Yeremiya 48:1-47
-
Uchimi wakukwaskana ndi Mowabu (1-47)
48 Yehova wa mizinda, Chiuta waku Isirayeli wakamba uthenga wakukwaskana ndi Mowabu+ kuti:
“Soka kwaku Nebo,+ pakuti wabwangandulika!
Kiriyatayimu+ walengeseka kweniso watoleka.
Malu ngakuthaŵiyaku ngakuvikilirika* ngalengeseka kweniso ngasweka.+
2 Yiwu aleka kuthamika Mowabu.
Ku Heshiboni+ amunozge chiŵembu kuti wawi, yiwu akamba kuti:
‘Zani, tiyeni timumali kuti waleki kuja mtundu.’
Yiwi nawi Madimeni, ja cheti,Pakuti lipanga litikulondo.
3 Kuvwika chiwawa cha kuliya kutuliya ku Horoneyamu,+Chiwawa cha kubwanganduka kweniso kuwa kukulu.
4 Mowabu wabwangandulika.
Ŵana ŵaki aliya.
5 Yiwu alutirizga kuliya achikwera pamalu ngapachanya nga Luhiti.
Ndipu achisika kutuliya ku Horoneyamu, atuvwa kuliya chifukwa cha soka.+
6 Thaŵani, taskani umoyu winu!
Jani nge chimiti cha junipa muchipululu.
7 Pakuti uthemba ntchitu zaku kweniso chuma chaku,Nawi wazamukoleka.
Ndipu Kemoshi+ wazamutoleke ku ukapolu,Limoza ndi asembi ŵaki kweniso alongozgi ŵaki akuzirwa.
8 Wakubwanganduwa wazengi mutawuni yeyosi,Ndipu palivi tawuni yo yiponengi.+
Dambu lazamumala,Ndipu malu ngachinyeti* ngazamumala, nge mo Yehova wakambiya.
9 Muŵikiyeni chiziŵisu Mowabu,Pakuti wachisambuka mahami wazamuthaŵa,Ndipu matawuni ngaki ngazamusambuka chinthu chakuchitiska mantha,Ngambula ŵanthu.+
10 Ngwakutembeka munthu yo wagwira ndi mtima wosi cha ntchitu yaku Yehova!
Ngwakutembeka munthu yo waweza lipanga laki kuti waleki kudira ndopa!
11 Amowabu aja kwambula kutimbanyizgika kutuliya pa unamana wawu,Nge vinyu yo wadama.
Yiwu akupungulikapu cha kutuliya muchiyaŵi chinyaki kuluta muchiyaŵi chinyaki,Ndipu ŵechendalutepu ku ukapolu.
Ndichu chifukwa chaki kunowa kwawu kwasintha cha,Ndipuso kununkhira kwawu kwasintha cha.
12 “‘Mwaviyo awonani! mazuŵa ngatuza,’ Yehova ndiyu wakamba, ‘po ndazamutuma ŵanthu kuti aŵagadabuwi. Yiwu azakuŵagadabuwa ndi kudira vinthu vo ve muviyaŵi vawu ndipu azamukuswa misuku yawu yikuluyikulu.
13 Amowabu azamuchita soni chifukwa chaku Kemoshi, nge mo a munyumba yaku Isirayeli achitiya soni chifukwa chaku Beteli, yo athembanga.+
14 Mukamba wuli kuti: “Te vinkhara, tanozgeka kuchita nkhondu”?’+
15 ‘Mowabu wabwangandulika,Matawuni ngaki angayukiya,+Ndipu anyamata ŵawu anthazi abayika,’+
Fumu ndiyu yakamba, yo zina laki ndi Yehova wa mizinda.+
16 Soka liziyengi Amowabu pambula kuswera,Ndipu kubwangandulika kwawu kwe pafupi ukongwa.+
17 Ŵanthu wosi wo aŵazunguliya, azakuŵachitiya chitima,Ŵanthu wosi wo aziŵa zina lawu.
Akambiyeni kuti: ‘Hati mo nthonga yanthazi yafyoke, nthonga yakutowa!’
18 Tuwapu pamalu ngaku ngaunkhankhu,Ndipuso ja pasi uku we ndi nyota,* yiwi mwana munthukazi yo waja mu Diboni,+Pakuti wakubwanganduwa Mowabu waza kuzikuyukiya,Ndipu iyu wabwanganduwengi malu ngaku nga mipanda yakukho.+
19 Umi mumphepeti mwa msewu ndi kuwona, yiwi wakuja mu Aroweri.+
Fumba munthulumi kweniso munthukazi yo wathaŵa, kuti, ‘Kwawanji?’
20 Mowabu walengeseka ndipuso wachita mantha.
Tenjeni ndi kuliya.
Pharazgani mu Arinoni+ kuti Mowabu wabwangandulika.
21 Chiuta wayeruzga malu ngachinyeti,*+ wayeruzga Holoni, Yahazi+ ndi Mefayati;+
22 wayeruzga Diboni,+ Nebo + ndi Beti-dibilatayimu;
23 wayeruzga Kiriyatayimu,+ Beti-gamuli ndi Beti-meyoni;+
24 wayeruzga Keriyoti+ ndi Bozira; kweniso wayeruzga matawuni ngosi nga mucharu cha Mowabu, ngakutali ndipuso ngapafupi.
25 ‘Nthazi zaku Mowabu zadumulika;*Janja laki lafyoka,’ Yehova ndiyu wakamba.
26 ‘Muloŵereseni,+ pakuti wajikweza kuti walimbani ndi Yehova.+
Mowabu wakunkhuluka mumawukuzi ngaki,Ndipu iyu wasambuka chinthu chakunyozeka.
27 Kumbi Isirayeli wenga chinthu chakunyozeka cha kwaku yiwi?+
Kumbi iyu wangusanirika pakati pa ankhungu,Kuti umupukunyiyi mutu waku ndi kumunyoza?
28 Tuwanimu mumatawuni nginu, ndipu kajeni pajalawi, yimwi ŵanthu a ku Mowabu,Ndipu jani nge njiŵa yo yazenga chizimbu mumphepeti mwa chinkhwawu.’”
29 “Tavwa va kunyada kwaku Mowabu, iyu ngwakujikuzga ukongwa,Tavwa va kujiŵikamu kwaki, kunyada kwaki, kujikuzga kwaki kweniso kujikweza kwa mtima waki.”+
30 “‘Ndiziŵa ukali waki,’ Yehova ndiyu wakamba,‘Kweni vinthu vambula fundu vo wakamba vibuwengi kanthu cha.
Yiwu achitengi kanthu cha.
31 Ndichu chifukwa chaki ndiliriyengi Mowabu,Ndiliriyengi Amowabu wosiNdipuso nditamanthengi chifukwa cha ŵanthu a ku Kiri-haresi.+
32 Ndiliriyengi yiwi, chimiti cha mphereska cha ku Sibima,+Kuluska mo ndinguliriya Yazeri.+
Mphukira zaku zakubiriŵira zayambuka nyanja.
Zafika kunyanja, ku Yazeri.
Wakubwanganduwa wasikiya+Pa vipasu vaku va mu chihanya kweniso pa mphereska zaku zo wavuna.
33 Kusekere ndi likondwa, vatuzgikamu mumunda wa vipasuNdipuso mucharu cha Mowabu.+
Ndachitiska kuti vinyu waleki kutuwa mumalu ngakukandiyapu mphereska.
Palivi yo wazamukanda mphereska ndi likondwa.
Kwazamukuŵa kudaniriza kweni kwa likondwa cha.’”+
34 “‘Kuliya kutuliya ku Heshiboni,+ kuvwika mpaka ku Eleyale.+
Yiwu akweza mazu ngawu ndipu ngavwika mpaka ku Yahazi,+Kutuliya ku Zowari mpaka ku Horoneyamu,+ mpaka ku Egilati-shelishiya.
Chinanga ndi maji nga ku Nimurimu ngazamukamuka.+
35 Ŵanthu wo atuza ndi sembi pamalu ngapachanyaNdipuso wo apereka sembi kwa achiuta ŵawu,Ndazakuŵachitiska kuti amali mu Mowabu,’ Yehova ndiyu wakamba.
36 ‘Ndichu chifukwa chaki mtima wangu wazamuliriya Mowabu nge fyoliru,*+Ndipuso mtima wangu wazamuliriya ŵanthu a ku Kiri-haresi nge fyoliru.*
Pakuti chuma cho wasaniya chazamumala.
37 Pakuti munthu weyosi wameteka phala,+Ndipu mwembi wa munthu weyosi wacheketerezeka.
Janja lelosi lachekekachekeka,+Ndipu avwala vigudulu muviwunu vawu!’”+
38 “‘Kuchanya kwa nyumba zosi za ku MowabuKweniso mumabalaza nga matawuni ngaki,Mwe kuliya pe.
Pakuti ndaswa MowabuNge msuku wambula ntchitu,’ Yehova ndiyu wakamba.
39 ‘Iyu wachita mantha! Liyani!
Mowabu wawelere mwasoni!
Mowabu wasambuka chinthu chakunyozeka,Chinthu chakuchitiska mantha ku ŵanthu wosi wo amuzunguliya.’”
40 “Pakuti Yehova wakamba kuti:
‘Awonani! Nge mo nombu yisikiya pasi,+Iyu wazamutambasuliya mapapa ngaki paku Mowabu.+
41 Matawuni ngazamutoleka,Ndipuso malu ngaki ngakuvikilirika ngazamutoleka.
Mu zuŵa lenilo, mtima wa asilikali a ku MowabuWazamuja nge mtima wa munthukazi yo watuvwa urwirwi pakubala.’”
42 “‘Ndipu Mowabu wazamumala ndipu wazamuja mtundu so cha,+Pakuti wajikweza kuti walimbani ndi Yehova.+
43 Mantha, mbuna ndi viŵana ve panthazi paku,Yiwi munthu wakuja mu Mowabu,’ Yehova ndiyu wakamba.
44 ‘Munthu weyosi yo wathaŵa chifukwa cha mantha, wazamukuwa mumbuna,Ndipu weyosi yo wathaŵa mumbuna wazamuwira muchiŵana.’
‘Pakuti ndichitiskengi kuti chaka cha chilangu, chizi pa ŵanthu a ku Mowabu,’ Yehova ndiyu wakamba.
45 ‘Ŵanthu wo athaŵiya ku Heshiboni kuti avikiliriki, azamuwovyeka cha.
Pakuti motu wazamutuliya ku HeshiboniNdipu mulipu wa motu wazamutuliya mu Sihoni.+
Mulipu wo wazamupiriza chisku chaku MowabuNdipuso wazamupiriza mabwaza nga ŵana wosi anthulumi achimtimbaheka.’+
46 ‘Soka kwaku yiwi, yiwi Mowabu!
Ŵanthu aku Kemoshi+ amala.
Pakuti ŵana ŵaku anthulumi atoleke ku ukapolu,Ndipuso ŵana ŵaku anthukazi aluta ku ukapolu.+
47 Kweni mu mazuŵa ngakumaliya, ndazamuwunganisa ŵanthu a ku Mowabu wo angutoleke ku ukapolu,’ Yehova ndiyu wakamba.
‘Uthenga wa cheruzgu wakukwaskana ndi Mowabu wamaliya penapa.’”+
Mazu Ngam'mphata
^ Pamwenga kuti, “malu ngapachanya ngakuvikilirika.”
^ Pamwenga kuti, “ngafulati.”
^ Yapa pangafwatulikiya so kuti, “Ndipuso ja pasi pamalu ngakumira.”
^ Pamwenga kuti, “ngafulati.”
^ Pamwenga kuti, “Sengwi laku Mowabu ladumulika.”
^ Kung’anamuwa fyoliru yo atumba pa maliru asani aliya.
^ Kung’anamuwa fyoliru yo atumba pa maliru asani aliya.
