Saame 7:1-17
-
Ko Sihová ko ha Fakamaau māʻoniʻoni
-
“Fakamāuʻi au, ʻe Sihova” (8)
-
Ko e taʻanga tangi* ʻa Tēvita ʻa ia naʻá ne hivaʻi kia Sihova ʻo fekauʻaki mo e ngaahi lea ʻa Kusa ko e tangata Penisimaní.
7 ʻE Sihova ko hoku ʻOtua, ko koe kuó u hūfanga ki aí.+
Fakamoʻui au mei he faʻahinga kotoa ʻoku nau fakatangaʻi aú, pea fakahaofi au.+
2 He ka ʻikai, te nau hae kongokonga au ʻo hangē ko ia ʻoku fai ʻe ha laioné,+ʻO ʻave au taʻeʻiai ha taha ke ne fakahaofi au.
3 ʻE Sihova ko hoku ʻOtua, kapau kuó u faihala ʻi he meʻá ni,Kapau kuó u taʻefaitotonu,
4 Kapau kuó u faihala ki he tokotaha ʻoku failelei mai kiate aú,+Pe kapau kuó u faʻao fakamālohi ʻa e koloa ʻa hoku filí taʻeʻiai ha ʻuhinga,*
5 Pea tuku ke tuli au ʻe ha fili ʻo ne maʻu;Tuku ke ne tāmalaki ʻa ʻeku moʻuí ʻi he kelekeléPea ʻai ʻa hoku lāngilangí ke ʻauha ʻi he efú. (Sila)
6 Ke ke tuʻu hake ʻi hoʻo houhaú, ʻe Sihova;Tuʻu hake ki he ʻita ʻa hoku ngaahi filí;+Ke ke ʻā mai ʻo tokoniʻi au, pea kounaʻi ke fai ha fakamaau totonu.+
7 Tuku ke takatakaiʻi koe ʻe he ngaahi puleʻangá;Pea te ke ngāue mai kiate kinautolu mei ʻolunga.
8 ʻE hilifaki ʻe Sihova ʻa e tautea ki he ngaahi kakaí.+
Fakamāuʻi au, ʻe Sihova, ʻo fakatatau ki heʻeku māʻoniʻoníPea fakatatau ki heʻeku anga-tonú.+
9 Fakangata ange muʻa ʻa e ngaahi ngāue kovi ʻa e kau fulikivanú.
Kae fokotuʻu maʻu ʻa e māʻoniʻoní,+Koeʻuhí ko koe ʻa e ʻOtua māʻoniʻoni+ ʻa ia ʻokú ke sivi ʻa e lotó+ mo e ngaahi ongoʻi lolotó.*+
10 Ko e ʻOtuá ko hoku pā,+ ko e Fakamoʻui ʻo e faʻahinga ʻoku loto-totonú.+
11 Ko e ʻOtuá ko ha Fakamaau māʻoniʻoni,+Pea ʻoku hanga ʻe he ʻOtuá ʻo fanongonongo ʻene ngaahi fakamāú* ʻi he ʻaho kotoa pē.
12 Kapau ʻe ʻikai ke fakatomala ha taha,+ ʻokú Ne fakamata ʻa ʻene heletaá;+ʻOkú ne fusiʻi ʻa ʻene kaufaná pea ʻai ia ke tuʻu mateuteu.+
13 ʻOkú ne teuteu ʻa ʻene ngaahi meʻatau fakatupu maté;ʻOkú ne ʻai ke tuʻu mateuteu ʻa ʻene ngaahi ngahau ulouló.+
14 Vakai atu ki he tokotaha ʻokú ne feitamaʻi ʻa e fulikivanú;ʻOkú ne tuʻituʻiaʻi ʻa e faingataʻá peá ne fanauʻi ʻa e loí.+
15 ʻOkú ne vaku hake ha luo peá ne keli ia ke loloto,Ka ʻokú ne tō ʻi he luo pē ko ia naʻá ne kelí.+
16 Ko e faingataʻa ʻokú ne fakatupungá ʻe toe foki mai ia ki hono tumuʻakí;+Ko ʻene fakamālohí ʻe tō ia ki hono tumuʻakí.
17 Te u fakahīkihikiʻi ʻa Sihova ʻi heʻene fakamaau totonú;+Te u hiva fakahīkihiki* ki he huafa ʻo Sihova+ ko e Fungani Māʻolungá.+
Fakamatala ‘i Lalo
^ Pe “hiva ʻo e tengihia.”
^ Pe ngalingali, “Lolotonga ia naʻá ku fakahaofi ʻa e tokotaha ʻoku fakafepaki kiate aú taʻeʻiai ha ʻuhinga.”
^ Pe “siviʻi ʻa e mafú mo e kofuuá.”
^ Pe “ʻo fai ha talatalaaki mālohi.”
^ Pe “tā fasi.”
