Asani panyumba tasaniyapu mwana, timukambiyengi kuti tikhumba kukambisana ndi apapi ŵaki. Ivi vilongo kuti titumbika apapi ŵaki. (Nthanthi 6:20) Tingazomelanga cha asani mwana watitikambiya kuti tisele m’nyumba. Asani apapi ŵaki taŵasaniya cha tingachiwe so nyengu yinyaki.

Asani mwana yo tasaniya ngwa vyaka va pakati pa 16 mpaka 19, tingamupempha kuti tikambisani ndi apapi ŵaki. Asani apapi ŵaki atuwapu, tingamufumba asani atimuzomeleza kuŵerenga mabuku ngo wakhumba. Asani atimuzomeleza tingamugaŵiya buku pamwenga magazini kweniso tingamulongo webusayiti yidu ya jw.org.

Asani taweliyaku kuti tikakambisani ndi wachinyamata yo wangulongo kuti wakhumba kuziŵa vinandi, titenere kupempha kuti tikumani ndi apapi ŵaki. Ivi vitiwovyengi kuti tikonkhosi chifukwa cho taziya ndi kuŵalongo ulongozi wa m’Bayibolu wo ungawovya mabanja. (Sumu 119:86, 138) Kutumbika apapi ndipuso kuŵaŵanaŵaniya kungatiwovya kuti tipharazgiyi banja losi.—1 Pet. 2:12.