Ezekiyeli 46:1-24
46 “Yehova, Ambuya Fumu Yikulu wakamba kuti: ‘Khomu la kanyumba kapageti ka mubalaza lamukati ko kalereska kuvuma,+ lijengi lakujala+ kwa mazuŵa 6 ngakugwiriya ntchitu,+ kweni pa zuŵa la Sabata ndipuso pa zuŵa la mwezi wufya, khomu lo lijengi lakujula.
2 Mulongozgi waserengi mukanyumba kapageti kuziya pakhondi,+ ndipu wamengi pafupi ndi fulemu ya khomu la kanyumba ko. Asembi aperekengi sembi yaki yakupiriza yamphumphu ndipuso sembi zaki za chimangu, ndipu iyu wasindamengi pamalu ngapafupi ndi khomu la kanyumba kapageti, ndipu pavuli paki watuwengi kubwalu. Kweni khomu la kanyumba kapageti ko, lingajalikanga cha mpaka mazulu.
3 Ŵanthu a mucharu cho, nawu asindamengi pa masu paku Yehova pakhomu la kanyumba kapageti pa Masabata kweniso pa mazuŵa nga mwezi wufya.+
4 “‘Sembi yakupiriza yamphumphu yo mulongozgi wazengi nayu kuti yiperekeki kwaku Yehova pa zuŵa la Sabata, yiŵengi ya ŵana a mbereri anthulumi 6 ambula kalema ndi mbereri yinthulumi yimoza yambula kalema.+
5 Pakupereka mbereri yinthulumi, waperekengi so sembi ya mbewu yakukwana mwesu umoza wa efa,* limoza ndi mafuta ngakukwana mwesu umoza wa hini* pa mwesu wewosi wa efa.+ Pakupereka ŵana a mbereri anthulumi waperekengi chechosi cho wangafiska.
6 Pa zuŵa la mwezi wufya, waperekengi tholi* linthulumi lambula kalema kutuliya pa mskambu wa ng’ombi, ŵana a mbereri 6 anthulumi ndipuso mbereri yinthulumi yimoza; nyama zosi zenizi ziŵengi zambula kalema.+
7 Pakupereka tholi linthulumi kweniso pakupereka mbereri yinthulumi yimoza waperekengi so sembi ya mbewu yakukwana mwesu umoza wa efa. Ndipu waperekengi mafuta ngakukwana mwesu umoza wa hini pa mwesu wewosi wa efa.
8 “‘Asani mulongozgi wasere, waseleriyengi pakhondi la kanyumba kapageti, ndipu asani watuwa watuliyengi so penipo.+
9 Asani ŵanthu a mucharu cho aza pa masu paku Yehova kuti azisopi pa nyengu ya maphwandu,+ wo aselere pa kanyumba kapageti ka kunkhondi,*+ atuliyengi pa kanyumba kapageti ka kumwera.+ Ndipu wo aselere pa kanyumba kapageti ka kumwera, atuliyengi pa kanyumba kapageti ka kunkhondi. Munthu weyosi wangatuliyanga pa kanyumba kapageti ko wanguselere cha, yiwu atenere kutuliya pa kanyumba kapageti ko ke kunthazi kwawu.
10 Asani ŵanthu asere, mulongozgi yo we pakati pawu waserengi nawu limoza ndipu asani ŵanthu wo atuwa, nayu watuwengi nawu limoza.
11 Pa maphwandu kweniso pa nyengu ya maphwandu, asani mulongozgi wapereka tholi linthulumi kweniso asani wapereka mbereri yinthulumi, waperekengi so sembi ya mbewu yakukwana mwesu umoza wa efa, limoza ndi mafuta ngakukwana mwesu umoza wa hini pa mwesu wewosi wa efa.+ Ndipu asani wapereka ŵana a mbereri anthulumi, waperekengi chechosi cho wangafiska.
12 “‘Asani mulongozgi watuza ndi sembi yakupiriza yamphumphu+ kweniso sembi za chimangu kuti zije sembi zo munthu wapereka kwaku Yehova mwakukhumba yija, amujuliyengi kanyumba kapageti ka kuvuma ndipu waperekengi kwa asembi sembi yaki yakupiriza yamphumphu ndipuso sembi zaki za chimangu nge mo wachitiya pa zuŵa la Sabata.+ Asani watuwa, khomu la kanyumba kapageti lijalikengi.+
13 “‘Zuŵa lelosi uperekengi kwaku Yehova mwana wa mbereri munthulumi wambula kujumpha chaka chimoza nge sembi yakupiriza yamphumphu.+ Uchitengi venivi mlenji wewosi.
14 Mlenji wewosi asani upereka sembi yakupiriza yamphumphu, uperekengi so sembi ya mbewu yakukwana chigaŵa chimoza cha vigaŵa 6 va mwesu wa efa, limoza ndi mafuta ngakukwana chigaŵa chimoza mwa vigaŵa vitatu va mwesu wa hini. Mafuta ngo, ngakuti awazengi pa ufwa wakusilirika wo uperekekengi kwaku Yehova nge sembi ya mbewu ya nyengu zosi. Lenili ndi dangu lamuyaya.
15 Yiwu aperekengi mwana wa mbereri yumoza munthulumi, sembi ya mbewu kweniso mafuta mlenji wewosi nge sembi yakupiriza yamphumphu ya nyengu zosi.’
16 “Yehova, Ambuya Fumu Yikulu wakamba kuti: ‘Asani mulongozgi wapereka malu ku mwana waki weyosi munthulumi nge mphasu kuti chije chihara, malu ngo ngajengi nga ŵana ŵaki. Ndipu malu ngo ngajengi chihara chawu.
17 Kweni asani wapereka malu ku yumoza wa ateŵeti ŵaki nge mphasu kutuliya pa chihara chaki, malu ngo ngajengi nga mteŵeti yo mpaka mu chaka cha wanangwa;+ iyu wazakungaweze ku mulongozgi. Kweni malu ngo ŵana ŵaki ahara, ngalutiriyengi kuja ngawu.
18 Mulongozgi wangatonga cha malu nga ŵanthu mwakwesa kuŵadikisa pamalu ngawu. Iyu wapaskengi ŵana ŵaki malu kutuliya pa chihara chaki, kuti pakati pa ŵanthu ŵangu paŵevi munthu yo wadikisika pamalu ngaki.’”
19 Pavuli paki, wangundisereza mukati kuziya pakhomu+ lo le pafupi ndi kanyumba kapageti lakuselere ku vipinda vakuryiyamu vakupaturika va asembi, lo lilereska kunkhondi,*+ ndipu kweniko ndinguwona malu nganyaki kuvuli cha kuzambwi.
20 Iyu wangundikambiya kuti: “Yanga ndi malu ngo asembi abwatusiyengepu sembi ya mulandu kweniso sembi ya ubudi. Penapa ndipu so abikiyengi sembi ya mbewu+ kuti angatuwanga ndi chechosi cha kuluta kubalaza lakubwalu ndi kuchitiska kuti ŵanthu atoweseki.”+
21 Iyu wangunditole kubalaza lakubwalu, wangundijumphisa mumakona nganayi nga balaza ndipu ndinguwona kuti pakona lelosi la balaza lakubwalu penga kabalaza.
22 Mumakona nganayi nga balaza lakubwalu mwenga mabalaza, mu utali ngenga mamita pafufupi 21,* ndipu mu usani ngenga mamita pafufupi 15 ndi hafu. Timabalaza tosi tinayi tenga takuyanana.
23 Mukati mwa timabalaza tosi tinayi kuzunguliya, mwenga malu ngakutundumuka ngo mumphata mwaki anguzengamu malu ngakubwatusiyapu sembi.
24 Pavuli paki, wangundikambiya kuti: “Izi ndi nyumba zo ateŵeti a panyumba yakusopiyamu abwatusiyamu sembi zo ŵanthu apereka.”+
Mazu Ngam'mphata
^ Wonani Fundu Zakukumaliya B14.
^ Wonani Fundu Zakukumaliya B14.
^ Tholi ndi mwana wa ng’ombi.
^ Anyaki akamba kuti, “kumpotu.”
^ Anyaki akamba kuti, “kumpotu.”
^ Mazu ngaki chayingu, “manja 40.” Yanga ndi manja ngatali. Wonani Fundu Zakukumaliya B14.
