Siope 36:1-33
-
Fakahīkihikiʻi ʻe ʻIlaiū ʻa e tuʻunga lahi taʻemafakatotoloa ʻo e ʻOtuá (1-33)
36 Naʻe hoko atu ʻa ʻIlaiū:
2 “Kātakiʻi ange au ʻi ha kiʻi taimi ka u fakamatala atu,He ʻoku kei lahi ʻa e ngaahi lea ke u leaʻaki maʻá e ʻOtuá.
3 Te u lea fakaikiiki ʻo fekauʻaki mo e meʻa ʻoku ou ʻiló,Pea te u tuku ʻa e māʻoniʻoní ki hoku Tokotaha-Ngaohí.+
4 Ko e moʻoni ko ʻeku ngaahi leá ʻoku ʻikai loi;Ko e Tokotaha haohaoa ʻi he ʻiló+ ʻoku ʻi heni ʻi ho ʻaó.
5 Ko hono moʻoní, ʻoku mālohi ʻa e ʻOtuá+ pea ʻoku ʻikai te ne siʻaki ha taha;ʻOkú ne maʻu ʻa e mahino loloto.
6 Heʻikai te ne fakahaofi ʻa e moʻui ʻa e kau fulikivanú,+Ka ʻokú ne ʻoatu ʻa e fakamaau totonú ki he faingataʻaʻiá.+
7 ʻOku ʻikai ke hiki hono fofongá mei he māʻoniʻoní;+ʻOkú ne fakanofo kinautolu ko e ngaahi tuʻi,*+ pea ʻoku hakeakiʻi kinautolu ʻo taʻengata.
8 Ka ʻo kapau ʻe haʻi sēini kinautoluPea maʻu ʻi he ngaahi maea ʻo e faingataʻá,
9 ʻOkú ne fakahā kiate kinautolu ʻa e meʻa kuo nau faí,ʻA ʻenau ngaahi laka hala naʻe tupu mei heʻenau hīkisiá.
10 ʻOkú ne fakaava honau telingá ke fai honau fakatonutonúPea tala kiate kinautolu ke nau tafoki mei he faihalá.+
11 Kapau te nau talangofua pea tauhi kiate ia,Te nau moʻui ʻi honau ngaahi ʻahó ʻi he lakalakaimonū,Pea ko honau ngaahi taʻú ʻe fakaʻofoʻofa.+
12 Ka ʻo kapau heʻikai te nau talangofua, ʻe fakaʻauha kinautolu ʻaki ʻa e heletā*+Pea te nau mate ʻo ʻikai maʻu ʻa e ʻiló.
13 Ko e tokotaha anga-taʻefakaʻotuá* te ne tukulotoa ʻa e ʻitá.
Heʻikai te nau tangi ki ha tokoni naʻa mo ʻene haʻi kinautolú.
14 ʻOku nau mate kei talavou pē,+ʻI heʻenau fakamoleki* ʻenau moʻuí ʻi he lotolotonga ʻo e kau tangata feʻauaki ʻi he temipalé.+
15 Ka ʻoku fakahaofi ʻe he ʻOtuá ʻa e faingataʻaʻiá lolotonga ʻenau faingataʻaʻiá;ʻOkú ne fakaava honau telingá ʻi he taimi ʻo honau lōmekiná.
16 ʻOkú ne ʻave koe ke mamaʻo mei he ngutuluo ʻo e tuʻutāmakí+Ki ha feituʻu ʻataʻatā, ʻoku tauʻatāina mei he fakangatangatá,+Fakataha mo e meʻakai lelei ʻi hoʻo tēpilé ko ha fakafiemālie.+
17 Pea te ke fiemālie leva ʻi he fakamaau kuo fai ki he fulikivanú+ʻI hono fakahoko ʻa e fakamāú pea ʻi hono pouaki ʻa e fakamaau totonú.
18 Ka ke tokanga ke ʻoua naʻa taki koe ʻe he ʻitá ki he tāufehiʻá,*+Pea ʻoua naʻa tuku ha fuʻu totongi fufū ke ne takiheeʻi koe.
19 ʻE hanga ʻe hoʻo tangi ki ha tokoníPe ko ha taha ʻo hoʻo ngaahi feinga mālohí ʻo fakahaofi koe mei he fakatamakí?+
20 ʻOua naʻá ke nofo fakaʻamu ki he poʻulí,ʻI he taimi ʻoku puli ai ʻa e kakaí mei honau feituʻú.
21 Tokanga ke ʻoua naʻá ke tafoki ʻo faihala,ʻO fili ʻa e meʻá ni kae ʻikai ko e kātakiʻi ʻa e faingataʻaʻiá.+
22 Vakai! Ko e ʻOtuá ʻoku hakeakiʻi lahi ia ʻi hono mālohí;Ko hai ha faiako ʻe hangē ko iá?
23 Ko hai kuó ne fakahinohino ʻa* hono ʻalungá+Pe lea kiate ia, ‘ʻOku hala ʻa e meʻa kuó ke faí’?+
24 Manatuʻi ke fakahīkihikiʻi ʻene ngāué,+ʻA ia kuo hivaʻaki ʻe he kakaí.+
25 Kuo vakai ki ai ʻa e faʻahinga kotoa ʻo e tangatá,Ko e tangata ko e meʻa noa peé ʻokú ne vakai ki ai mei he mamaʻó.
26 ʻIo, ko e ʻOtuá ʻoku lahi ange ia ʻi he meʻa ʻoku lava ke tau ʻiloʻí;+Ko e lahi ʻo hono ngaahi taʻú ʻoku ʻikai malava ke makupusi.*+
27 ʻOkú ne ʻohake ʻa e ngaahi tulutā vaí;+ʻO liliu mei heʻene maó ko e ʻuha;
28 Pea ʻoku lilingi hifo ia ʻe he ngaahi ʻaó;+ʻOku tō hifo ia ki he faʻahinga ʻo e tangatá.
29 ʻOku malava ha taha ke ne mahinoʻi ʻa e mafola atu ʻa e ngaahi ʻaó,ʻA e mana ʻoku ʻuʻulu mei hono tēnití?*+
30 Vakai ki heʻene ʻai ke mafola atu ki ai ʻa ʻene ʻuhilá*+Pea ʻufiʻufi ʻa e ngaahi loloto* ʻo e tahí.
31 Ko e ngaahi meʻa ia ʻokú ne tokoniʻi* ʻaki ʻa e ngaahi kakaí;ʻOkú ne ʻoange kiate kinautolu ʻa e meʻakai lahi ʻaupito.+
32 ʻOkú ne ʻufiʻufiʻaki hono nimá ʻa e ʻuhilá,Pea ʻokú ne fakahanga atu ia ki he meʻa ʻoku tāketi ki aí.+
33 Ko e ʻuʻulu mai ʻo ʻene maná ʻoku lea fekauʻaki mo ia,Naʻa mo e fanga manú ʻoku nau tala ʻa e tokotaha* ʻoku haʻú.
Fakamatala ‘i Lalo
^ Pe ngalingali, “ʻOkú ne fakanofo ha ngaahi tuʻi.”
^ Pe “ha meʻatau (tao).”
^ Pe “tokotaha tafoki ʻo fakafepaki ki he moʻoní.”
^ Pe ngalingali, “fakangata.”
^ Pe “pasipasi tāufehiʻá.”
^ Pe ngalingali, “fakaangaʻi; kounaʻi ia ke ne fai ha fakamatala ki.”
^ Pe “taʻemafakatotoloa.”
^ Fakafoʻilea, “palepalé.”
^ Fakafoʻilea, “māmá.”
^ Fakafoʻilea, “tupuʻanga.”
^ Pe ngalingali, “taukapoʻi.”
^ Pe ngalingali, “meʻa.”
