Pa lemba la 1 Ŵakorinte 6:1-8, wakutumika Paulo wangukonkhoska mo Akhristu angachitiya asani apambana maŵanaŵanu pa vifukwa vinyaki. Paulo, wangulongo kuti wanguguŵa chifukwa cha vo Akhristu anyaki a ku Korinte achitanga, yiwu alutanga ndi milandu ku “ŵaziraurunji mumalu mwaku ŵakupaturika.” (Vesi 1) Paulo wangukamba vifukwa vakuvwika vo Akhristu akhumbikiyanga cha kutoliyana kukhoti m’malu mwaki akhumbikanga kugwiriskiya nchitu fundu zo zinguperekeka ku mipingu. Tiyeni tikambiskani vifukwa vinyaki vo vinguchitiska kuti Paulo wapereki ulongozgi wenuwu ndipu pavuli paki, tikambiskanengi so nkhani zinyaki zo zikukonkhoskeka cha mu ulongozgi wenuwu.

Asani tapambana maŵanaŵanu ndi Mkhristu munyidu pa nkhani ya bizinesi, chakwamba titenere kufufuza ulongozgi wa m’Malemba. (Nthanthi 14:12) Nge mo Yesu wangukambiya, mbumampha kumaliska nkhani mwaliŵi yechendakuwi. (Mateyu 5:23-26) Kweni nchachitima kuti Akhristu anyaki amizgiriya ukongwa pa maŵanaŵanu ngawu ndipu atole Akhristu anyawu ku khoti. Paulo wangukamba kuti: “Kutole mlandu kumphara zakubwaru yumoza pa munyaki nchifukwa chakutondeka kwa umoyu winu wachikristu.” Nchifukwa wuli iyu wangukamba viyo? Chifukwa chikulu nchakuti, kuchita viyo, kungananga mbiri ya mpingu ndipuso yaku Chiuta yo tisopa. Mwaviyo, nyengu zosi titenere kukumbuka fumbu lo Paulo wangufumba kuti: “Chifukwa chine muleka kuvwiyapu uheni [kuzomerezga kukunangiyani]?”—Vesi 7.

Paulo wangukamba so kuti, Chiuta wakujalikiska ndondomeku yamampha m’mpingu yakumaliskiya nkhani. Ŵara achikhristu ŵe ndi zeru chifukwa cha uneneska wo asambira kutuliya m’Malemba ndipu Paulo wangukamba kuti yiwu ‘angaziŵa kweruzga pakati pa abali’ asani ndi nkhani yakukwaskana ndi “vinthu va umoyu wunu.” (Vesi 3-5) Yesu wangukonkhoska so vo tingachita asani pe nkhani zikuluzikulu. Mwakuyeruzgiyapu, asani Mkhristu wapusikiya munyaki ndipuso waba, yiwu atenere kumaliska nkhani iyi mwakugwiriskiya nchitu nthowa zitatu izi: Yakwamba, ŵanthu wo anangirana atenere kwesesa kukambiskana pakuŵija. Asani nthowa yakwamba yatondeka adaniyepu kaboni yimoza pamwenga  ŵaŵi ndipu asani nthowa yachiŵi yatondeka, atenere kuluta ndi nkhani yo ku mpingu kuti yikakambiki ndi ŵara.—Mateyu 18:15-17.

Mbuneneska kuti ŵara achikhristu ndi maloya cha pamwenga ŵanthu abizinesi, ndipu atenere cha kuchita vinthu nge ŵanthu ŵenaŵa. Asani Akhristu apambana maŵanaŵanu pa nkhani ya bizinesi, ŵara atenere cha kuŵakambiya vo akhumbika kuchita. Kweni yiwu akhumbika kovya Akhristu wo, kuti agwiriskiyi nchitu ulongozgi wa m’Malemba ndipuso kuti amaliski nkhani yo mwachimangu. Pa nkhani zakusuzga, ŵara angakonkhoske nkhani yo wakuwonere dera pamwenga ofesi ya nthambi. Kweni pe nkhani zinyaki zo zikukonkhoskeka cha m’ulongozgi waku Paulo. Zinyaki mwa nkhani zenizi tazilemba m’ndimi zamumphata.

Pa vakuchitika vinyaki, munthu wangaluta ku khoti chifukwa chakulondo dangu pamwenga asani pe nkhani yinyaki yo wapenja kuti yimali umampha kweniso mwachimangu. Mwakuyeruzgiyapu munthu wangaluta kukhoti, asani wakhumba kumaliska nthengwa, wakhumba kuti amupasi wanangwa wakuti ndiyu wakalerengi ŵana, wakhumba kuziŵa ndalama zo walondiyengi mwezi ndi mwezi kutuliya kwaku yo wenga murumu waki pamwenga muwolu waki asani nthengwa yamala, kuti amupaski ndalama za inshulansi zo watenere kulonde chifukwa cha masuzgu nganyaki, kuŵikika pa mundandanda wa ŵanthu wo atenere kulonde ndalama asani kampani yo wagwirangaku nchitu yamala ndipuso kuzomerezgeka kulonde vinthu pamwenga ndalama za m’bali waki yo wakufwa. Pangaŵa so vakuchitika vinyaki vo Mkhristu wangasankha kuluta kukhoti kuti wajivikiriyi. *

Asani Mkhristu wachita viyo pa vifukwa vamampha ndikuti wasuskana cha ndi chilatu cha ulongozgi wo takambiskana m’nkhani yinu. * Chinthu chakukhumbika ukongwa ku Mkhristu, nkhutoweska zina laku Yehova ndipuso kuti mumpingu muŵi chimangu ndi kukoliyana. Ŵanthu wo alondo Khristu, aziŵika chifukwa chakwanjana, ndipu “chanju . . . chilembe vaku chija cha.”—1 Ŵakorinte 13:4, 5; Yohane 13:34, 35.