CHIGAŴA 2
Mugomezgekengi kwa Munthu yo Mukutolana Nayu
“Chenicho Chiuta wamanga pamoza, munthu waleki kupatuwa.”
Yehova wakhumba kuti taŵanthu tijengi ‘akugomezgeka.’ (Sumu 31:23) Kugomezgeka nkhwakukhumbika ukongwa munthengwa chifukwa kutovya kuti mugomezganengi. Ndipu chanju chikuwa ukongwa asani mwaŵanthu akutorana mugomezgana.
Mazuŵa nganu, ŵanthu akutorana anandi agomezgeka cha. Kuti nthengwa yinu yileki kuwayawaya, mutenere kwesesa kuchita vinthu viŵi.
1 MUCHITENGI VINTHU VAKULONGO KUTI NTHENGWA YINU NJAKUZIRWA UKONGWA
VO BAYIBOLO LIKAMBA: “Lereskani kaunthu po mutende, nge mbambura zeru cha, kweni nge mbazeru, ŵakujiwombole nyengu, pakuti ngaheni mazuŵa ngo.” (Ŵaefesu 5:15, 16) Nthengwa yinu ye m’gulu la vinthu vakukhumbika ukongwa pa umoyu winu. Mwaviyo, muyiwonengi kuti njakuzirwa ukongwa.
Yehova wakhumba kuti muŵanaŵaniyengi ukongwa munthu yo mukutolana nayu ndipuso kuti ‘mukondwengi ndi umoyu pamoza’ nayu. (Wakutaula 9:9) Iyu wakhumba cha kuti muswayanengi, kweni muchitengi vinthu vo vingakuwovyani kuti mukondweskanengi. (1 Ŵakorinte 10:24) Munthu yo mukutolana nayu wajivwengi kuti ngwakukhumbika ndipuso mumulumbengi.
VO MUNGACHITA:
-
Muwonesesengi kuti nyengu zosi musaniya nyengu yakucheze ndi munthu yo mukutolana nayu, kwambula kutimbanyizgika ndi vinthu vinyaki vevosi
-
Nyengu zosi asani mukhumba kuchita vinthu mukumbukengi kuti mwe mwija cha kweni mwe ŵaŵi
2 MUVIKIRIYENGI MTIMA WINU
VO BAYIBOLO LIKAMBA: “Yosi wakulereska munthukazi kumukhumbira, wareŵa nayu kali mumtima waki.” (Mateyu 5:28) Asani munthu walutirizga kuŵanaŵana vinthu va ureŵi, tingakamba kuti iyu ngwambula kugomezgeka kwa munthu yo wakutorana nayu.
Yehova wakamba kuti mukhumbika ‘kusunga [“kuvikiriya,” NW] mtima winu.’ (Nthanthi 4:23; Yeremiya 17:9) Kuti mufiski kuchita ivi, mutenere kuvikiriya masu nginu. (Mateyu 5:29, 30) Yesesani kwezga Jobu yo wangupangana ndi masu ngaki kuti wangawonanga munthukazi munyaki cha ndi chilatu chakumudaŵira. (Jobu 31:1) Mungayesiyanga ndi dalavi cha kuja ndi mtima wakukhumba kuwonere vinthu vamusiku. Ndipu tcheŵani kuti mungamalikiyanga munthu munyaki yo ndi muwolu pamwenga murumu winu cha.
VO MUNGACHITA:
-
Muchitengi vinthu vo vingawovya kuti ŵanthu aziŵengi kuti mutanja yo mukutolana nayu ndi mtima winu wosi
-
Asani mutanjana ndi ŵanthu wo munthu yo mukutolana nayu wawona kuti mbamampha cha, muŵanaŵaniyengi ukongwa mo iyu wavwiya ndipu mungalutirizganga cha kwanjana nawu
Mungayanja Kuŵerenga so Nkhani Izi
CHIGONGWI CHA MLINDA
Mutumbikengi Munthu yo Mukutorana Nayu
Kumbi munthulumi pamwenga munthukazi angakambiskana wuli mwaulemu?
