Buku Lachiŵi la Samuyeli 22:1-51
22 Davidi wangukambiya Yehova mazu nga mu sumu iyi+ pa zuŵa lo Yehova wangumutaskiya mu manja mwa arwani ŵaki wosi+ kweniso mu manja mwaku Sauli.+
2 Iyu wangukamba kuti:
“Yehova ndi jalawi langu, malu ngangu ngakuvikilirika+ kweniso Iyu ndiyu watinditaska.+
3 Chiuta wangu ndi jalawi langu,+ ini ndibisama mwaku iyu,Iyu ntchishangu changu+ ndipuso sengwi* langu la utaski,* malu ngangu ngakuthaŵiyaku ngakuvikilirika*+Kweniso iyu ndi malu ngangu ngakuthaŵiyaku,+ mtaski wangu; yimwi ndimwi mutinditaska+ ku ŵanthu ankhaza.
4 Ini ndidana Yehova, yo ngwakwenere kumuthamika,Ndipu nditaskikengi kwa arwani ŵangu.
5 Mayiŵa nga nyifwa ngangundizingiliza;+Chigulu cha ŵanthu abwekabweka chingundiwofyeza.+
6 Vingwi va Dindi* vingundizingiliza;+Ndipu viŵana va nyifwa vingulimbana nani.+
7 Pa nyengu yo ndasuzgikanga ndingudana Yehova,+Ndingulutirizga kudana Chiuta wangu.
Pavuli paki, iyu wanguvwa mazu ngangu we munyumba yaki yakusopiyamu,Ndipu kuliya kwangu kwakupempha chovyu, kunguvwika mumakutu ngaki.+
8 Charu chingwamba kusukunyika ndi kundengandenga;+Mafawundeshoni nga kuchanya ngangunjekeme+Ngangusukunyikiya uku ndi uku chifukwa chakuti angumukwiyisa.+
9 Josi lingutoloroka kutuwa mumphunu zaki,Ndipu mumulomu mwaki mungutuwa motu wakupiriza;+Maka ngamotu ngangukole kutuwa mwaku iyu.
10 Wachisika, wanguchitiska kuti kuchanya kugombeteke,+Ndipu kusi kwa maphazi ngaki kwenga mdima ukulu.+
11 Iyu wangukwera pakerubi+ ndipu wanguza wachiphululuka.
Kweniso wawonekanga pamapapa nga mzimu.*+
12 Pavuli paki, wangujibenekere ndi mdima, ungumuzunguliya nge chigongwi,+Penga maji ngafipa kweniso mitambu yakuti bii.
13 Kutuwa mu ukweru wo wenga panthazi paki, maka ngakunyeka ngangukole.
14 Pavuli paki, Yehova wangwamba kugululusa kutuliya kuchanya;+Wapachanya Limu wanguchitiska kuti mazu ngaki ngavwiki.+
15 Iyu wanguponya mivi yaki+ ndipu wanguŵambininiska;Wanguponya limphezi, ndipu wanguchitiska kuti atimbanyizgiki.+
16 Maji nga pasi pa nyanja nganguwoneka;+Mafawundeshoni nga charu nganguwoneke pakweru chifukwa cha kuchenya kwaku Yehova,Kweniso chifukwa cha mvuchi wanthazi wakutuwa mumphunu zaki.+
17 Wangutambasuwa janja laki kutuliya kuchanya;Wangundiko ndipu wangundizuwuwa mumaji ngandimba.+
18 Wangunditaska ku murwani wangu wanthazi,+Ku ŵanthu wo atinditinkha, wo ŵenga anthazi kuluska ini.
19 Yiwu angundiyukiya pa zuŵa lo ndingukumana ndi suzgu,+Kweni Yehova wangundiwovya.
20 Iyu wangunditole kumalu ngakuvikilirika;*+Wangunditaska chifukwa chakuti nditimukondwesa.+
21 Yehova watindipaska mphotu mwakukoliyana ndi urunji wangu;+Watindiweze mwakukoliyana ndi kuŵavi mulandu* kwa manja ngangu.+
22 Pakuti ini ndasunga nthowa zaku Yehova,Ndipu ndachitapu cha ubudi wakujowo Chiuta wangu.
23 Vyeruzgu vaki vosi+ ve pa masu pangu;Marangu ngaki ndingasiyengi cha.+
24 Ndilutirizgengi kuja wambula kafukwa+ pa masu paki,Ndipu ndichitengi ubudi cha.+
25 Yehova wandiweze mwakukoliyana ndi urunji wangu,+Mwakukoliyana ndi kuŵavi mulandu kwangu pa masu paki.+
26 Munthu wakugomezgeka mutimuchitiya vinthu mwakugomezgeka;+Munthu wambula kafukwa ndipuso wanthazi, mutimuchitiya vinthu mwaurunji;+
27 Ku munthu wakutowa mutijilongo kuti mwe akutowa,+Kweni ku munthu muryarya mutimulongo kuti mwe akuchenje.*+
28 Pakuti mutaska ŵanthu akujiyuyuwa,+Kweni masu nginu ngatinkha ŵanthu akujikuzga, ndipu mutiŵasiska.+
29 Ndimwi nyali yangu, yimwi Yehova;+Yehova ndiyu watindimbulikiya mu mdima.+
30 Ndi chovyu chinu, ndingalimbana ndi gulu la vigeŵenga;
Ndi nthazi zaku Chiuta, ndingakwera mpanda.+
31 Nthowa yaku Chiuta wauneneska njakufikapu;+Mazu ngaku Yehova ngakuyengetulika.+
Iyu ntchishangu ku ŵanthu wosi wo abisama mwaku iyu.+
32 Kumbi pe so Chiuta munyaki kupatuwaku Yehova?+
Ndiyani yo ndi jalawi kupatuwaku Chiuta widu?+
33 Chiuta wauneneska ndi malu ngangu ngakuvikilirika kweniso ngakukho,+Ndipu iyu wachitiskengi kuti nthowa yangu yije yakufikapu.+
34 Wachitiska kuti maphazi ngangu ngaje nge nga mphoyu;Ndipu watindimika pamalu ngapachanya.+
35 Wasambiza manja ngangu mo ngangachitiya nkhondu;Ndipu manja ngangu ngangakunga uta wamkuŵa.
36 Yimwi mutindipaska chishangu chinu cha utaski,Ndipu kujiyuyuwa kwinu ndiku kutindikweza.+
37 Musanuska nthowa ya malundi ngangu;Maphazi ngangu ngateremukengi* cha.+
38 Nditchimbizengi arwani ŵangu ndipu ndiŵabayengi;Ndiweleriyengi cha mpaka po wosi amaliya.
39 Ndiŵapeyengi ndipuso ndiŵaphwanyengi, mwakuti ayukengi so cha;+Yiwu awiyengi kusi kwa maphazi ngangu.
40 Yimwi mundipaskengi nthazi zakuchitiya nkhondu;+Ndipu muchitiskengi kuti arwani ŵangu awi pasi pangu.+
41 Muchitiskengi kuti arwani ŵangu andithaŵi;*+Ŵanthu wo atinditinkha ndiŵamalengi.*+
42 Yiwu aliya kweniso apempha chovyu, kweni palivi wakuti waŵataski;Aliriya so Yehova, kweni watiŵamuka cha.+
43 Ndiŵapuwengi ndipu asilirikengi nge fuvu la pacharu;Kweniso ndiŵaphwanyiyengi limu ndi kuŵakandakanda nge mawulambwi nga mumsewu.
44 Munditaskengi ku ŵanthu ŵangu wo atindisaniriya vifukwa.+
Mundivikiliyengi kuti ndije mulongozgi wa mitundu;+Ndipu ŵanthu wo ndileka kuŵaziŵa, anditeŵetiyengi.+
45 Alendu azengi kwaku ini achikwaŵa chifukwa cha mantha;+Vo atuvwa vakukwaskana ndi ini,* viŵachitiskengi kuti andivwiyengi.
46 Alendu achitengi mantha;*Atuwengi mumalu ngawu ngakuvikilirika ndipu azengi achimbwambwanthiya.
47 Yehova ngwamoyu! Litumbikiki Jalawi langu!+
Wakwezeki Chiuta yo ndi jalawi la utaski wangu.+
48 Chiuta wauneneska ndiyu waweze mumalu mwaku ini;+Iyu wathereska ŵanthu ndi kuŵaŵika pasi pangu;+
49 Iyu watinditaska kwa arwani ŵangu.
Yimwi mutindinyamuliya muchanya+ kuti ŵanthu wo atindiyukiya aleki kundikwaska;Ndipu mutinditaska ku munthu wankhaza.+
50 Ndichu chifukwa chaki ndikuwongeningi yimwi Yehova pakati pa mitundu,+Ndipu ndimbengi sumu zakuthamika* zina linu kuti:+
51 Iyu walutirizga kuchitiya fumu yaki ntchitu zikulu za utaski;*+Ndipu walongo wakusankhika waki chanju chambula kumala,Kwaku Davidi kweniso ku mphapu* yaki mpaka muyaya.”+
Mazu Ngam'mphata
^ Wonani Mazu ngo Ngakonkhoskeka.
^ Pamwenga kuti, “mtaski wangu wanthazi.”
^ Pamwenga kuti, “malu ngangu ngapachanya ngakuvikilirika.”
^ Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
^ Pamwenga kuti, “nga mphepu.”
^ Pamwenga kuti, “kumalu ngasani.”
^ Mazu ngaki chayingu, “kutowa.”
^ Yapa pangafwatulikiya so kuti, “mutimuchitiya vinthu mwakupusa.”
^ Pamwenga kuti, “Kangolingoli wangu wateremukengi.”
^ Pamwenga kuti, “Mundipaskengi misana ya arwani ŵangu.”
^ Mazu ngaki chayingu, “ndiŵajalisengi cheti.”
^ Mazu ngaki chayingu, “Vo gutu lituvwa.”
^ Pamwenga kuti, “Alendu awalawatiyengi.”
^ Pamwenga kuti, “ndipangiyengi sumu.”
^ Pamwenga kuti, “kuchitiya fumu yaki kupunda kukulu.”
^ Mazu ngaki chayingu, “mbewu.”
