FUMBU 7
Kumbi ndi Vinthu Nivi vo Vichitika Mazuŵa Nganu vo Bayibolu Likukambiya Limu?
“Mtundu wazamuyukiyana ndi mtundu unyaki, ufumu ndi ufumu unyaki . . . Vosi ivi vazamuja kwamba ŵaka kwa masuzgu nge urwirwi wa pakubala.”
“Kwazamubuka achimi aboza anandi ndipu azamulandizga ŵanthu anandi; ndipuso chifukwa chakuti ŵanthu anandi azamuleka kuvwiya marangu, chanju cha anandi chazamuzizira.”
“Asani mwazivwa viwawa vankhondu ndi mbiri zankhondu, mungaziwopanga cha. Vinthu ivi vitenere kuchitika, kweni umaliru wazamuja kuti wechendazi.”
“Kwazamuchitika vidilirisi vikuluvikulu ndipu mumalu ngakupambanapambana mwazamuja nja ndi milili. Kwazamuwoneka vinthu vakofya ndipu kuchanya kwazamukuŵa visimikizu vikulu.”
“Mu mazuŵa ngakumaliya, kuŵengi nyengu zakusuzga ukongwa. Pakuti ŵanthu azamuja akujiyanja, akwanja ndalama, akujiŵikamu, akujikuzga, akunyoza, ambula kuvwiya apapi, ambula kuwonga, ambula kugomezgeka, ambula chanju chakuwa nachu, ambula kukoliyana ndi anyawu, akukamba vinthu viheni va ŵanthu anyaki, ambula kujiko, akofya, akutinkha vamampha, akupereka anyawu, ambula kuvwa va anyawu, akujitukumuwa chifukwa cha kunyada, akwanja vakukondwesa mumalu mwakwanja Chiuta, akuwoneka nge mbakujipereka kwaku Chiuta kweni nthazi yakujipereka kwenuku atiyikana.”
