Dotoronome 25:1-19
25 “Asani ŵanthu ayambana, alutengi kwa akweruzga,+ ndipu akweruzga ayeruzgengi nkhani yo. Murunji amukambiyengi kuti walivi mulandu ndipu wakunanga amukambiyengi kuti we ndi mulandu.+
2 Asani wakunanga watenere kudupulika vikoti,+ wakweruzga wamukambiyengi kuti wagoni pasi ndipu wadupuliki vikoti wakweruzga we penipo. Unandi wa vikoti ukoliyanengi ndi vo wachita.
3 Amudupuwi vikoti 40,+ kweni vingajumphanga cha. Asani amudupuwa vikoti vakujumpha yapa, mbwenu mubali waku walengesekengi pa masu paku.
4 “Asani ng’ombi yikhwema mbewu, ungayimanganga kumulomu cha.+
5 “Asani anthulumi ŵaŵi a banja limoza aja pamoza ndipu yumoza waku yiwu wafwa kwambula mwana, muwolu wa munthu yo wafwa wangatorananga ndi munthu wa banja linyaki cha. Mulamu waki walutengi kwaku iyu ndipu wamutongi kuja muwolu waki. Iyu waharengi choko.+
6 Mwana wakwamba yo munthukazi yo wabalengi, wajengi ndi zina la mubali waki yo wakutayika,+ kuti zina laki lileki kumala mu Isirayeli.+
7 “Sonu asani munthulumi yo wakhumba cha kutorana ndi muwolu wa mubali waki yo wakufwa, munthukazi yo walutengi kwa ŵara pageti la tawuni, ndipu wakaŵakambiyengi kuti, ‘Mubali wa mulumu wangu wakana kusunga zina la mubali waki mu Isirayeli. Iyu wakana kundihara.’
8 Ŵara a tawuni yaki atenere kumudana ndi kumukambisa. Asani wakana mbwenu ndipu wakamba kuti, ‘Ndakhumba cha kumuto,’
9 muwolu wa mubali waki yo wakufwa walutengi pafupi ndi iyu pa masu pa ŵara, wamuzuwengi sapatu zaki,+ wamufunyiyengi mata kumasu ndi kukamba kuti, ‘Ivi ndivu vitenere kuchitikiya munthu yo wakana kuzenga nyumba ya mubali waki.’
10 Pavuli paki, zina la nyumba yaki* mu Isirayeli lijengi lakuti, ‘Nyumba ya munthu yo wakuzulika sapatu.’
11 “Asani anthulumi ŵaŵi apumana ndipu muwolu wa munthulumi yumoza waseleriyapu kuti wavikiliyi mulumu waki ku munthu yo watimupuma, ndipu watambasuwa janja laki ndi kuko viŵalu vakubisika va munthulumi yo,
12 mutenere kudumuwa janja la munthukazi yo. Mungamuchitiyanga* lisungu cha.
13 “Muthumba linu mungaŵikangamu cha mya yiŵi yakupimiya yakupambana,+ ukulu ndi umana.
14 Munyumba mwinu mungajanga cha ndi viyaŵi viŵi vakupimiya vakupambana,+ chikulu ndi chimana.
15 Mujengi ndi mwesu waurunji kweniso wauneneska wakupimiya uzitu wa vinthu, ndipuso mujengi ndi mwesu wa efa* waurunji kweniso wauneneska, kuti muje ndi umoyu utali mucharu cho Yehova Chiuta winu watikupaskani.+
16 Pakuti munthu wambula urunji weyosi yo wachita vinthu venivi Yehova Chiuta winu waseruka nayu.+
17 “Kumbukani vo Aamaleki angukuchitiyani muchituwa mucharu cha Ijipiti.+
18 Yiwu angukumana namwi munthowa ndipu anguyukiya ŵanthu wosi wo asuzgikanga kwenda kuvuli kwinu chifukwa cha kuvuka kweniso kuŵavi nthazi. Yiwu anguwopa Chiuta cha.
19 Asani Yehova Chiuta winu wazikupumuzgani kwa arwani ŵinu wosi wo azakukuzunguliyani mucharu cho Yehova Chiuta winu watikupaskani kuti muchito kuja chihara chinu,+ muzisisiti zina la Aamaleki pacharu chapasi.+ Mungaziluwanga cha.
Mazu Ngam'mphata
^ Pamwenga kuti, “zina la banja laki.” Mazu ngaki chayingu, “zina laki.”
^ Mazu ngaki chayingu, “Jisu linu lingamuchitiyanga.”
^ Wonani Fundu Zakukumaliya B14.
