Masalimo 35:1-28
Sumu yaku Davidi.
35 Yimwi Yehova, ndimiyeni pa mulandu wangu wakulimbana ndi wo atindisuska;+Limbanani ndi wo alimbana nani.+
2 Toni chishangu chinu chimana* kweniso chishangu chinu chikulu,+Ndipu sokani kuti mundivikiliyi.+
3 Nyamuwani mkondu winu kweniso mbavi* kuti mulimbani ndi ŵanthu wo atindiskera.+
Ndikambiyeni kuti: “Ini ndini utaski waku.”+
4 Ŵanthu wo apenja umoyu wangu achiti soni kweniso alengeseki.+
Ŵanthu wo anozga chiŵembu kuti andibayi, awelere mwasoni.
5 Yiwu aje nge mwere wo uputa ndi mphepu;Mungelu waku Yehova waŵadikisiyi kutali.+
6 Nthowa yawu yichiti mdima kweniso yiteremukiPo mungelu waku Yehova watiŵaskera.
7 Pakuti yiwu andithyiya chilepa kwambula chifukwa kuti ndiwiremu;Kweniso andikumbiya mbuna kwambula chifukwa.
8 Soka limuwiyi mwamabuchibuchi;Iyu wawiri muchilepa cho wangundithyiya;Kweniso iyu wawiyemu ndi kuparanyika.+
9 Kweni ndikondwengi mwaku Yehova;Ndikondwengi chifukwa cha ntchitu zaki za utaski.
10 Viwanga vangu vosi vikambengi kuti:
“Yimwi Yehova, ndiyani yo wangayanana namwi?
Yimwi mutaska ŵanthu ambula wakuŵawovya ku ŵanthu anthazi,+Mutaska ŵanthu ambula wakuŵawovya kweniso akavu ku ŵanthu wo atiŵabiya.”+
11 Akaboni aryarya asoka,+Atindifumba vinthu vo ndiziŵapu kekosi cha.
12 Atindiweze vinthu viheni pa vamampha,+Ndipu atindichitiska kuti ndivwi urwirwi nge munthu yo mubali waki wafwa.
13 Kweni pa nyengu yo yiwu atamanga, ini ndinguvwala chigudulu;Ndingujisuzga mwa kufunga chakurya,Ndipu asani mapempheru ngangu ngawelere kwambula kumukika,*
14 Ndayendangayendanga uku ndiliya, nge kuti ndiliriya mubwezi wangu pamwenga mubali wangu;Ndingujikama nde ndi chitima, nge munthu yo waliya nyifwa ya anyina.
15 Kweni ndati ndaguŵa, angukondwa, ndipu anguwungana pamoza,Anguwungana pamoza kuti andibayi pavuli pakundibisamiya;Angunditwazuwa ndipu anguja cheti cha.
16 Ŵanthu ambula kopa Chiuta atindiseka mwachipongu,*Yiwu atindikukutiya minyu.+
17 Yimwi Yehova, mulereskengi ŵaka mpaka zuŵanji?+
Nditaskeni ku viŵembu vawu,+Taskani umoyu wangu wakuzirwa* ku nkharamu zimanazimana.*+
18 Ndipu ini ndikuwongeningi mu mpingu ukulu;+Ndikuthamikeningi pakati pa gulu la ŵanthu.
19 Mungazomerezanga cha kuti ŵanthu wo mbarwani ŵangu kwambula chifukwa, akondwi chifukwa chaku ini;Mungazomerezanga cha kuti wo atinditinkha kwambula chifukwa+ aphayiyani masu mwakundichitiska soni.+
20 Pakuti yiwu alongoro mazu nga chimangu cha,Kweni yiwu anozge chiŵembu mwauryarya ŵanthu wo atanja chimangu pacharu.+
21 Yiwu ayasama milomu yawu kuti andimbi mulandu,Ndipu akamba kuti: “Ehe! Ehe! Tajiwone tija.”
22 Yimwi Yehova, mwaviwona venivi. Mungajanga cheti cha.+
Yimwi Yehova, mungajanga kutali cha ndi ini.+
23 Yukani kweniso sokani kuti mundivikiliyi,Yehova Chiuta wangu, ndimiyeni pa mulandu wangu.
24 Ndiyeruzgeni mwakukoliyana ndi urunji winu,+ Yehova Chiuta wangu;Mungazomerezanga cha kuti yiwu akondwi chifukwa chaku ini.
25 Yiwu angakambanga cha mumitima yawu kuti: “Ehe! Vo takhumbanga tavisaniya.”*
Yiwu angakambanga cha kuti: “Tamumeza.”+
26 Wosi achiti soni kweniso alengeseki,Wo asekere chifukwa cha soka langu.
Ŵanthu wosi wo atijiwona kuti mbapachanya kuluska ini avwalikiki soni kweniso ayuyuliki.
27 Kweni ŵanthu wo akondwa chifukwa cha urunji wangu, adanirizi mwalikondwa;Nyengu zosi akambengi kuti:
“Wakuzgiki Yehova yo wakondwa asani mteŵeti waki waja mwachimangu.”+
28 Pavuli paki, lilimi langu likambengi* urunji winu+Kweniso kukuthamikani zuŵa losi lamphumphu.+
Mazu Ngam'mphata
^ Kanandi ŵanthu wo aponyanga mivi ndiwu anyamuwanga vishangu venivi.
^ Pamwenga kuti, “mbavi ya kosikosi.”
^ Pamwenga kuti, “ngawere pachifuŵa changu.”
^ Yapa pangafwatulikiya so kuti, “Ŵanthu ambula kopa Chiuta atindiseka kuti asaniyi keki.”
^ Mazu ngaki chayingu, “Taskani wenuwu pe,” kung’anamuwa umoyu waki.
^ Pamwenga kuti, “nkharamu zimanazimana zanthazi.”
^ Pamwenga kuti, “Ehe! Umoyu widu.”
^ Pamwenga kuti, “lilungurukengi.”
