Ezekiyeli 11:1-25
11 Sonu mzimu ungundinyamuliya muchanya ndipu ungunditole kuvuma kwa geti la nyumba yaku Yehova, geti lo lilereska kuvuma.+ Pakhomu la geti lo, ndinguwonapu anthulumi 25 ndipu pakati pawu penga Yazaniya mwana waku Azuri kweniso Pelatiya mwana waku Benaya, alongozgi a ŵanthu.+
2 Pavuli paki, Iyu wangundikambiya kuti: “Yiwi mwana wa munthu, yaŵa mbanthulumi wo anozga chiŵembu kweniso kupereka ulongozgi uheni mutawuni iyi.
3 Yiwu akamba kuti, ‘Asi iyi ndi nyengu yakuzenge nyumba?+ Tawuni iyi* ndi mumphika,*+ ndipu isi te nyama.’
4 “Kamba uchimi wakukwaskana ndi yiwu. Kamba uchimi, yiwi mwana wa munthu.”+
5 Pavuli paki, mzimu waku Yehova unguza paku ini,+ ndipu Chiuta wangundikambiya kuti: “Kamba kuti, ‘Yehova wakamba kuti: “Vo mwakamba vauneneska, yimwi a munyumba yaku Isirayeli, ndipu ndiziŵa vo muŵanaŵana.
6 Mwabayisa ŵanthu anandi mutawuni iyi ndipu mwazaza misewu yaki ndi ŵanthu akufwa.”’”+
7 “Mwaviyo, Yehova, Ambuya Fumu Yikulu wakamba kuti: ‘Ŵanthu akufwa wo mwambininiska mutawuni iyi ndiwu nyama, ndipu tawuni iyi ndiwu mumphika.+ Kweni yimwi, mutuzgikengemu mutawuni iyi.’”
8 “‘Mutopa lipanga,+ kweni lipanga lenilo ndilu ndikutumiyeningi,’ Yehova, Ambuya Fumu Yikulu ndiyu wakamba.
9 ‘Ndikutuzgeningi mutawuni iyi ndipu ndikuperekeningi mu manja mwa alendu kuti akuyeruzgeni.+
10 Mwazamubayika ndi lipanga.+ Ndazakukuyeruzgiyani pamphaka ya Isirayeli+ ndipu mwazamuziŵa kuti ini ndini Yehova.+
11 Tawuni iyi yazamuja mumphika cha kwaku yimwi, ndipu yimwi mwazamuja nyama cha mukati mwaki; ndazakukuyeruzgiyani pamphaka ya Isirayeli,
12 ndipu mwazamuziŵa kuti ini ndini Yehova. Pakuti mungwenda cha mu marangu ngangu, ndipuso mungusunga cha vyeruzgu vangu,+ kweni munguchita vinthu mwakukoliyana ndi vyeruzgu va ŵanthu amitundu yinyaki wo akuzunguliyani.’”+
13 Ndati ndakamba ŵaka uchimi, Pelatiya mwana waku Benaya wangufwa, ndipu ndingujikama ndi kusindama mpaka chisku changu pasi, ndinguliya mwakudaniriza kuti: “Kotu ama, Yehova, Ambuya Fumu Yikulu! Kumbi mumaliyengi limu Ayisirayeli akujaku?”+
14 Yehova wangulongoro so nani ndipu wangukamba kuti:
15 “Yiwi mwana wa munthu, abali ŵaku, wo ŵe ndi wanangwa wakuwombo, limoza ndi nyumba yosi yaku Isirayeli, akambirika ndi ŵanthu akuja mu Yerusalemu kuti, ‘Jani kutali ndi Yehova. Charu ichi ntchidu; chaperekeka kwaku isi kuti chije chidu.’
16 Mwaviyo kamba kuti: ‘Yehova, Ambuya Fumu Yikulu wakamba kuti: “Chinanga kuti ndaŵadikisiya kutali pakati pa mitundu ya ŵanthu kweniso ndaŵambininiskiya muvyaru vinyaki,+ kwa kanyengu kamanavi, ndijengi malu ngakupaturika kwaku yiwu, muvyaru vo alutamu.”’+
17 Mwaviyo, akambiyi kuti, ‘Yehova, Ambuya Fumu Yikulu wakamba kuti: “Ndazakukutoni mu mitundu ya ŵanthu kweniso ndazakukuwunganisani kutuliya muvyaru vo ndakumbininiskiyanimu, ndipu ndazakukupaskani charu cha Isirayeli.+
18 Ndipu yiwu azamuwere mucharu cho, ndipu azamutuzgamu vinthu vaki vosi vakuseruska kweniso vinthu vaukazuzi.+
19 Ndazakuŵapaska mtima umoza,+ ndipu ndazamuŵika mzimu wufya mwaku yiwu.+ Ndazamutuzgamu mtima wa mwa mumaliŵavu ngawu+ ndipu ndazakuŵapaska mtima wa mnofu,*+
20 kuti ayendengi mu marangu ngangu, asungengi vyeruzgu vangu ndi kuvivwiya. Asani achita venivi, azamuja ŵanthu ŵangu, ndipu ini ndazamuja Chiuta wawu.”’
21 “‘“Kweni ŵanthu wo mitima yawu yikaniriya pa vinthu vawu vakuseruska kweniso vinthu vawu vaukazuzi, ndazakuŵaweze mwakukoliyana ndi nthowa zawu,” Yehova, Ambuya Fumu Yikulu ndiyu wakamba.’”
22 Sonu akerubi angusoske muchanya mapapa ngawu, vingelengeli venga pafupi ndi yiwu,+ ndipu unkhankhu waku Chiuta waku Isirayeli wenga pachanya pawu.+
23 Pavuli paki, unkhankhu waku Yehova,+ ungukwera muchanya kutuliya pa tawuni, ndipu unguma pachanya pa phiri kuvuma kwa tawuni yo.+
24 Sonu mu chiwona cho ndinguwona kuporote mu mzimu waku Chiuta, mzimu ungundinyamuliya muchanya ndipu ungunditole ku ŵanthu wo angutoleke ku ukapolu ku Kadiya. Pavuli paki, chiwona cho ndinguwona, chingundileka.
25 Ndipu ndingwamba kukambiya ŵanthu wo angutoleke ku ukapolu, vinthu vosi vo Yehova wangundilongo.
Mazu Ngam'mphata
^ Mazu ngaki chayingu, “Iyu,” tawuni ya Yerusalemu, ko Ayuda aŵanaŵananga kuti avikilirikengi.
^ Pamwenga kuti, “mumphika wa mulomu usani.”
^ Kung’anamuwa mtima wakuvwiya fundu zaku Chiuta.
