Tangata Malanga 11:1-10
11 Lī atu* hoʻo maá ki he vaí,+ he ʻi he hili ha ngaahi ʻaho lahi te ke toe maʻu mai ia.+
2 ʻOatu ha ʻinasi ʻi he meʻa ʻokú ke maʻú ki he toko fitu pe naʻa mo e toko valu,+ he ʻoku ʻikai te ke ʻiloʻi pe ko e hā ʻa e fakatamaki* ʻe hoko ʻi he māmaní.
3 Kapau ʻoku fonu ʻa e ngaahi ʻaó ʻi he vaí, te nau tō hifo ko e ʻuha ki he māmaní; pea kapau ʻe holo ha fuʻu ʻakau ki he tongá pe ki he tokelaú, ko e feituʻu ʻoku holo ki ai ʻa e fuʻu ʻakaú ko ia ia ʻe tokoto aí.
4 Ko e tokotaha ʻokú ne siofi ʻa e matangí ʻe ʻikai te ne tūtuuʻi ha tenga, pea ko e tokotaha ʻoku sio ki he ngaahi ʻaó ʻe ʻikai te ne utu ha meʻa.+
5 Hangē pē ko e ʻikai te ke ʻiloʻi ʻa e anga ʻo e ngāue ʻa e ivi moʻuí* ʻi he ngaahi hui ʻo e kiʻi tama ʻi loto ʻi ha* fefine feitama,+ ʻoku pehē ʻa e ʻikai te ke ʻiloʻi ʻa e ngāue ʻa e ʻOtua moʻoní, ʻa ia ʻokú ne fai ʻa e meʻa kotoa pē.+
6 Tūtuuʻi hoʻo tengá ʻi he pongipongí pea ʻoua naʻa tuku ke mālōlō ho nimá kae ʻoua ke aʻu ki he efiafí;+ he ʻoku ʻikai te ke ʻiloʻi pe ko fē ʻe lavameʻá, pe ko e taha ko ē pe ko e taha ko eé, pe te na lelei fakatouʻosi.
7 ʻOku fakalata ʻa e māmá, pea ʻoku lelei ki he matá ke sio ki he laʻaá.
8 He kapau ʻe moʻui ha tangata ʻi ha ngaahi taʻu lahi, tuku ke ne fiefia kotoa ai.+ Ka ʻoku totonu ke ne manatuʻi ʻe lahi nai ʻa e ngaahi ʻaho ʻo e fakapoʻulí; ko e muna ʻa e meʻa kotoa ʻe hoko maí.+
9 Ke ke fiefia, ʻe tangata kei talavou, lolotonga hoʻo kei siʻí, pea tuku ke fiefia ho lotó ʻi he ngaahi ʻaho ʻo hoʻo talavoú. Muimui ʻi he ʻalunga ʻo ho lotó pea ʻalu ki ha feituʻu pē ʻoku tataki koe ki ai ʻe ho matá; ka ke ʻiloʻi ʻe ʻomi koe ʻe he ʻOtua moʻoní ki he fakamāú ʻi he* ngaahi meʻa kotoa ko ení.+
10 Ko ia ai, toʻo ʻa e ngaahi meʻa fakahohaʻá mei ho lotó, pea taʻofi ʻa e ngaahi meʻa fakatupu maumaú mei ho sinó,* he ko e muna ʻa e talavoú pea mo e kei siʻí.+
Fakamatala ‘i Lalo
^ Pe “Tuku atu.”
^ Pe “kovi.”
^ ʻOku toe malava ke ʻuhinga eni ki he laumālie ʻo e ʻOtuá.
^ Fakafoʻilea, “ʻi he ngaahi hui ʻi he manava ʻo ha.”
^ Pe “ke ke fai ha fakamatala ki he.”
^ Fakafoʻilea, “kakanó.”
