Masalimo 55:1-23
Kwaku yo walongozga sumu. Sumu iyi yimbiki ndi vakumbiya va vingwi. Masikili.* Sumu yaku Davidi.
55 Vwani pempheru langu yimwi Chiuta,+Ndipu mungazerezanga cha pemphu langu lakuti mundichitiyi lisungu.*+
2 Ndivwisiyeni kweniso ndimukeni.+Masuzgu ngangu ngandimala nthazi,+Ndipuso nditondeka kuŵanaŵana umampha
3 Chifukwa cha vo murwani wakamba,Kweniso chifukwa cha mo munthu muheni watindisuzgiya.
Pakuti yiwu andiwunjikiya masuzgu,Ndipuso atinditinkha mwaukali.+
4 Mtima wangu uŵaŵa ukongwa mukati mwangu,+Ndipu nditopa nyifwa.+
5 Mantha kweniso kunjekeme vandiwiya,Ndipu ndimbwakamiya ukongwa.
6 Ndikamba kuti: “Asani ndenga ndi mapapa nge nkhunda!Ndatingi ndiphululukengi ndi kuchija kumalu ngakuvikilirika.
7 Hinya! Ndatingi ndiphululukiyengi kutali ukongwa.+Ndatingi nkhajengi kuchipululu.+ (Selah)
8 Ndatingi nditchimbiriyengi kumalu ngakubisamakuKutali ndi chimphepu, kutali ndi chivuwa chachimphepu.”
9 Atimbanyizgeni yimwi Yehova, kweniso timbanyizgani vo aŵanaŵana kuchita,*+Pakuti ndawona nkhaza kweniso chiwawa mutawuni.
10 Vitenda kuzunguliya mpanda waki usiku ndi msana;Mukati mwaki mwe phuzu ndi masuzgu.+
11 Mukati mwaki mwe pharanyiku;Kukandirizgana kweniso chinyengu vituwamu cha mubalaza laki.+
12 Pakuti ndi murwani cha yo watindinyoza;+Wakaŵengi murwani ndatingi ndizizipizgengi.
Ndi murwani cha yo watindiyukiya;Wakaŵengi murwani mphanyi ndabisama kuti waleki kundiwona.
13 Kweni ndiwi, munthu nge ini,*+Mubwezi wangu yo nditimuziŵa umampha.+
14 Yiwi ndi ini tenga pa ubwezi;Tayendiyanga limoza pakuluta kunyumba yaku Chiuta pamoza ndi chigulu cha ŵanthu.
15 Pharanyiku liŵawiyi!+
Asikiyi ku Dindi* amoyu;Pakuti uheni uja pakati pawu ndipuso mukati mwawu.
16 Kweni ndidanengi Chiuta,Ndipu Yehova wanditaskengi.+
17 Mazulu, mlenji ndipuso msana ndisuzgika kweniso ndikuta,*+Ndipu iyu watuvwa mazu ngangu.+
18 Iyu wanditaskengi* ku ŵanthu wo alimbana nani ndipu wandipaskengi chimangu,Pakuti ŵanthu anandi alimbana nani.+
19 Chiuta wavwengi ndipu waŵamukengi,+Yo waja pampandu waufumu kwamba kali.+ (Selah)
Yiwu akanengi kusintha,Chifukwa atopa Chiuta cha.+
20 Iyu* wanguyukiya ŵanthu wo wenga nawu pa chimangu;+Ndipu wanguswa phanganu laki.+
21 Mazu ngaki ngakusilirika kuluska mafuta ngakutuliya ku mkaka,+Kweni mumtima mwaki mwe nkhaza.
Mazu ngaki ngakulimbwitika kuluska mafuta,Kweni nge nge lipanga lo lasoskeke muchanya.+
22 Muponye Yehova mphingu yaku,+Ndipu iyu wakuwovyengi.+
Iyu wazomerezengi cha kuti murunji wawi.*+
23 Kweni yimwi Chiuta, muŵawisiyengi muzenji litali ukongwa.+
Ŵanthu wo ŵe ndi mulandu wa ndopa kweniso aryarya afwengi ŵechendafiki hafu ya mazuŵa ngawu.+
Kweni ini, ndithembengi yimwi.
Mazu Ngam'mphata
^ Wonani Mazu ngo Ngakonkhoskeka.
^ Pamwenga kuti, “Mungabisamanga cha asani ndipemphera kuti mundiwovyi.”
^ Mazu ngaki chayingu, “kweniso keluwani malilimi ngawu.”
^ Pamwenga kuti, “munthu yo ndiyanana nayu.”
^ Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
^ Pamwenga kuti, “ndichita chiwawa.”
^ Mazu ngaki chayingu, “wandiwombongi.”
^ Kung’anamuwa munthu yo wenga mubwezi waki yo wazumbulika mu vesi 13 ndi 14.
^ Pamwenga kuti, “wayendi mbendyambendya.”
