Saame 95:1-11
95 Mou haʻu ke tau kaila fiefia kia Sihova!
Ke tau kaila ʻi he ikuna ki hotau Makatuʻu ʻo e fakamoʻuí.+
2 Ke tau hū ki hono ʻaó* mo e fakafetaʻi;+Ke tau hiva mo kaila ʻi he ikuna kiate ia.
3 He ko Sihová ko ha ʻOtua lahi,Ko ha Tuʻi lahi ʻi he kotoa ʻo e ngaahi ʻotua kehé.+
4 ʻOku ʻi hono nimá ʻa e ngaahi loloto ʻo e māmaní;ʻOku ʻaʻana ʻa e tumutumu ʻo e ngaahi moʻungá.+
5 Ko e tahí, ʻa ia naʻá ne ngaohí, ʻoku ʻaʻana ia,+Pea naʻe faʻu ʻe hono nimá ʻa e fonua mōmoá.+
6 Mou haʻu ke tau lotu mo punou kiate ia;Ke tau tūʻulutui ʻi he ʻao ʻo Sihova ko hotau Tokotaha-Ngaohí.+
7 He ko hotau ʻOtuá ia,Pea ko kitautolú ko e kakai ʻo ʻene kaikaiʻangá,Ko e fanga sipi ʻokú ne tokangaʻi.*+
ʻI he ʻahó ni kapau te mou fanongo ki hono leʻó,+
8 ʻOua ʻe fakafefeka homou lotó hangē ko ia ʻi Mēlipá,*+Hangē ko ia ʻi he ʻaho ʻo Masa* ʻi he toafá,+
9 ʻI hono ʻahiʻahiʻi au+ ʻe hoʻomou fanga kuí;Naʻa nau poleʻi au, neongo naʻa nau mamata ʻi heʻeku ngaahi ngāué.+
10 ʻI he taʻu ʻe 40 naʻá ku ongoʻi fakaliliʻa ai ki he toʻutangata ko iá, pea naʻá ku pehē:
“Ko ha kakai kinautolu ʻoku nau ʻalu hē maʻu pē ʻi honau lotó;Kuo ʻikai te nau hoko ʻo ʻiloʻi ʻa hoku ngaahi ʻalungá.”
11 Ko ia naʻá ku fai ai ha fakapapau ʻi heʻeku houhaú:
“ʻE ʻikai te nau hū ki hoku mālōlōʻangá.”+
Fakamatala ‘i Lalo
^ Fakafoʻilea, “ki hono fofongá.”
^ Fakafoʻilea, “ʻoku ʻi hono nimá.”
^ ʻOku ʻuhingá ko e “Fakakē.”
^ ʻOku ʻuhingá ko e “Siviʻi; ʻAhiʻahi.”
