SAMBIRU 10
Kumbi Maunganu nga Akaboni aku Yehova Ngangakuwovyani Wuli?
Kumbi mukuwunganapu ndi Akaboni aku Yehova? Asani mukuwunganapu nawu cha, panyaki mungachita mantha kuwungana nawu kakwamba. Mungajifumba kuti: ‘Kumbi ntchinthu wuli chichitika pa maunganu ngawu? Ntchifukwa wuli maunganu ngenanga ngakukhumbika ukongwa? Ntchifukwa wuli ndikhumbika kuti nkhasanirikepu?’ Mu sambiru ili muwonengi mo maunganu ngangakuwovyiyani kuti muje pa ubwezi wakukho ndi Chiuta kweniso mo ngangakuwovyiyani yimwi pakumwija.
1. Ntchifukwa wuli tikhumbika kuwungana?
Munthu munyaki yo wakulembaku Bayibolu wangukamba chifukwa chikulu cho tikhumbikiya kuwungana. Iyu wangukamba kuti: “Ndithamikengi Yehova mu mpingu ukulu.” (Salimo 26:12) Mwakuyanana waka, Akaboni aku Yehova nawu akondwa ukongwa kuwungana pamoza. Pacharu chosi chapasi, yiwu awungana sabata yeyosi kuti athamiki Chiuta, ambi sumu kweniso kuti apempheri. Yiwu awungana so pamoza pa maunganu ngakulungakulu.
2. Kumbi mwamusambiranji ku maunganu ngidu?
Pa maunganu ngidu tisambira Mazu ngaku Chiuta ‘kweniso kukonkhoska vo ngang’anamuwa.’ (Ŵerengani Nehemiya 8:8.) Ku maunganu ngidu mwamusambira vakukwaskana ndi Yehova kweniso mijalidu yaki yamampha. Maunganu ngakukuwovyani kuziŵa kuti Iyu watikuyanjani ukongwa ndipu venivi vakuwovyani kuti muje nayu pa ubwezi wakukho. Mwamusambira so mo Yehova wangakuwovyiyani kuti vinthu vikuyendiyeningi umampha.—Yesaya 48:17, 18.
3. Kumbi ŵanthu wo mungachikumana nawu ku maunganu ngidu angakuwovyani wuli?
Yehova watitikambiya kuti “tiŵanaŵaniyanengi kuti tichiskiyani ku chanju ndi ku ntchitu zamampha, ndipu tingalekanga cha kuwungana pamoza.” (Aheberi 10:24, 25) Pa maunganu ngidu mwamukumana ndi ŵanthu wo atanjana kutuliya pasi pa mtima kweniso wo akhumbisiska kusambira vinandi vakukwaskana ndi Chiuta nge yimwi. Asani mungaluta mwamukuvwa achikamba fundu zakuchiska zakutuliya mu Bayibolu. (Ŵerengani Aroma 1:11, 12.) Mwamusaniya mwaŵi wakucheza ndi ŵanthu wo ŵe pa banja ndipuso anyaki ambula kuto pamwenga kuyirwa. Ŵanthu ŵenaŵa angachikukambiyani mo amaliyana ndi masuzgu pa umoyu wawu. Venivi ndi vinyaki mwa vifukwa vo Yehova wakhumbiya kuti tiwunganengi nyengu zosi.
SAMBIRANI VINANDI
Ziŵani vo vichitika pa maunganu nga Akaboni aku Yehova ndipuso chifukwa cho mutenere kuyesese kuti musanirikengepu pa maunganu ngenanga.
4. Maunganu nga Akaboni aku Yehova
Mu nyengu ya akutumika, Akhristu awungananga nyengu zosi kuti asopengi Yehova. (Aroma 16:3-5) Ŵerengani Akolose 3:16, pavuli paki kambiskanani fumbu ili:
-
Kumbi Akhristu a mu nyengu yakali amusopanga wuli Yehova?
Mazuŵa nganu napu, Akaboni aku Yehova awungana nyengu zosi pamalu ngawu ngakusopiyapu. Kuti muziŵi vo vichitika pa maunganu ngawu, woneriyani VIDIYO. Pavuli paki wonani chithuzi cha mpingu wo wawungana, ndipu kambiskanani mafumbu yanga:
-
Kumbi vo vichitika pa Nyumba ya Ufumu viyanana wuli ndi vo taŵerenga pa Akolose 3:16?
-
Mu vidiyo yo tawonere pamwenga pa chithuzi cho tawona, kumbi chilipu cho chakukondwesani pa nkhani ya maunganu?
Ŵerengani 2 Akorinto 9:7, pavuli paki kambiskanani fumbu ili:
-
Ntchifukwa wuli Akaboni aku Yehova apemphesa ndalama cha pa maunganu ngawu?
Kambiskanani vo vamuchitika pa maunganu nga sabata yinu ndi yo watikusambizani Bayibolu.
-
Kumbi ntchigaŵa nichi cha unganu cho chakukondwesani ukongwa?
Kumbi muziŵa?
Pa jw.org, mungasaniyapu malu kweniso nyengu yo maunganu ngidu ngachitikiya pacharu chosi chapasi.
-
Pa maunganu ngidu pakambika nkhani ndipuso paja vakuyeruzgiyapu ndi mavidiyo. Maunganu ngenanga ngatamba ndipuso kumala ndi sumu kweniso pempheru
-
Pa vigaŵa vinyaki va maunganu ngidu ŵanthu apempheka kuti amukepu
-
Weyosi ngwakulondereka, kaya ngwa pabanja pamwenga cha, arara ndipuso ŵana
-
Maunganu ngidu ngawezi. Akaboni aku Yehova atendesa mbali ya mpasku cha
5. Pakhumbika kuyesesa kuti munthu wasanirikengi pa maunganu
Ŵanaŵaniyani vo vachitikanga mu banja lo Yesu wangukuliya. Kuti akasaniriki pa phwandu lo lachitikanga pa chaka ku Yerusalemu, yiwu akhumbikanga kwenda ulendu wa mazuŵa pafufupi ngatatu kutuwa ku Nazareti. Yiwu ayendanga munthowa yamapiri. Ŵerengani Luka 2:39-42, pavuli paki kambiskanani mafumbu yanga:
-
Ntchifukwa wuli muwona kuti akhumbikanga kuyesesa kuti akafiki ku Yerusalemu?
-
Ntchifukwa wuli namwi mukhumbika kuyesesa kuti musanirikengi pa maunganu?
-
Kumbi muwona kuti mukhumbika kuchita nadi venivi? Ntchifukwa wuli muwona viyo?
Bayibolu likamba kuti kuwungana pamoza kuti tisopi Yehova nkhwakukhumbika ukongwa. Ŵerengani Aheberi 10:24, 25, pavuli paki kambiskanani fumbu ili:
-
Ntchifukwa wuli tikhumbika kuwungana nyengu zosi?
ŴANTHU ANYAKI AKAMBA KUTI: “Palivi chifukwa chakuwungana ndi ŵanthu anyaki. Kusambira Bayibolu kunyumba nkhwakukwana.”
-
Kumbi ndi lemba nili, pamwenga ntchakuwoniyapu nichi cha mu Bayibolu cho chilongo kuti Yehova wakhumba kuti tiwunganengi?
KUMBI MWASAMBIRANJI?
Kusanirika pa maunganu kukuwovyeningi kuti musambiri vinandi vakukwaskana ndi Yehova, muje pa ubwezi wakukho ndi iyu kweniso kuti mumusopengi limoza ndi anyinu.
Kuweriyamu
-
Ntchifukwa wuli Yehova watitichiska kuti tiwunganengi pamoza?
-
Kumbi mwamusambiranji pa maunganu nga Akaboni aku Yehova?
-
Kumbi muwona kuti kusanirika pa maunganu kungakuwovyani so wuli?
FUFUZANI
Kumbi mungachita wuli asani muchita mantha kusanirika pa maunganu nga Akaboni aku Yehova? Wonani vo vinguwovya munthu munyaki yo wachitanga mantha kuti wayambi kwanja maunganu.
Wonani mo wachinyamata wangukondwe ndi maunganu kweniso vo wanguchita kuti walutirizgi kusanirika pa maunganu.
Wonani mo anyaki avwiya mumtima asani asanirika pa maunganu.
“Ntchifukwa Wuli Ndikhumbika Kusanirika pa Maunganu ku Nyumba ya Ufumu?” (Nkhani ya pa webusayiti)
Wonani mo munthu munyaki yo wenga mugulu la vigeŵenga wangusinthiya wati wawungana ndi Akaboni aku Yehova.
“Ndayendanga Cha Kwambula Futi” (Nkhani ya mu Chigongwi cha Alinda)
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
