KUMBI utichiziŵa chinthu chakwamba cho Nowa wanguchita, iyu ndi banja laki ŵati atuwa m’chingaraŵa? Iyu wangupereka sembi kwaku Chiuta. Ukhoza kuwona mo wangupereke sembi iyi pachithuthuzi ichi. Nowa wangupereka sembi ya nyama pakuwonga Chiuta chifukwa cha kupozomoska banja laki panyengu ya zandi.

Kumbi uŵanaŵana kuti Yehova wangukondwa ndi sembi yaku Nowa? Ee, wangukondwa nayu. Mwaviyo, wangulayizga Nowa kuti wazakuchinanga so cha charu ndi maji nga zandi.

Charu chati chakamuka, Nowa ndi banja laki angutuwa m’chingaraŵa, ndipu angwamba kuzenga nyumba ndi kulima. Chiuta wanguŵatumbika ndipu wanguti: ‘Mubalani, mwandane ndipu muzazi charu chosi chapasi.’

Kweni ŵanthu atingi azichitengi mantha kuvwa kuti kwenga zandi mukulu ndipu atingi aŵanaŵanengi kuti panyaki wazengi so. Mwaviyo, Chiuta wanguŵika chinthu chinyaki kuti chiŵakumbuskengi phanganu laki lakuti, wazamunanga so cha charu chosi ndi maji. Kumbi utichiziŵa chinthu cho wanguŵika? Chenga chiŵingavuwa.

Nyengu zinandi chiŵingavuwa chiwoneka asani vuwa yakata ndipuso asani lumwi layamba kuŵala. Chiŵingavuwa chendi mitundu yinandi yakutowa. Kumbi iwi ukuchiwonapu chiŵingavuwa? Kumbi utichiwona cho che pachithuthuzi ichi?

Chiuta wangukamba kuti: ‘Ndilayizga kuti ndazamunanga so cha ŵanthu wosi pamoza ndi nyama ndi maji nga zandi. Ndiŵika chiŵingavuwa changu mu mtambu. Asani chiŵingavuwa chiwoneka mu mtambu, ndikumbukengi phanganu langu.’

Kumbi asani uwona chiŵingavuwa, chitenere kukukumbuskani chinthu wuli? Chitenere kukukumbuska vo Chiuta wakulayizga, kuti wazamunanga so cha charu ndi zandi mukulu.