Saame 51:1-19
Ki he pule hivá. Ko e hiva ʻa Tēvita, ʻi he taimi naʻe ʻalu atu ai ʻa Nētane ko e palōfitá kiate ia ʻi he hili ʻa e mohe* ʻa Tēvita mo Pāti-sepá.+
51 Fakahaaʻi mai ʻa hoʻo hōifuá kiate au, ʻe ʻOtua, ʻo fakatatau ki hoʻo ʻofa mateakí.+
Tāmateʻi ange muʻa ʻa ʻeku ngaahi faihalá ʻo fakatatau ki hoʻo fuʻu mēsí.+
2 Ke ke mātuʻaki fufulu au mei heʻeku hiá,+Pea fakamaʻa au mei heʻeku angahalá.+
3 He ʻoku ou ʻiloʻi lelei ʻa ʻeku faihalá,Pea ʻoku ʻi muʻa maʻu pē ʻiate au* ʻa ʻeku angahalá.+
4 Ko koe—tautefito kiate koe*—kuó u faiangahala ki aí;+Ko e meʻa ʻoku kovi ʻi ho fofongá ʻa ia kuó u faí.+
Ko ia ai, ʻokú ke māʻoniʻoni ʻo ka ke ka folofola,ʻOku totonu ʻa hoʻo fakamāú.+
5 Vakai! Naʻe fanauʻi au ʻi he halaia,Pea naʻe tuʻituʻia ʻeku faʻeé ʻiate au ʻi he angahala.*+
6 Vakai! ʻOkú ke leleiʻia ʻi he moʻoni ʻoku ʻi he loto ʻo ha tokotaha;+Akoʻi mai muʻa ki hoku lotó* ʻa e poto moʻoní.
7 Fakamaʻa au mei heʻeku angahalá ʻaki ʻa e ʻīsope, koeʻuhí ke u hoko ai ʻo maʻa;+Fufulu au koeʻuhí ke u hoko ai ʻo hinehina ange ʻi he sinoú.+
8 Tuku ke u fanongo ki he leʻo ʻo e fiefia mo e mavava,Koeʻuhí ke u fiefia neongo kuó ke laiki ʻa hoku ngaahi huí.+
9 Ke ke hanga kehe* mei heʻeku ngaahi angahalá,+Pea toʻo atu* ʻa ʻeku ngaahi hiá kotoa.+
10 ʻE ʻOtua, fakatupu ʻiate au ha loto-maʻa,+Pea ʻai kiate au ha laumālie foʻou,+ ha laumālie ʻoku tuʻu maʻu.
11 ʻOua naʻá ke siʻaki au mei ho ʻaó;Pea ʻoua naʻá ke toʻo meiate au ho laumālie māʻoniʻoní.
12 Fakafoki mai kiate au ʻa e fiefia ʻi hoʻo fakamoʻuí;+Langaʻi ʻiate au ha loto-lelei ke talangofua kiate koe.*
13 Te u akoʻi ki he kau faihalá ʻa hoʻo ngaahi foungá,+Koeʻuhí ke foki atu kiate koe ʻa e kau angahalá.
14 Fakahaofi au mei he halaia ʻi he totó,+ ʻe ʻOtua, ʻa e ʻOtua ko hoku fakamoʻuí,+Koeʻuhí ke talaki fiefia ai ʻe hoku ʻeleló ʻa hoʻo māʻoniʻoní.+
15 ʻE Sihova, ke ke fakaava ange muʻa ʻa hoku loungutú,Koeʻuhí ke talaki ai ʻe hoku ngutú ho fakahīkihikí.+
16 He ʻoku ʻikai te ke fiemaʻu ha feilaulau—he ka ne pehē naʻá ku mei foaki atu ia;+ʻOku ʻikai te ke hōhōʻia ʻi ha feilaulau tutu kakato.+
17 Ko e ngaahi feilaulau ʻoku fakahōifua ki he ʻOtuá ko ha laumālie mafesi;Ko ha loto-mafesi mo lavea, ʻe ʻOtua, ʻe ʻikai te ke talitekeʻi.*+
18 ʻI hoʻo hōifuá, ke ke fai ʻa e meʻa ʻoku leleí ki Saione;Ke ke langa ʻa e ngaahi ʻā ʻo Selusalemá.
19 Pea te ke toki hōhōʻia ai ʻi he ngaahi feilaulau māʻoniʻoní,ʻA e ngaahi feilaulau tutú mo e ngaahi feilaulau kakató;Pea ʻe feilaulauʻaki ʻa e fanga pulu ʻi ho ʻōlitá.+
Fakamatala ‘i Lalo
^ Pe “fehokotaki fakasino.”
^ Pe “ʻoku ʻi hoku ʻatamaí maʻu pē.”
^ Fakafoʻilea, “ko koe pē toko taha.”
^ Pe “Peá u angahalaʻia ʻi he mōmeniti naʻe tuʻituʻia ai ʻa ʻeku faʻeé ʻiate aú.”
^ Pe “ki he tangata fufū ʻo hoku lotó.”
^ Pe “Fufū ho fofongá.”
^ Pe “tāmateʻi.”
^ Fakafoʻilea, “ʻOfa ke ke tokoniʻi au ʻaki ha laumālie loto-lelei.”
^ Pe “taʻetokaʻi.”
