Selemaia 52:1-34
52 Naʻe taʻu 21 ʻa Setekaia+ ʻi heʻene hoko ko e tuʻí, pea naʻá ne pule ʻi he taʻu ʻe 11 ʻi Selusalema. Ko e hingoa ʻo ʻene faʻeé ko Hamutali+ ko e ʻofefine ʻo Selemaia ʻo Līpiná.
2 Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihová, ʻo hangē pē ko e meʻa kotoa naʻe fai ʻe Sihoiakimí.+
3 Koeʻuhi ko e houhau ʻa Sihová naʻe hoko ai ʻa e ngaahi meʻá ni ʻi Selusalema pea mo Siuta, kae ʻoua kuó ne kapusi kinautolu mei hono ʻaó.+ Pea naʻe angatuʻu ʻa Setekaia ki he tuʻi ʻo Pāpiloné.+
4 ʻI he taʻu hono hiva ʻo e pule ʻa Setekaiá, ʻi he māhina hono hongofulú, ʻi he ʻaho hono hongofulu ʻo e māhiná, naʻe haʻu ai ʻa Tuʻi Nepukanesa* ʻo Pāpiloné mo ʻene kau taú kotoa ke tauʻi ʻa Selusalema. Naʻa nau ʻapitanga ke tauʻi ia pea langa ha ʻā ʻo ʻākoloʻi takatakai ia.+
5 Pea naʻe ʻākoloʻi ʻa e koló ʻo aʻu ki he taʻu hono 11 ʻo e pule ʻa Tuʻi Setekaiá.
6 ʻI he māhina hono faá, ʻi he ʻaho hono hiva ʻo e māhiná,+ naʻe mafatukituki ʻa e hongé ʻi he koló, pea naʻe ʻikai ha meʻakai maʻá e kakai ʻo e fonuá.+
7 Faifai atu pē naʻe avangi ʻa e ʻā ʻo e koló, pea naʻe hola poʻuli ʻa e kau sōtiá kotoa mei he koló ʻi he matapā ʻi he vahaʻa ʻo e ongo ʻā naʻe ofi ki he ngoue ʻa e tuʻí, lolotonga ia naʻe takatakaiʻi ʻe he kau Kalitiá ʻa e koló; pea nau hoko atu ai ʻi he hala ʻo e ʻAlapá.+
8 Ka naʻe tulimui ʻa e kau tau Kalitiá ʻi he tuʻí, pea naʻa nau maʻu ʻa Setekaia+ ʻi he toafa ʻo Sielikoó, pea naʻe movete mei hono tafaʻakí ʻa ʻene kau taú kotoa.
9 Naʻa nau puke leva ʻa e tuʻí pea ʻohake ia ki he tuʻi ʻo Pāpiloné ki Līpila, ʻi he fonua ko Hēmatí, pea naʻá ne hilifaki kiate ia ha tautea.
10 Pea naʻe tāmateʻi ʻe he tuʻi ʻo Pāpiloné ʻa e ngaahi foha ʻo Setekaiá ʻi hono ʻaó, pea naʻá ne tāmateʻi foki ʻa e kau houʻeiki kotoa ʻo Siutá ʻi ai ʻi Līpila.
11 Naʻe fakakuihi leva ʻe he tuʻi ʻo Pāpiloné ʻa e mata ʻo Setekaiá,+ ʻo haʻi ia ʻaki ʻa e meʻa-haʻi kopa, pea ʻave ia ki Pāpilone, pea tuku pilīsone ia ʻo aʻu ki he ʻaho ʻo ʻene maté.
12 ʻI he māhina hono nimá, ʻi he ʻaho hono hongofulu ʻo e māhiná, ʻa ia, ʻi he taʻu hono 19 ʻo e pule ʻa Tuʻi Nepukanesa* ko e tuʻi ʻo Pāpiloné, naʻe haʻu ai ʻa Nepusaletani ko e pule ʻo e kau kaʻaté, ʻa ia ko e tauhi ʻo e tuʻi ʻo Pāpiloné, ki Selusalema.+
13 Naʻá ne tutu ʻa e fale ʻo Sihová,+ ko e fale* ʻo e tuʻí, pea mo e ngaahi fale kotoa pē ʻi Selusalemá; naʻá ne tutu foki mo e fale lalahi kotoa pē.
14 Pea ko e ngaahi ʻā takatakai ʻi Selusalemá naʻe holoki ia ʻe he kau tau Kalitia kotoa ʻa ia naʻe ō mo e pule ʻo e kau kaʻaté.+
15 Naʻe ʻave fakamālohi ʻe Nepusaletani ko e pule ʻo e kau kaʻaté ʻa e niʻihi ʻo e kakai māʻulaló mo e toenga ʻo e kakai naʻe toe ʻi he koló. Naʻá ne ʻave foki mo e faʻahinga naʻe mavahe mai ki he tuʻi ʻo Pāpiloné, pea pehē ki he toenga ʻo e kau tangata tufunga pōtoʻí.+
16 Ka naʻe tuku ʻe Nepusaletani ko e pule ʻo e kau kaʻaté ʻa e niʻihi ʻo e kakai masiva taha ʻo e fonuá ke nau ngāue ʻi he ngoue kālepí pea hoko ko e kau ngāue fakatamaioʻeiki taʻetotongi.+
17 Pea naʻe haveki ʻe he kau Kalitiá ʻa e ongo fuʻu pou+ kopa ʻo e fale ʻo Sihová mo e ngaahi salioté+ pea mo e fuʻu ʻaiʻanga vai kopa+ naʻe ʻi he fale ʻo Sihová, pea naʻa nau ʻave kotoa ʻa e kopá ki Pāpilone.+
18 Naʻa nau ʻave foki ʻa e ngaahi kané, ko e ngaahi sāvoló, ko e ngaahi helekosí, ko e ngaahi poulú,+ ko e ngaahi ipú,+ pea mo e naunau kopa kotoa pē naʻe ngāueʻaki ʻi he ngāue he temipalé.
19 Naʻe ʻave ʻe he pule ʻo e kau kaʻaté ʻa e ngaahi pēsoní,+ ko e ngaahi ʻaiʻanga malalá, ko e ngaahi poulú, ko e ngaahi kané, ko e ngaahi tuʻunga-māmá,+ ko e ngaahi ipú, pea mo e ngaahi poulu ʻa ia naʻe ngaohi mei he koula mo e siliva moʻoní.+
20 Ko e meʻa ki he ongo fuʻu poú, ko e fuʻu ʻaiʻanga vaí, ko e fanga pulu kopa ʻe 12+ ʻi lalo ʻi he fuʻu ʻaiʻanga vaí, pea mo e ngaahi saliote naʻe ngaohi ʻe Tuʻi Solomone ki he fale ʻo Sihová, ko e kopa ʻo e ngaahi koloa kotoa ko ení naʻe ʻikai lava ke fua ʻa hono mamafá.
21 Ko e meʻa ki he ongo fuʻu poú, ko e fuʻu pou taki taha naʻe kiupite* ʻe 18 ʻa hono māʻolungá, ko ha afo fua kiupite ʻe 12 naʻe lava ke takatakaiʻi aí;+ ko hono matolú ko e fālahi ʻo e foʻi tuhu* ʻe fā, pea naʻe ava ʻi loto.
22 Pea ko e ʻuluʻi-pou ʻi aí naʻe ngaohi mei he kopá; pea ko e māʻolunga ʻo e ʻuluʻi-pou ʻe tahá ko e kiupite ʻe nima,+ pea ko e meʻa vangavangá mo e ngaahi foʻi pomikānite takatakai ʻi he ʻuluʻi-poú naʻe ngaohi kotoa ia mei he kopá. Ko e fuʻu pou hono uá naʻe hangē tofu pē ko iá, pea pehē ki he ngaahi foʻi pomikānité.
23 Naʻe ʻi ai ʻa e ngaahi foʻi pomikānite ʻe 96 ʻi hono ngaahi tafaʻakí; ʻi hono fakakātoá, naʻe ʻi ai ʻa e foʻi pomikānite ʻe 100 naʻe takatakai ʻi he meʻa vangavangá.+
24 Naʻe ʻave foki ʻe he pule ʻo e kau kaʻaté ʻa Sēlaia+ ko e taulaʻeiki lahí, ko Sēfanaia+ ko e taulaʻeiki hono uá, pea mo e kau leʻo matapā ʻe toko tolu.+
25 Pea naʻá ne ʻave mei he koló ʻa e ʻōfisa ʻe taha ʻo e lotoʻaá ʻa ia naʻe pule ki he kau sōtiá, mo e kaungāmeʻa ofi ʻe toko fitu ʻo e tuʻí ʻa ia naʻe maʻu ʻi he koló, pea pehē ki he sekelitali ʻa e ʻeikitaú, ʻa e tokotaha naʻá ne fakatahatahaʻi ʻa e kakai ʻo e fonuá ki he ngāue fakakautaú, pea mo e kau tangata ʻe toko 60 mei he kakai lāuvale ʻo e fonuá ʻa ia naʻe maʻu ʻi he koló.
26 Naʻe ʻave kinautolu ʻe Nepusaletani ko e pule ʻo e kau kaʻaté ʻo ne ʻomi kinautolu ki he tuʻi ʻo Pāpiloné ki Līpila.
27 Naʻe taaʻi kinautolu ʻe he tuʻi ʻo Pāpiloné pea tāmateʻi kinautolu ʻi Līpila+ ʻi he fonua ko Hēmatí. Ko ia naʻe ʻave fakamālohi ai ʻa Siuta mei hono fonuá.+
28 Ko e kakai eni naʻe ʻave fakamālohi ʻe Nepukanesá:* ʻI he taʻu hono fitu ʻo ʻene pulé, ko e kau Siu+ ʻe toko 3,023.
29 ʻI he taʻu hono 18 ʻo e pule ʻa Nepukanesá,*+ naʻe ʻave ai ʻa e kakai ʻe toko 832 mei Selusalema.
30 ʻI he taʻu hono 23 ʻo e pule ʻa Nepukanesá,* naʻe ʻave fakamālohi ai ʻa e kau Siu ʻe Nepusaletani ko e pule ʻo e kau kaʻaté, ko e kakai ʻe toko 745.+
ʻI hono fakakātoá, ko e kakai ʻe toko 4,600 naʻe ʻave fakamālohí.
31 Pea ʻi he taʻu hono 37 ʻo e ʻave fakamālohi ʻo Tuʻi Sihoiakini+ ʻo Siutá, ʻi he māhina hono 12, ʻi he ʻaho hono 25 ʻo e māhiná, ko Tuʻi ʻIvili-melotaki ʻo Pāpiloné, ʻi he taʻu naʻá ne hoko ai ko e tuʻí, naʻá ne tuku ange ʻa* Tuʻi Sihoiakini ʻo Siutá pea ʻomi ia ki tuʻa mei he pilīsoné.+
32 Naʻá ne lea anga-ʻofa kiate ia pea ʻai ʻa hono taloní ke māʻolunga ange ia ʻi he ngaahi taloni ʻo e ngaahi tuʻi kehe naʻe ʻiate ia ʻi Pāpiloné.
33 Ko ia naʻe vete ʻe Sihoiakini ʻa hono ngaahi kofu fakapōpulá, pea naʻá ne kai maʻu pē ʻi he ʻao ʻo e tuʻí ʻi he ngaahi ʻaho kotoa ʻo ʻene moʻuí.
34 Naʻe ʻoange kiate ia ha ʻinasi tuʻumaʻu ʻo e meʻakaí mei he tuʻi ʻo Pāpiloné, ʻi he ʻaho ki he ʻaho, ʻo aʻu ki he ʻaho ʻo ʻene maté, ʻi he ngaahi ʻaho kotoa ʻo ʻene moʻuí.
Fakamatala ‘i Lalo
^ Fakafoʻilea, “Nepukalesa,” ko hano sipela ia ʻe taha.
^ Fakafoʻilea, “Nepukalesa,” ko hano sipela ia ʻe taha.
^ Pe “palasi.”
^ Ko ha kiupite naʻe tatau ia mo e senitimita ʻe 44.5 (ʻinisi ʻe 17.5). Sio ki he Fakamatala Fakalahi E14.
^ Ko e fālahi ʻo e foʻi tuhu ʻe tahá naʻe tatau ia mo e senitimita ʻe 1.85 (ʻinisi ʻe 0.73). Sio ki he Fakamatala Fakalahi E14.
^ Fakafoʻilea, “Nepukalesá,” ko hano sipela ia ʻe taha.
^ Fakafoʻilea, “Nepukalesá,” ko hano sipela ia ʻe taha.
^ Fakafoʻilea, “Nepukalesá,” ko hano sipela ia ʻe taha.
^ Fakafoʻilea, “hiki hake ʻa e ʻulu ʻo.”
