Ndikuwiya ku Uganda muboma la Gomba. Mucharu ichi, ŵanthu anandi ŵenga akavu. Mutawuni yidu mwengavi magesi. Mwaviyo, ndi usiku tambulikiyanga nyali.

 Apapi ŵangu wo ŵenga alimi angusamiya ku Uganda kutuwa ku Rwanda. Yiwu alimanga khofi ndipuso matochi. Mwakugwiriskiya ntchitu matochi ngenanga, yiwu abikanga moŵa wakutchuka ukongwa wo udanika kuti waragi. Apapi ŵangu ŵenga so ndi nyori, mbuzi, nkhumba kweniso ng’ombi. Chifukwa cha ko ndikukuliya, ndagomezganga kuti munthukazi wakhumbika kuvwiya mulumu waki pa chechosi ndipuso kuti wangakambangaku maŵanaŵanu ngaki cha.

 Ndati ndafika vyaka 23, ndingusamiya ku Rwanda. Kwenuku ndakanga kumabala ko kwajanga madansi limoza ndanyangu. Ndayanjanga ukongwa kuluta kubala linyaki mwakuti ŵeneku angundipaska kadi lo ndalongonga pakhomu kuti ndiserengi kwawezi. Ndayanjanga so kuwonere mafilimu ngandewu. Venivi vinguchitiska kuti ndije munthu wankhaza kweniso muloŵevu.

 Mu 2000, ndingwamba kuja limoza ndi msungwana munyaki zina laki Skolastique Kabagwira, ndipu tingubala ŵana atatu. Nge mo ndingusambiriya ndeche mwana, ndakhumbanga kuti iyu wajikamengi nyengu zosi asani watinditawuza kweniso asani wakhumba kupempha chinthu. Ndakambanga so kuti vinthu vosi vo tenga navu venga vangu pe, ndipu ndingachita navu mwemosi mo ndakhumbiya. Kanandi ndatuwangapu ndi usiku, ndipu ndazanga panyumba cha m’ma 3 koloku matandakucha ndaloŵe. Ndagong’oskanga pachisasa, ndipu asani Skolastique waswera kundijuliyaku, ndamubumuwanga.

 Pa nyengu yeniyi ndagwiranga ntchitu nge bwana pakampani yinyaki ya alonda, ndipu ndaholanga ndalama zinandi. Skolastique wandichiskanga kuti ndikengi kutchalitchi laki la Pentekositi. Panyaki iyu waŵanaŵananga kuti asani ndingasere tchalitchi laki ndisinthengi. Kweni ini ndakangaku cha. Mumalu mwaki, ndingwamba kubula ndi musungwana munyaki. Chifukwa chakuti ndamuchitiyanga nkhaza kweniso ndenga ndi jalidu labwekabweka, Skolastique wanguto ŵana ŵidu atatu ndipu wanguluta kuchija kwa apapi ŵaki.

 Munyidu munyaki yo wenga wakukota, wangukambiskana nani kuti ndisinthi umoyu wangu. Iyu wangundichiska kuti ndiweriyani ndi Skolastique. Wangundikambiya so kuti vingaŵa umampha kuti ŵana ŵangu alerekengi ndi ini ndawusewu. Mwaviyo, mu 2005, ndinguleka kumwa moŵa, ndingumuleka munthukazi yo ndabulanga nayu ndipu ndinguweriyana ndi Skolastique. Mu 2006, ini ndi Skolastique tingutorana mwadangu. Chinanga kuti venga viyo, ndingulutirizga mbwenu kumuchitiya nkhaza muwolu wangu.

 Mu 2008, Kaboni waku Yehova munyaki zina laki Joël wanguza kunyumba kwidu ndipu ndinguvwisiya uthenga wo wapharazganga. Kwa myezi yinandi, iyu ndi Kaboni munyaki zina laki Bonaventure, azanga kunyumba kwidu ndipu takambiskananga nkhani za mu Bayibolu kwa nyengu yitali. Ini ndafumbanga mafumbu nganandi, ukongwa ngakutuliya mu buku la Chivumbuzi. Ndachitanga venivi kuti ndilongo kuti Akaboni aku Yehova asambiza vaboza. Mwakuyeruzgiyapu, ndinguŵafumba kuti ntchifukwa wuli akamba kuti “mzinda ukulu” wo ukambika pa Chivumbuzi 7:9 wazamuja pacharu chapasi, penipo vesi lenili likamba kuti mzinda wenuwu “unguma panthazi pa mpandu waufumu [waku Chiuta] ndi panthazi pa Mwanawambereri,” yo ndi Yesu Khristu. Joël wandimukanga mafumbu ngangu mwakuzikira. Mwakuyeruzgiyapu, iyu wangundilongo lemba la Yesaya 66:1. Pa lemba ili, Chiuta wakamba kuti charu chapasi ‘ntchakukandapu maphazi ngaki.’ Chifukwa cha fundu yeniyi, ndikuti mzinda ukulu utuma nadi panthazi pa mpandu wa ufumu waku Chiuta chinanga kuti wepacharu chapasi. Ndinguŵerenga so lemba la Sumu 37:29, lo likamba kuti ŵanthu arunji azamuja kwamuyaya pacharu chapasi.

 Pakumaliya, ndinguzomera kuti ndiyambi kusambira nayu Bayibolu. Mwaviyo, Bonaventure wasambiranga ndi ini kweniso muwolu wangu Skolastique. Tichisambira Bayibolu, ndingwamba kuwona kuti ndikhumbika kusintha. Ndingusambira kuchita vinthu mwaulemu ndi muwolu wangu. Ndinguleka kumukambiya kuti wajikamengi nyengu zosi asani watinditawuza kweniso asani wakhumba kundipempha chinthu. Ndinguleka so kukamba kuti vinthu vosi vo tenga navu, vangu pe. Kuwonere mafilimu ngandewu naku ndinguleka. Penga ntchitu kuti ndileki vinthu venivi, ndipu ndakhumbikanga kujiko kweniso kujiyuyuwa.

 Vyaka vimanavi kuvuli, ndingupereka mwana wangu wakwamba munthulumi zina laki Christian kuti wakajengi ndi abali ŵangu ku Uganda. Kweni ndati ndaŵerenga lemba la Marangu 6:4-7, ndinguwona kuti Chiuta wakhumba kuti ini ndi muwolu wangu ndisi tilerengi ŵana ŵidu, vo visazgapu so kuŵasambiza fundu zaku Chiuta. Tosi limoza ndi mwana widu tingukondwa ukongwa tati tamudanisa!

 Ndikusambira kuti Yehova ndi Chiuta walisungu, ndipu nde ndi chivwanu kuti wakundigowoke mo ndawoniyanga vinthu kali ndipuso mo ndachitiyanga. Ndikondwa kuti muwolu wangu Skolastique wanguzomera kusambiriya nani limoza Bayibolu. Tingujipereka kwaku Yehova kweniso tosi pamoza tingubatizika pa 4 December 2010. Sonu tigomezgana ndipu tikondwa kuti titende fundu za mu Bayibolu pa banja lidu. Muwolu wangu wakondwa ukongwa chifukwa mazuŵa nganu asani ndawe ku ntchitu, ndiluta kumalu ngengosi cha, kweni ndiluta kunyumba. Wakondwa so chifukwa ndichita nayu vinthu mwalisungu kweniso mwaulemu, ndikuleka kumwa moŵa kweniso chifukwa chakuti nde wankhaza so cha. Mu 2015, ndinguŵikika kuja mura mumpingu. Kweniso pa ŵana ŵidu ankhondi, atatu akubatizika.

 Ndati ndayamba kusambira Bayibolu ndi Akaboni aku Yehova, ndazomerezanga waka cha vo andisambizanga, kweni ndafumbanga mafumbu. Yiwu agwiriskiyanga ntchitu Bayibolu pakundimuka, ndipu venivi vingundikondwesa ukongwa. Skolastique ndi ini tingusambira kuti ŵanthu wo akamba kuti ateŵete Chiuta atenere kuchita vinthu mwakukoliyana ndi fundu zaki. Ndikondwa kuti Yehova wakundiguza ndipu sonu nde mu banja laki lauzimu. Asani ndikumbuka vo vandichitikiya pa umoyu wangu, ndisimikiza kuti ndi chovyu chaku Chiuta, munthu weyosi wamtima wamampha wangasintha.