi ngaki
Yehova watovya mabwezi ngaki kuti ngakunthiyengepu masuzgu. Woneriyani VIDIYO, pavuli paki kambiskanani fumbu lo le mumphata.
-
Kumbi Yehova wangumuwovya wuli munthukazi yo tawona mu vidiyo kuti waleki kusuzgika maŵanaŵanu?
Ŵerengani Yesaya 41:10, 13, pavuli paki kambiskanani mafumbu yanga:
-
Kumbi Yehova wakamba kuti wangachitiyengenji mabwezi ngaki ngosi?
-
Kumbi muwona kuti Yehova wangaŵa bwezi lamampha? Ntchifukwa wuli muwona viyo?
Bwezi chayilu litikuwovya asani wakumana ndi suzgu. Yehova nayu wachita viyo.
7. Kuti tije pa ubwezi ndi Yehova tikhumbika kuti tikambiskanengi nayu ndipuso tivwisiyengi vo iyu wakamba
Ubwezi ukho ukongwa asani ŵanthu akambiskana. Ŵerengani Salimo 86:6, 11, pavuli paki kambiskanani mafumbu yanga:
-
Kumbi tingakambiskana nayu wuli Yehova?
-
Nanga Yehova wakambiskana nasi wuli?
Isi tilongoro ndi Yehova kuziya mu pempheru, ndipu nayu walongoro nasi kuziya mu Bayibolu
ŴANTHU ANYAKI AKAMBA KUTI: “Vingachitika cha kuti munthu waje pa ubwezi ndi Chiuta.”
-
Kumbi ndi lemba nili lo yimwi mungagwiriskiya ntchitu kuti mulongo kuti tingaja pa ubwezi ndi Chiuta?
KUMBI MWASAMBIRANJI?
Yehova wakhumba kuja bwezi linu ndipu wakuwovyeningi kuti muje nayu pa ubwezi.
Kuweriyamu
-
Kumbi Yehova watingawovya wuli mabwezi ngaki?
-
Ntchifukwa wuli Yehova wakambiya mabwezi ngaki kuti ngasinthi mijalidu yawu?
-
Kumbi muwona kuti vo Yehova wapempha mabwezi ngaki kuti ngachitengi vakusuzga ukongwa? Ntchifukwa wuli muwona viyo?
FUFUZANI
Kumbi kuja pa ubwezi ndi Chiuta kungakuwovyani wuli?
“Yehova Ndi Chiuta Yo Tikhumbika Kumuziŵa” (Chigongwi cha Alinda, February 15, 2003)
Ziŵani vo mungachita kuti muje pa ubwezi ndi Chiuta.
Wonani chifukwa cho munthukazi munyaki wawone kuti ubwezi waki ndi Yehova ukutaska umoyu waki.
Vwisiyani vo achinyamata angukamba vakukwaskana ndi Yehova.
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
