Tangata Malanga 5:1-20
5 Tokanga ki hoʻo laká ʻi he taimi ʻokú ke ʻalu ai ki he fale ʻo e ʻOtua moʻoní;+ ʻoku lelei ange ke fakaofiofi atu ʻo fanongo+ ʻi hano fai ha feilaulau ʻo hangē ko ia ʻoku fai ʻe he kau valé,+ he ʻoku ʻikai te nau ʻiloʻi ʻoku kovi ʻa e meʻa ʻoku nau faí.
2 ʻOua naʻa fakavave ho ngutú ke fai ha lea, pe fakavave ho lotó ke fai ha lea ʻi he ʻao ʻo e ʻOtua moʻoní,+ he ko e ʻOtua moʻoní ʻoku ʻi langi ia ka ʻokú ke ʻi māmani koe. Ko e ʻuhinga ia ʻoku totonu ai ke siʻi pē ʻa hoʻo leá.+
3 He ʻoku tupu ha misi mei he hohaʻa lahi ʻa e fakakaukaú,*+ pea ko e valelau noaʻia ʻa e tokotaha valé ʻoku tupu ia mei he fuʻu lahi ʻa e leá.+
4 ʻI ha taimi pē ʻokú ke fai ai ha fuakava ki he ʻOtuá, ʻoua naʻá ke fakatuotuai ke fai ki ai,+ he ʻoku ʻikai te ne hōifua ʻi he kau valé.+ Ko e meʻa ʻokú ke fuakavaʻakí, fai ki ai.+
5 ʻOku lelei ange ke ʻoua te ke fai ha fuakava ʻi haʻo fai ha fuakava pea ʻikai te ke fai ki ai.+
6 ʻOua naʻá ke fakaʻatā ho ngutú ke ne fakatupunga koe* ke ke fai ha angahala,+ pea ʻoua naʻá ke pehē ʻi he ʻao ʻo e ʻāngeló* ko haʻo fehālaaki pē ia.+ Ko e hā ke ke ʻai ai ke houhau ʻa e ʻOtua moʻoní ʻi he meʻa ʻokú ke leaʻakí ʻo pau ai ke ne fakaʻauha ʻa e ngāue ʻa ho nimá?+
7 He hangē pē ko e iku atu ʻa e hohaʻa lahi ʻa e fakakaukaú ki ha ngaahi misí,+ ʻoku pehē pē ʻa e iku atu ki he muná ʻa e lahi ʻa e lea ʻoku faí. Ka ke manavahē koe ki he ʻOtua moʻoní.+
8 Kapau ʻokú ke sio ki hano ngaohikovia ʻo e masivá pea mo hano maumauʻi ʻa e fakamaau totonú mo e māʻoniʻoní ʻi ho vahefonuá, ʻoua naʻá ke ʻohovale ʻi he meʻá ni.+ He ko e ʻōfisa māʻolunga ko iá ʻoku siofi ia ʻe he tokotaha ʻoku māʻolunga ange ʻiate ia, pea ʻoku ʻi ai mo e niʻihi kehe ʻoku nau toe māʻolunga ange ʻiate kinautolu.
9 Pehē foki ko e tupu ʻo e fonuá ʻoku vahevahe ia ʻiate kinautolu kotoa; naʻa mo e tuʻí ʻoku fai hono tauhí ʻaki ʻa e ngoué.+
10 Ko e tokotaha ʻoku ʻofa ʻi he silivá ʻe ʻikai ʻaupito te ne fiemālie ʻi he silivá, pea ʻoku ʻikai fiemālie ʻa e tokotaha ʻoku ʻofa ʻi he koloá ʻi he meʻa ʻoku maʻu maí.+ Ko e muna mo eni foki.+
11 ʻI he tupu ʻo lahi ʻa e ngaahi meʻa leleí, ʻoku tupulaki ai pē ʻa e faʻahinga ʻoku nau fakaʻaongaʻi iá.+ Pea ko e hā hano ʻaonga ki he tokotaha ʻoku ʻoʻona iá, ka ko ʻene sio pē ki ai ʻaki hono matá?+
12 ʻOku ifo ʻa e mohe ʻa e tokotaha ʻoku ngāué, pe ʻoku siʻi pe lahi ʻa ʻene kaí, ka ko e koloa lahi ʻa e tokotaha koloaʻiá ʻoku ʻikai te ne fakaʻatā ia ke ne mohe.
13 ʻOku ʻi ai ha meʻa fakamamahi lahi* kuó u mamata ai ʻi he lalo laʻaá: Ko e ngaahi koloa naʻe tānaki ʻe he tokotaha ʻoku ʻaʻaná ʻoku hoko ai pē ʻo kovi kiate ia.
14 Ko e ngaahi koloa ko iá naʻe mole ia koeʻuhí ko ha foʻi feinga* fakatuʻutāmaki, pea ʻi he taimi ʻokú ne maʻu ai ha fohá, ʻoku ʻikai ha meʻa ʻe toe ʻi heʻene koloá.+
15 Hangē pē ko e haʻu ʻa ha taha mei he manava ʻo ʻene faʻeé, te ne ʻalu telefua atu ʻo hangē pē ko ʻene haʻú.+ Pea ʻe ʻikai lava ke ne ʻave ha meʻa ʻe taha ʻi he kotoa ʻo ʻene ngāue mālohí.+
16 Ko ha meʻa fakamamahi lahi* foki mo eni: Hangē tofu pē ko ʻene haʻú, ʻe pehē pē ʻa ʻene ʻalu atú; pea ko e hā ha tupu ʻe maʻu ʻe he tokotaha ʻoku hanganaki ngāue mālohi ʻo hangē ha tuli pē ki he matangí?+
17 Pehē foki, ʻi he ʻaho kotoa pē ʻokú ne kai ai ʻi he fakapoʻulí, fakataha mo e ongoʻi feifeitamaki lahi mo e puke pea mo e ʻita.+
18 Ko e meʻa eni kuó u vakai ʻoku lelei mo tāú: ʻOku totonu ki ha tokotaha ke ne kai mo inu mo maʻu ʻa e fiefia ʻi he kotoa ʻo e ngāue mālohi+ ʻokú ne fakaongosia ai ʻi he lalo laʻaá, lolotonga ʻa e ngaahi ʻaho siʻi ʻo ʻene moʻuí ʻa ia kuo foaki kiate ia ʻe he ʻOtua moʻoní, he ko hono palé ia.*+
19 Pehē foki, ʻi he taimi ʻoku foaki ai ʻe he ʻOtua moʻoní ki ha tangata ha koloa mo ha ngaahi meʻa fakamatelie+ fakataha mo e malava ke fiefia aí, ʻoku totonu ke ne maʻu hono palé* pea fiefia ʻi heʻene ngāue mālohí. Ko e meʻaʻofa eni ʻa e ʻOtuá.+
20 He ʻe faingataʻa ke ne fakatokangaʻi* ʻa e mahili atu ʻa e ngaahi ʻaho ʻo ʻene moʻuí, koeʻuhí he ʻoku ʻai ia ʻe he ʻOtua moʻoní ke ne hanganaki nōfoʻi ʻi he fiefia ʻa hono lotó.+
Fakamatala ‘i Lalo
^ Pe “mei he fuʻu lahi ʻa e meʻa ʻoku tokanga ki aí.”
^ Fakafoʻilea, “ho kakanó.”
^ Pe “tokotaha talafekaú.”
^ Pe “kovi.”
^ Pe “ngāue.”
^ Pe “kovi.”
^ Pe “ʻinasí ia.”
^ Pe “ʻinasí.”
^ Pe “manatuʻi.”
