Akaboni aku Yehova ku Britain ayamba kuzenga ofesi ya nthambi yasonu kufupi ndi tawuni ya Chelmsford mu charu cha Essex. Malu ngo Akaboni azengapu ofesi yeniyi ngakutowa ukongwa ndipu paja vinyama vo vija mwa kuvikilirika, mwakukoliyana ndi marangu nga vinyama ngo ngakujalikiskika ku United Kingdom. (Wildlife and Countryside Act 1981) Kumbi Akaboni aku Yehova achita wuli pa ntchitu yawu ya kuzenga kuti alondo marangu ndi kuvikiriya vinyama?

Pa malu yanga, Akaboni anguzenga tinyumba tamabokosi mwakugwiriskiya ntchitu mathabwa ngakali kuti mbeŵa zijengemu ndipu timabokosi teniti angutiŵika kutali ndi ko yiwu agwiranga ntchitu. Pachanya pa msewu wasonu wakuselere ku nthambi yidu yasonu ya ku Britain, akupayikapu chinthu chinyaki cho chikupangika mwapade kuti mbeŵa ziyambukiyengemu kutuwa kuvimiti va sirya linyaki mpaka kuvimiti va sirya linyaki, kuti aleki kutimbanyizga mo mbeŵa izi zayendiyanga kali. Kusazgiyapu pa fundu iyi, angupanda so maheji kuti mbeŵa ziyendengemu. Akaboni akujalikiska ndondomeku yakuphwere maheji ngo mbeŵa zijamu kuti zilekengi kusoŵa malu ngakuja. Chaka chechosi muchihanya, apupiliya maheji chifukwa aziŵa kuti nyengu yeniyi ndiyu vinyama vija mwakuvikilirika. Venivi vitovya kuti vinyama vilekengi kutimbanyizgika, malu ngaki ngajengi nga kuvikilirika ndipuso kuti nyengu zosi vijengi ndi vakurya vakukwana.

Akaboni avikiriya so njoka zo zija mu uteka, agwalawala, mulinga, ndipuso mitundu yinandi ya amtondoni. Asayansi anguto vinyama venivi pachanya panyumba zo zinguzengeka kuti ŵanthu ajengemu kwa kanyengu kamanavi. Yiwu anguluta navu kumalu ngamampha ngo ngenga kutali ndi ko Akaboni azenganga ma ofesi ngawu. Malu ngenanga nge ndi mpanda kweniso tinyumba kuti vinyama vijengi mwakuvikilirika. Nyengu zosi Akaboni ayenderiyanga mpanda wenuwu kuti awoni asani pe vinyama vinyaki vo vathaŵa mu mpanda, kuchitiya kuti ŵanthu angavibaya.

Kuti aleki kutimbanyizga akasuska wo ayendanga ndi usiku, pamalu ngenanga anguŵikapu mababu nga LED ngo ngachitiskanga kuti ukweru uleki kufika kutali. Mababu ngenanga akungapanga munthowa yakuti ndi usiku ngangaŵalanga ukongwa cha asani pamalu ngo pajumpha galimotu kuti akasuska aleki kuphululukiya kutali. Chifukwa chakuti kanandi akasuska apenja chakurya mu maheji ndi usiku, Akaboni anguwonesesa kuti maheji ngalutiriyi kusanirika pa malu yanga. Yiwu angupanda so maheji nganyaki pa malu ngakulu ukongwa ngakujumpha makilomita ngaŵi ndi hafu. (1.6 mi) Kuti Akaboni aku Yehova afiski kuzenga ofesi yasonu, akhumbikanga kudumuwa vimiti vinyaki vo venga pamalu ngenanga. Mwaviyo, yiwu angupanga timabokosi takuti akasuska ajengemu ndi chilatu chakuti akasuska ŵenaŵa avikiliriki.

Pa nyengu yo Akaboni aku Yehova azenganga ofesi yeniyi, awonesesanga kuti vimiti ativivikiriya. Yiwu awonesesanga so kuti magalimotu ngaleki kwenda kufupi ndi misisi ya vimiti. Vimiti ivi vitovya kuti vidononu vakupambanapambana, akasuska ndipuso viyuni vijengemu. Nthowa zosi zo takamba, zilongo kuti Akaboni aku Yehova atijipereka pa kulutirizga kugwira ntchitu yakuvikiriya vinyama ku Chelmsford.