Buku Lachiŵi la Mafumu 19:1-37
19 Fumu Hezekiya yati yavwa ŵaka venivi, yingukeruwa vakuvwala vaki ndi kuvwala chigudulu ndipu yinguluta munyumba yaku Yehova.+
2 Pavuli paki, Hezekiya wangutuma Eliyakimu yo wawoneriyanga nyumba,* Shebina mlembi, kweniso ŵara ŵa asembi kuti aluti kwa mchimi Yesaya+ mwana waku Amozi. Ŵanthu yaŵa anguvwala vigudulu.
3 Yiwu angukambiya Yesaya kuti: “Hezekiya wakamba kuti, ‘Ili ndi zuŵa la suzgu, la kuchenyeka* ndipuso la chilengesu; pakuti nthumbu zayuka kuti ŵana aweku,* kweni palivi nthazi zakuŵabaliya.+
4 Panyaki Yehova Chiuta waku wavwengi mazu ngosi ngaku Rabishaki, yo ambuyaki fumu ya ku Asiriya amutuma kuti wazinyozi Chiuta wamoyu,+ ndipu wamumbengi mulandu chifukwa cha mazu ngo Yehova Chiuta waku wavwa. Sonu pemphera+ mumalu mwa ŵanthu wo ajaku, wo ŵeche amoyu.’”
5 Mwaviyo, ateŵeti a Fumu Hezekiya anguluta kwaku Yesaya,+
6 ndipu Yesaya wanguŵakambiya kuti: “Ambuyamwi mukaŵakambiyi kuti, ‘Yehova wakamba kuti: “Ungawopanga cha+ chifukwa cha mazu ngo wavwa, mazu ngo ateŵeti a fumu ya ku Asiriya andinyoza nangu.+
7 Ini ndiŵikengi maŵanaŵanu mumutu mwaki,* ndipu iyu wavwengi uthenga ndi kuwere mucharu chaki. Ini ndimubayisengi ndi lipanga mucharu chaki.”’”+
8 Rabishaki wati wavwa kuti fumu ya ku Asiriya yatuwaku ku Lakishi,+ wanguwere kwaku iyu, ndipu wangusaniya kuti yichita nkhondu ndi tawuni ya Libina.+
9 Pa nyengu iyi, fumu yinguvwa vakukwaskana ndi Tirihaka fumu ya ku Ifiyopiya kuti: “Iyu waza kuti wazichiti namwi nkhondu.” Sonu iyu yingutuma ŵanthu+ kwaku Hezekiya, ndipu yinguŵakambiya kuti:
10 “Hezekiya fumu ya ku Yuda mukamukambiyi kuti, ‘Ungazomerezanga cha kuti Chiuta waku yo utimuthemba wakupusiki mwakukukambiya kuti: “Yerusalemu waperekekengi cha mu janja la fumu ya ku Asiriya.”+
11 Awona! Yiwi wavwa vo mafumu nga ku Asiriya ngakuchitiya vyaru vosi, pakuti ngakuvinanga.+ Kumbi yiwi pe wija utaskikengi?
12 Kumbi achiuta a mitundu yo apapi ŵangu akali akuyibwanganduwa, anguyitaska? We pani Gozani, Harani,+ Rezefi, kweniso ŵe pani ŵanthu a ku Edeni wo ajanga ku Telu-asa?
13 Ye pani fumu ya ku Hemati, fumu ya ku Aripadi, fumu ya matawuni nga ku Sefaravayimu, fumu ya ku Hena ndi fumu ya ku Iva?’”+
14 Hezekiya wangulonda makalata kujanja la ŵanthu wo angupinga uthenga ndipu wangungaŵerenga. Pavuli paki, Hezekiya wangukwere kunyumba yaku Yehova, ndipu wangungatambasuwa* pa masu paku Yehova.+
15 Sonu Hezekiya wangwamba kupemphera+ pa masu paku Yehova kuti: “Yehova, Chiuta wa ku Isirayeli, yimwi muja pampandu waufumu pachanya* pa akerubi,+ yimwi pe ndimwi Chiuta yija wauneneska wa maufumu ngosi nga pacharu chapasi.+ Mukupanga kuchanya ndi charu chapasi.
16 Khazaniku gutu linu yimwi Yehova, ndipu vwani!+ Julani masu nginu+ yimwi Yehova, ndipu wonani! Vwani mazu ngo Senakeribu watumiza ngakunyoza yimwi Chiuta wamoyu.
17 Yimwi Yehova, mbuneneska nadi kuti mafumu nga ku Asiriya ngabwanganduwa mitundu limoza ndi vyaru vawu.+
18 Kweniso achiuta a mitundu yeniyi aŵaponya pamotu, chifukwa ŵenga achiuta cha,+ kweni ntchitu za manja nga ŵanthu,+ vimiti kweniso mya. Ndichu chifukwa chaki aŵabwanganduwa.
19 Kweni sonu yimwi Yehova Chiuta widu, chondi titaskeni mu janja laki, kuti maufumu ngosi nga pacharu chapasi ngaziŵi kuti yimwi mwija ndimwi Chiuta, a Yehova.”+
20 Sonu Yesaya mwana waku Amozi wangutumiziya Hezekiya uthenga wakuti: “Yehova Chiuta waku Isirayeli wakamba kuti, ‘Ini ndavwa pempheru lo wapemphera+ kwaku ini lakukwaskana ndi Fumu Senakeribu ya ku Asiriya.+
21 Yehova wakamba mazu yanga ngakususkana ndi iyu:
“Mwana munthukazi wa ku Ziyoni yo ndi mwali, watikunyoza, iyu watikuseka.
Mwana munthukazi wa ku Yerusalemu watikupukunyiya mutu.
22 Ndiyani yo wamunena ndipuso kumunyoza?+
Ndiyani yo yiwi wamulongolore mwakudaniriza+Ndipuso ndiyani yo yiwi wamuyunuskiya masu ngaku ngakujikuzga?
Wachitiya Mtuŵa waku Isirayeli!+
23 Kuziya mwa ŵanthu wo watuma,+ wanyoza Yehova+ ndi kukamba kuti,‘Mwakugwiriskiya ntchitu wumba wa magaleta ngangu ngankhondu,Ndikwerengi mapiri ngatali,Mpaka kuvigaŵa vakutali ukongwa va ku Lebanoni.
Ndidumuwengi vimiti vaki vitalivitali va sidara,* kweniso vimiti vaki vamampha va junipa.
Ndiserengi muthundu laki la kutali, ndipuso mulisuwa laki lakukho* ukongwa.
24 Ndikumbengi visimi ndi kumwa maji ngachilendu;Ndiphwisengi timisinji tosi ta* ku Ijipiti ndi maphazi ngangu.’
25 Kumbi ukuvwa cha? Kutuwa kali ukongwa, ndikusimikiza.*+
Kutuwa mu mazuŵa ngo ngajumpha, ini ndikunozge* limu.+
Kweni sonu ndifiskengi.+
Yiwi ubwanganduwengi matawuni nga mipanda yakukho ndi kungasambusa milu ya mahami.+
26 Ŵanthu wo aja mumatawuni ngenanga asoŵengi pakuko;Yiwu achitengi mantha kweniso soni.
Ŵanthu ŵenaŵa ajengi nge vakume vamudondu kweniso nge uteka wakubiriŵira,+Nge uteka wo we pachanya pa nyumba wo waŵawuka ndi mphepu ya kuvuma.*
27 Kweni ndiziŵa umampha asani uja pasi, asani utuwa kubwalu, asani usere,+Ndipuso asani wandikwiyiya,+
28 Chifukwa chakuti wandikwiyiya+ ndipuso kubangula kwaku kwavwika mumakutu mwangu.+
Mwaviyo, ndiŵikengi mbeja yangu mumphunu mwaku, ndipuso ndimangengi vingwi vangu+ pamilomu yaku,Ndipu ini ndikuweziyengi munthowa yo unguziya.”+
29 “‘Ichi ndichu chiŵengi chisimikizu kwaku yiwi:* Chaka chinu muryengi vo vimengi vija;* ndipu mu chaka chachiŵi, mwazamukurya mbewu zo zazamubuka pa vo vingume vija;+ kweni mu chaka chachitatu mwazamupanda mbewu ndi kukolola, kweniso mwazamulima minda ya mphereska ndi kurya vipasu vaki.+
30 Ŵanthu a munyumba yaku Yuda wo aponengi, kung’anamuwa wo ajengeku,+ amengi misisi pasi ndi kupasa vipasu kuchanya.
31 Pakuti mu Yerusalemu mwazamutuwa ŵanthu wo ajengeku, ndipu mu Phiri la Ziyoni mwazamutuwa ŵanthu wo aponengi. Yehova wa mizinda wachitengi venivi+ chifukwa cha phamphu laki.
32 “‘Mwaviyo, Yehova wakamba ivi vakukwaskana ndi fumu ya ku Asiriya:+
“Iyu wazengemu cha mutawuni iyi+Pamwenga kuponya muvu mwenimoPamwenga so kuyiyukiya ndi chishanguKweniso kuyizenge chimbumira kuti wachiti nayu nkhondu.+
33 Iyu waweleriyengi kuziya munthowa yo wanguziya;Waserengemu cha mutawuni iyi,” Yehova ndiyu wakamba.
34 “Ini ndivikiliyengi tawuni iyi+ kweniso ndiyitaskengi chifukwa chaku ndamweni+Kweniso chifukwa chaku Davidi mteŵeti wangu.”’”+
35 Sonu mu usiku weniwuwa, mungelu waku Yehova wanguluta mumsasa wa asilikali a ku Asiriya+ ndi kubaya anthulumi 185,000. Ŵanthu ŵati ayuka ndi mlenjilenji, anguwona mathupi ngosi nga ŵanthu akufwa.+
36 Mwaviyo Senakeribu fumu ya ku Asiriya wangutuwaku ndipu wanguwere ku Nineve+ ndi kuchija kweniko.+
37 Senakeribu wachijikama munyumba* yaku Nisiroki chiuta waki, ŵana ŵaki anthulumi Adirameleki ndi Shareza angumubaya ndi lipanga+ ndipu anguthaŵiya kucharu cha Ararati.+ Pavuli paki, mwana waki Esari-hadoni+ ndiyu wanguja fumu mumalu mwaku iyu.
Mazu Ngam'mphata
^ Pamwenga kuti, “nyumba yachifumu.”
^ Pamwenga kuti, “kunyozeka.”
^ Mazu ngaki chayingu, “pakuti ŵana aza kali pakhomu la chibaliru.”
^ Mazu ngaki chayingu, “mzimu mwaku iyu.”
^ Mazu ngaki chayingu, “wanguyitambasuwa.”
^ Yapa pangafwatulikiya so kuti, “pakati.”
^ Pamwenga kuti, “lakuŵinda.”
^ Vimiti ivi viyananaku ndi vimiti va payina ndipu kali vasanirikanga ukongwa ku Lebanoni.
^ Pamwenga kuti, “migelu ya Nayelu.”
^ Mazu ngaki chayingu, “vikuchitika.”
^ Pamwenga kuti, “ndikupangiya.”
^ Pamwenga kuti, “ko kutuliya lumwi.”
^ Pamwenga kuti, “vo vimengi kutuliya ku mbewu zo zinguwa pasi.”
^ Kung’anamuwa Hezekiya.
^ Pamwenga kuti, “munyumba yakusopiyamu.”
