Machitidu nga Akutumika 3:1-26
3 Sonu mu ora la 9* lo lenga lakupemphere, Peturo ndi Yohane akweriyanga kunyumba yakusopiyamu.
2 Sonu penga munthu munyaki yo chiwiyi chaki wenga wakupunduka, ndipu ŵanthu amunyamuliyanga kunyumba yakusopiyamu. Zuŵa lelosi amuŵikanga pafupi ndi khomu la nyumba yakusopiyamu lo ladanikanga kuti Lakutowa, kuti wapemphesengi mphasu zalisungu ku ŵanthu wo aserenga munyumba yakusopiyamu.
3 Munthu yo wati wawona Peturo ndi Yohane ŵe pafupi kusere munyumba yakusopiyamu, wanguŵapempha mphasu zalisungu.
4 Kweni Peturo ndi Yohane angumulereseska ndipu angukamba kuti: “Tilereski.”
5 Sonu wanguŵalereseska wachikhaza kuti amupaskengi kanthu.
6 Kweni Peturo wangukamba kuti: “Siliva ndi golidi ndilivi, kweni vo nde navu ndivu ndikupaskengi. Mu zina laku Yesu Khristu wa ku Nazareti, yenda!”+
7 Wati wakamba venivi, wangumuko janja lamaryi ndipu wangumusoska.+ Nyengu yeniyo, maphazi ngaki ndi akangolingoli ŵaki vingutchintha.+
8 Munthu yo wangusoka liŵiliŵi+ ndipu wangwamba kwenda ndi kusere nawu munyumba yakusopiyamu. Iyu wayendanga, wandwikangandwikanga kweniso wathamikanga Chiuta.
9 Ndipu ŵanthu wosi angumuwona wachiyenda ndipuso wachithamika Chiuta.
10 Yiwu angumuziŵa kuti ndi munthu yo wajanga pa Geti Lakutowa la nyumba yakusopiyamu+ ndi kulindizga kuti ŵanthu amupaski mphasu zalisungu. Ndipu ŵanthu anguzizwa ndipuso angukondwa ukongwa ndi vo vingumuchitikiya.
11 Munthu yo weche kukaniriya Peturo ndi Yohane, ŵanthu wosi angutchimbiriya kwaku yiwu mu Khondi Lavipilala Laku Solomoni+ ndipu ŵanthu wo anguzizwa ukongwa.
12 Peturo wati wawona venivi wangukambiya ŵanthu wo kuti: “Mwaŵanthu a ku Isirayeli, ntchifukwa wuli muzizwa ndi venivi, ndipu ntchifukwa wuli mutitilereseska nge kuti munthu uyu wayenda chifukwa cha nthazi zidu pamwenga chifukwa cha kujipereka kwidu kwaku Chiuta?
13 Chiuta waku Abrahamu, waku Isaki ndipuso waku Yakobe,+ Chiuta wa apapi ŵidu akali, wakankhuska Mteŵeti waki+ Yesu+ yo mungumupereka+ ndi kumukana pa masu paku Pilato, chinanga kuti Pilato wakhumbanga kumufwatuwa.
14 Mungukana munthu wakupaturika kweniso murunji ndipu mungupempha kuti wakufwatuliyeni munthu wakubaya ŵanthu.+
15 Ndipu mungubaya Mulongozgi Mura wa umoyu.+ Kweni Chiuta wakumuyuska ndipu isi te akaboni pa nkhani yeniyi.+
16 Munthu uyu yo muwona kweniso yo mutimuziŵa, waja so ndi nthazi kuporote mu zina laku Yesu kweniso chifukwa chakuti isi te ndi chivwanu mu zina laki. Chivwanu cho te nachu kuporote mwaku Yesu ndichu chachizgiya limu munthu uyu mosi muchiwona.
17 Sonu ndiziŵa abali kuti munguchitiyamu ŵaka kwambula kuziŵa+ nge mo alongozgi ŵinu anguchitiya.+
18 Kweni mu nthowa yeniyi, Chiuta wafiska vo wangukambiya limu kuporote mwa achimi wosi kuti Khristu waki wazamusuzgika.+
19 “Mwaviyo, lapani+ ndi kung’anamuka+ kuti maubudi nginu ngasisitiki+ ndipuso kuti nyengu zakusisipuwa zizi kutuliya kwaku Yehova,*
20 kweniso kuti watumi Yesu mweniyo ndi Khristu, yo wakusankhika chifukwa chaku yimwi.
21 Kuchanya kumusungi mwenuyu mpaka po ziziyengi nyengu zakuweziyapu so vinthu vosi, zo Chiuta wangukamba kuporote mwa achimi ŵaki akupaturika akali.
22 Ndipu Mozesi wangukamba kuti: ‘Yehova* Chiuta winu wazakukuyuskiyani mchimi nge ini kutuliya pakati pa abali ŵinu.+ Mutenere kuvwiya vosi vo watikukambiyani.+
23 Kukamba uneneska, weyosi yo waleka kuvwiya mchimi mwenuyu, wazamutuzgikiyapu limu pakati pa ŵanthu.’+
24 Ndipu achimi wosi kwambiya Samuyeli mpaka wosi wo anguza pavuli paki, chinanga kuti ŵenga anandi kweni wosi angukamba ndi kukonkhoska mwambula kubisa vakukwaskana ndi mazuŵa ngenanga.+
25 Yimwi ndimwi ŵana ŵa achimi ndipuso a phanganu lo Chiuta wangupanga ndi apapi ŵinu akali,+ po wangukambiya Abrahamu kuti: ‘Kuporote mu mphapu* yaku, mabanja ngosi pacharu chapasi ngazamutumbikika.’+
26 Chiuta wati wayuska Mteŵeti waki, wangumutuma dankha kwaku yimwi+ kuti wakutumbikeni mwa kukuwezaniku ku ntchitu zinu ziheni.”
Mazu Ngam'mphata
^ Cha mu ma 3 koloku mazulu.
^ Mazu ngaki chayingu, “kutuliya ku chisku chaku Yehova.” Wonani Fundu Zakukumaliya A5.
^ Wonani Fundu Zakukumaliya A5.
^ Mazu ngaki chayingu, “mbewu.”
