Kalata Yakwamba Yakuluta Kwaku Timote 1:1-20
1 Ini Paulo, wakutumika waku Khristu Yesu mwakulamulika ndi Chiuta Mtaski widu, kweniso ndi Khristu Yesu, chilindizga chidu,+
2 ndilembe Timote*+ mwana wangu chayiyu+ mu chivwanu kuti:
Wezi ukulu, lisungu ndi chimangu vakutuliya kwaku Chiuta, Ada ndi Khristu Yesu, Ambuyafwi, viŵi nawi.
3 Nge mo ndingukuchiskiya kuti ujaliyi ku Efeso po ini ndenga pafupi kuluta ku Makedoniya, sonu napu nditikuchiska so kuti ulamuli ŵanthu anyaki kuti aleki kusambiza visambizu vaboza,
4 ndipuso kuti aleki kuvwisiya nkhani zaboza+ kweniso kukumba mikoka. Vinthu venivi vilivi phindu lelosi,+ kweni vitambisa ŵaka mafumbu, mumalu mwakusambiza vinthu vakutuliya kwaku Chiuta vakukwaskana ndi chivwanu.
5 Kukamba uneneska, chilatu chakupereke ulongozgi uwu,* ntchakuti tije ndi chanju+ chakutuliya mumtima wambula kufipiskika, mu njuŵi yamampha kweniso mu chivwanu+ chambula chinyengu.
6 Chifukwa cha kuleka vinthu venivi, anyaki ang’anamukiya ku nkhani zambula phindu.+
7 Yiwu akhumba kuja asambizi+ a dangu, kweni avwisa cha vinthu venivo akamba pamwenga vo angangamiya.
8 Sonu tiziŵa kuti Dangu* ndamampha asani munthu watiligwiriskiya ntchitu mwakwenere,
9 pakuti tiziŵa kuti dangu lipangikiya munthu murunji cha, kweni ŵanthu ambula kuvwiya marangu+ ndi akugaruka, ambula kopa Chiuta ndi akubuda, ambula kugomezgeka* ndi wo anyoza vinthu vakupaturika, wo abaya awusewu ndi wo abaya anyinawu, wo abaya ŵanthu,
10 wo achita ureŵi,* anthulumi wo agonana ndi anthulumi anyawu, wo atuba ŵanthu, aboza, wo atuswa phanganu,* kweniso vinthu vinyaki vosi vo visuskana ndi chisambizu chamampha*+
11 chakukoliyana ndi uthenga wamampha wa unkhankhu wakutuliya kwaku Chiuta walikondwa, weniwo ndikusungizgika.+
12 Ndiwonga Khristu Yesu Ambuyafwi, yo wakundipaska nthazi, chifukwa wanguwona kuti nde wakugomezgeka pakundipaska uteŵeti,+
13 chinanga kuti kali ndenga wakunyoza, wakutombozga ndipuso ndenga munthu waganyavu.+ Kweni ndingulongoreka lisungu chifukwa chakuti ndachitiyangamu ŵaka venivi kwambula kuziŵa, kweniso chifukwa chakuti ndengavi chivwanu.
14 Kweni wezi ukulu wa Ambuyafwi, ungusazgikiyaku ukongwa limoza ndi chivwanu kweniso chanju cho che mwaku Khristu Yesu.
15 Mazu ngakuti, Khristu Yesu wanguza pacharu chapasi kuzitaska ŵanthu akubuda, ngakugomezgeka ndipuso ngakwenere kungalonde ndi mtima wosi. Pa ŵanthu akubuda ŵenaŵa,+ ini ndini nde wakubuda ukongwa.+
16 Kweni ndingulongoreka lisungu, ndi chilatu chakuti mwakugwiriskiya ntchitu ini wakubuda ukongwa, Khristu Yesu walongo kuzizipizga kwaki kosi, kuti ndije chakuwoniyapu ku ŵanthu wo chivwanu chawu che mwaku iyu, kuti azilonde umoyu wamuyaya.+
17 Sonu Fumu yamuyaya,+ yo yinganangika cha,+ yambula kuwoneka,+ ndipuso Chiuta yija pe,+ yilonde ulemu ndi unkhankhu, muyaya mpaka muyaya. Ame.
18 Wamwana wangu Timote, nditikupaska ulongozgi uwu* kuti mwakukoliyana ndi mauchimi ngo ngangukambiya limu vakukwaskana ndi yiwi, mwakukoliyana ndi mauchimi ngenanga, ulutirizgi kuchita nkhondu yamampha,+
19 kukolesa chivwanu kweniso njuŵi yamampha,+ yo anyaki ayindereze pamphepeti ndipu chivwanu chawu chasweka nge sitima.
20 Anyaki mwa ŵanthu ŵenaŵa ndi Hemenayo+ ndi Alekizanda, ndipu ndaŵapereka kwaku Satana,+ kuti asambiziki mwakulangika ndi chilatu chakuti aleki kunyoza Chiuta.
Mazu Ngam'mphata
^ Kung’anamuwa “Munthu yo Watumbika Chiuta.”
^ Pamwenga kuti, “dangu ili.”
^ Wonani Mazu ngo Ngakonkhoskeka.
^ Pamwenga kuti, “wo alivi chanju chambula kumala.”
^ Pamwenga kuti, “chisambizu chaphindu.”
^ Pamwenga kuti, “wo alapizga vaboza.”
^ Mu Chigiriki, por·nei′a. Wonani Mazu ngo Ngakonkhoskeka.
^ Pamwenga kuti, “dangu ili.”
