Yobu 24:1-25
24 “Ntchifukwa wuli Wanthazizosi waleka kuŵikiya limu nyengu?+
Ntchifukwa wuli ŵanthu wo atimuziŵa atiliwona cha zuŵa laki?*
2 Ŵanthu andereza mphaka;+Ndipu atuba mbereri ndi kuzikhweme kumalu ngawu ngakuliskaku viŵetu.
3 Atchimbiza bulu wa ŵana ambula awusewuNdipu alonda choko ng’ombi yaki yinthulumi kuti yije chikoli.+
4 Atutuzga ŵanthu akavu kuti atuwemu mumsewuŴanthu akusuzgika a pacharu abisama asani aŵawona.+
5 Akavu apenjapenja chakurya nge mo achitiya abulu a mudondu+ muchipululu;Yiwu apenja chakurya cha ŵana ŵawu muchipululu.
6 Yiwu akolola mumunda wa munthu munyaki*Ndipu atondo vo vajaliya mumunda wa mphereska wa munthu muheni.
7 Yiwu aja nkhuli usiku wosi kwambula kuvwala;+Alivi chakuvwala chakuti chiŵavikiliyi ku mphepu.
8 Azumbwa ndi vuwa ya mumapiri;Akaniriya ku mya chifukwa chakusoŵa pakubisama.
9 Mwana wambula awisi atimukwamphuwaku ku be;+Ndipu ato vakuvwala va munthu mukavu kuti vije chikoli,+
10 Atiŵachichizga kuti ayendengi nkhuli kwambula kuvwala,Kweniso ndi nja, uku apinga ntchinda za mbewu.
11 Yiwu avuka mumizeri yakusendemuka uku lumwi litotcha ndi msana;*Akanda mphereska kweni aja ndi nyota.+
12 Ŵanthu wo atufwa alutirizga kutamantha mutawuni;Wo apwetekeka ukongwa adaniriza kuti awovyeki,+Kweni vosi ivi Chiuta wativiwona kuti vakwenere.*
13 Pe ŵanthu wo agarukiya ukweru;+Atiziziŵa cha nthowa zaki,Ndipu nthowa zaki atizilondo cha.
14 Munthu yo wabaya ŵanthu wayuka usikusiku;Iyu wabaya munthu wakusuzgika kweniso mukavu,+Ndipu ndi usiku watuba.
15 Jisu la munthu wachigololu lilindizga kuti kufipi,+Ndipu wakamba kuti, ‘Palivi yo wandiwonengi!’+
Iyu wabenekere chisku chaki.
16 Ndi mdima yiwu asere* munyumba za ŵanthu;Ndi msana atijijaliya munyumba.
Yiwu mbalendu ku ukweru.+
17 Pakuti kwaku yiwu, mlenji uyanana ŵaka ndi mdima ukulu;Yiwu akuviziŵiliya vinthu vakofya va mu mdima ukulu.
18 Kweni yiwu atoleka mwaliŵiliŵi ndi maji.*
Chigaŵa chawu cha charu chiŵengi chakutembeka.+
Yiwu aweriyengeku so cha kuminda yawu ya mphereska.
19 Nge mo chilala kweniso chifundizi vituzgiyapu maji nga sinoo,*Ndimu so Dindi* lituzgiyapu ŵanthu akubuda.+
20 Anyina amuluwengi;* ndipu mphorozgi zichitengi phwandu paku iyu.Iyu wakumbukikengi so cha.+
Ndipu vinthu vambula urunji vazamufyoka nge chimiti.
21 Chumba watichitombozga,Ndipu choko watichichitiya nkhaza.
22 Chiuta* wagwiriskiya ntchitu nthazi zaki kuti watuzgepu ŵanthu anthazi;Chinanga angasoka, kweni akayikiya kuti angaja ndi umoyu.
23 Chiuta* watiŵaleka kuti ajithembengi kweniso ajiwonengi kuti mbakuvikilirika,+Kweni jisu laki lilereska pa chechosi cho achita.*+
24 Yiwu akwezeka kwa kanyengu kamanavi, pavuli paki, aŵaku so cha.+
Asisika+ ndipuso awunganisika nge munthu weyosi;Yiwu adumulika nge songu za mbewu.
25 Sonu ndiyani yo wangakamba kuti ndipusika?Pamwenga yo wangasuska vo ndakamba?”
Mazu Ngam'mphata
^ Kung’anamuwa zuŵa laki la cheruzgu.
^ Yapa pangafwatulikiya so kuti, “akolola vakurya va viŵetu mumunda.”
^ Yapa pangafwatulikiya so kuti, “Yiwu akama mafuta mumizeri yakusendemuka.”
^ Yapa pangafwatulikiya so kuti, “Chiuta wayeruzga munthu weyosi cha kuti ngwakunanga.”
^ Mazu ngaki chayingu, “atuswa ndi kusere.”
^ Mazu ngaki chayingu, “Iyu watoleka mwaliŵiliŵi pachanya pa maji.”
^ Sinoo ndi maji ngakukhoma ngo ngawoneka tuu nge mche wakusilirika ndipu ngatuwa kutuliya kuchanya.
^ Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
^ Mazu ngaki chayingu, “Chibaliru chimuluwengi.”
^ Mazu ngaki chayingu, “Iyu.”
^ Mazu ngaki chayingu, “Iyu.”
^ Mazu ngaki chayingu, “pa nthowa zawu.”
