Yobu 29:1-25
29 Yobu wangulutirizga* kukamba kuti:
2 “Mphanyi ndenga nge mo ndajaliyanga mu myezi yo yajumpha,Mu mazuŵa ngo Chiuta wenga mulonda wangu,
3 Pa nyengu yo wanguchitiska kuti nyali yaki yimbulikengi pamutu wangu,Po ndajumphanga mu mdima chifukwa cha ukweru waki,+
4 Pa nyengu yo* ndenga ndeche mnyamata,Pa nyengu yo ubwezi wangu ndi Chiuta wavwikanga muhema langu,+
5 Pa nyengu yo Wanthazizosi wenga weche nani,Po ŵana* ŵangu wosi angundizunguliya,
6 Pa nyengu yo maphazi ngangu ngasambanga mumafuta ngakutuliya ku mkaka,Kweniso po mya yandipunguliyanga mafuta.+
7 Pa nyengu yo ndayanjanga kuluta pageti la tawuni+Ndipu ndajanga mubalaza la tawuni.+
8 Asani anyamata andiwona, apetukiyanga kumphepeti,*Ndipu chinanga mbanthu akukota asokanga, kweniso alutirizganga kuma wima.+
9 Alongozgi awopanga kulongoro nani,Yiwu akonga pa milomu yawu.
10 Mazu nga ŵanthu akutchuka ngavwikanga cha;Lilimi lawu lakaniriyanga kuchanya kwa milomu yawu.
11 Weyosi yo wandivwanga wakambanga vinthu vamampha vakukwaskana ndi ini,Ndipu wo angundiwonapu andichitiyanga ukaboni.
12 Pakuti ndataskanga munthu mukavu yo wapemphanga chovyu,+Kweniso mwana wambula awisi ndipuso weyosi yo wengavi wakumuwovya.+
13 Munthu yo waja kamanavi kunangika wanditumbikanga,+Ndipu ndachitiskanga kuti mtima wa choko ukondwi.+
14 Ndavwalanga urunji nge chakuvwala changu;Ndipu urunji wangu wenga nge mkhanju* kweniso mphumphu.
15 Ndenga nge masu ku ŵanthu ambula kuwonaKweniso nge malundi ku ŵanthu akupunduka.
16 Ndenga wusewu wa ŵanthu akavu;+Ndafufuzanga nkhani ya ŵanthu wo ndalekanga kuŵaziŵa.+
17 Ndaphwanyanga chavu cha munthu wakunanga+Ndipu ndamutayisanga nyama yo wako kuti yituweku ku jinu laki.
18 Ndayanjanga kukamba kuti, ‘Ndazamufwiya munyumba yangu,*+Ndipu mazuŵa ngangu ngajengi nganandi nge mchenga.
19 Misisi yangu yithazengi mumaji,Ndipu dungwi lijengi pamphanda zangu usiku wosi.
20 Unkhankhu wangu uweriyapu kamanakamana,Ndipu uta wo we mujanja langu ulutirizgengi kuponya mivi.’
21 Ŵanthu avwisiyanga mwakuphwere,Ajanga phee, achilindizga ulongozgi wangu.+
22 Asani ndalongoro, aŵangavi so mazu;Mazu ngangu ngaserenga umamphaumampha* mumakutu ngawu.
23 Andilindizganga nge mo alindizgiya vuwa;Ayasamanga milomu yawu nge kuti ayasamiya vuwa yakumaliya.+
24 Asani ndaŵamwetuliya, yiwu agomezganga cha;Ukweru wa chisku changu waŵachiskanga.*
25 Ndaŵapaskanga ulongozgi nge mutu wawu,Ndipu ndajanga nge fumu pakati pa magulu ngaki nga asilikali,+Kweniso nge munthu yo wapembuzga wo aliya.+
Mazu Ngam'mphata
^ Mazu ngaki chayingu, “wangulutirizga nthanthi yaki ndipu wangukamba kuti.”
^ Mazu ngaki chayingu, “Mu mazuŵa ngo.”
^ Pamwenga kuti, “ateŵeti.”
^ Mazu ngaki chayingu, “abisamanga.”
^ Pamwenga kuti, “ mkhanju wapanthuwa.”
^ Mazu ngaki chayingu, “muchizimbu changu.”
^ Mazu ngaki chayingu, “nganthonyiyanga.”
^ Yapa pangafwatulikiya so kuti, “Ukweru wa chisku changu awufipiskanga cha.”
